مُقيد أجنحتي

-34-

البـارت الرابع والثلاثون
بقلمـي مريم علاء

ومدري ليـش اتمايزك وردة گرُنفل
اتيـه روحي بريحتك واحتار من ياصفحة اشمك..
من جمعني وياك .. من شدني وي طولك
طعمك بية .. وصرت حلوك
ومرك...
ولنهة ما بالغبـشة , غبشة بغير عينك
خاف اترز بيك حد گطع النفس ..
وازهك .. واضرك
خاف تطشر ولك وشلون اللمك ..

زينب: - اني وانتِ ندري .. صخر بعدة ما متقرب منج ..

جلت صوتها وسالتني
: انت تحبي سحاب؟ 

سـحُاب:- رديت بدون تفكير
لا ..

زينب :- وداعة جهالي .. مو بس تحبي
لا تعشگيي بعد..

بلعت ريگي بخجل :- شمدريج أنتِ ..

زينب :- شوفي اكلج شي .. ترى الي يحب واضح كل شي بعيونة.. والدليل هسة انت تحوصين تريدين تصعدين للغرفة..

غمضت عيوني .. واحاول اضبط انفاسي
ودگات كلبي .. الي احس بصوتهن صار ينسمع
: منو كال الكم هذا حُـب ..

زينب :-  چـا شنو يمة .. ليش تخليني اعد واصف.. احجيلي شنو الي صار وجاي يصير

هديت نفسي وسحبت الطبلية اكعد عليها
: اني مو احـبة .. بس تعودت عليه ، اضوج من هو ماكو بالبيت .. وأحس اليوم يفرغ اذا مو صوتة وهو يتحارش بية

لو مشيتة.. لو من يعيل بحيدر
تعودت عليه بنات .. بحيث من هسة شايلة هم الدوام ..

اهتمامة .. هواي اطباع عافهن لخاطري
كتلة نبدي من جديد وبدينة من الصفر
بعد ما جنة اني ويا مثل الحية والبطنج

صخر مو نفسة القديم .. بس خايفة اغلط
ويتغير.. ويبطل صخر الي اني تعودت عليه
خايفة يكسرني.. ما اريد احبة

تقدمت يمي زينب بكل هدوء .. وأخذتني لحضنهة واردفت

: سـحُاب.. كلنا بينا اطباع سيئة .. وكلنا من نعصب نفقد السيطرة على نفسنة
.. شحال لو صخر .. الي جابهة من عمر
١٤ سنة شغل .. شي عمالة ..شي فرن صمون
.. شي بنجرجي.. شي يصير اب لاخوانة
شال حمل .. عمج بكبرة ما شالة

شنو شاف من شبابة.. عمرة راح يطخ الثلاثين
ولحد الان .. اشوفة يضحك قليل ..
من جنة نلعب هو جان يساعد باجي

أخذ دور عمي .. وصار هو الجبير
وجان يحلم .. ووصل لحلمة
ودخل الجامعة الي يريدها .. على الرغم هو ما جان عندة مجال يدرس ..

ملابس العيد هو يروح وياهم
.. مصروفهم عليه .. هو سوة من حيدر رجال
ويكدر يعتمد على نفسة

اليوم حيدر يشوف بي مثلة الاعلى
.. جيتي أنتِ .. رجعتي ذاك المراهق
رجع يلبس ويكشخ.. صار من يرجع يكعد ويانة
مو كبل يصعد لغرفتة .. بلش يختلط
وياكل ويانة.. كل هذا تغير بي ..
صخر الي وياج .. نولد وي جيتج