ALWAYS YOU

CHAPTER TEN

  "MA..."

  Napalingon kaming lahat sa tumawag kay Mama. Kasalukuyan kaming naghahapunan ngunit nang makita namin siya'y awtomatiko kaming napatigil sa pagkain at dinaluhan kaagad namin si Ate Eilyn.

  "Anak, bakit ngayon ka lang umuwi? Ha? Kumain ka na ba? Sinaktan ka ba ng lalaking 'yon?" sunud-sunod na tanong ni Mama na may halong pag-aalala.

  "Ma..." hagulgol ni Ate sabay yakap kay Mama.

  "Bakit ka umiiyak? May masakit ba sa 'yo? Ano?"

  "Ma, buntis po ako."

  "'Yan na nga ba ang sinasabi ko, eh," mahina ngunit tiim-bagang na sambit ni Papa.

  Nagitla kaming lahat sa sinabi ni Ate. Hindi rin nakahuma si Mama at diretso lamang siyang nakatingin kay Ate.

  Maya-maya pa'y tumayo si Mama at dumiretso sa lamesa saka nagsalin ng tubig sa baso. Inisang lagok niya ito pagkatapos ay nanghihinang umupo habang si Papa naman ay lumabas ng bahay.

  Hindi ko alam kung ano bang gagawin. Kahit ang kakambal ko at sina Kuya ay nakaupo lang sa sala at nakayuko, tiim-bagang at nakakuyom ang mga kamao na halatang nagtitimpi.

  "Anak naman, bakit ka... Bakit ka nagpabuntis do'n sa lalaking 'yon? May asawa na 'yon, Eilyn!" Pati si Mama ay napahagulgol na rin.

  "Ma, hindi siya mabigyan ng anak ng asawa niya. Baog ang asawa niya kaya pinili niya ako para... Para mabigyan siya ng anak!"

  "O. Eh, bakit ka nandito? H'wag mong sabihing..."

  "Nalaman na ng asawa niya—"

  "Anak naman! Pa'no kung ipakulong ka ng asawa no'n? Ha? Ano'ng gagawin mo? Bakit kasi hindi ka nag-iisip?"

  "N-nag... Nag-usap na kami, Ma," sabi ni Ate pagkatapos suminga.

  Hindi na sumabat si Mama kaya si Ate Eilyn na ulit ang nagsalita.

  "Ipapa-ampon ko sa kanila ang bata."

                                       *****

  "HEY! What's up mga bro? Ano'ng ganap at nag-aya kayong mag-inom? Martes pa lang ah," ani Jay.

  Nagkatinginan lang kaming tatlo nina Marcus at Gab bago sagutin si Jay.

  "Family problem," tipid na sabi ko.

  "Oh... Kaya pala. Pero alam niyo mga bro, hindi na mawawala ang problema sa buhay natin. Nakadepende lang sa atin kung pa'no natin dalhin. Sabi nga, there's always a solution to any problem. If there's no solution, then, that's not a problem," mahabang litanya ni Jay.

  "Hindi rin," sabat ni Gab.

  "Oo nga. Kasi alam mo, hindi naman lahat ng problema, kailangan ng solusyon. May mga problema na dapat hindi na iniintindi at hinahayaan na lang," si Marcus ang nagsalita.

  "Pero sa kaso ng problema namin ngayon, hindi talaga p'wedeng hayaan na lang," kontra ko.

  "Kung hindi p'wedeng hayaan, then might as well find a solution to it. But tonight, let's all get wasted! Whoooo!" sigaw ni Jay saka binuksan ang isang bote ng Tequila.

  Uminom lang kami hanggang sa maramdaman kong umiikot na ang paligid. Mas lalo pang nakadagdag sa pagkahilo ko ang dancing lights sa dancefloor. Maya-maya pa'y nag-aya sila na sumayaw, at dahil nga nahihilo na 'ko at parang masusuka ay nagpaiwan na lamang ako. Halos hindi ko na maaninag ang paligid ko dahil nagsisimula na rin itong lumabo. Just then, I felt someone grabbed my arm and whispered to my ear, "Already drunk? Gusto mo bang pawiin natin?" She chuckled.