اول علاقة حب حقيقيه وبكل جرائة وكل عفوية وبكل التفاصيل #القصة الاولى(اول حب)

#٨ هدفي الموبايل

بدلت وطلعت للمدرسة ناسي العالم ناسي الدنية ناسي المدرسة ناسي نفسي .. ع بالي موضوعين فقط.. الاول عبيررر والثاني لازم يصير عندي موبايل لازم يصير.. بس ردت يخلص الدوام حته اروح اشوفها لان دفعتني حته اشوفها.. سمعت من الطلاب انه باچر اكو احتفالية وجماعة الاتحاد مرتبيها بقاعة حكومية ويه مدرسة البنات يعني احتفاليه رسميه.. وهنا دخت هيه بالاتحاد وفعاليات وهاي الامور ضليت احوص اريد اروح وياهم.. بس شلون؟؟؟ وهذا ابو الاتحاد شلون ويا؟؟؟؟؟ شفت ولد علاقتي بي طيبه اسمه محمد.. گتله محمد تريدون شعر قصيده شي فعاليه بالاحتفاليه اني تره شاعر واكتب حلو( طبعا چذب مو شاعر بس اعشق الشعر وحافظ هواية) بس اريد الزگ.. گال هسه اشوف ابو الاتحاد واكوله.. المهم نهاية الدوام شفت ابو الاتحاد لابس قاط ومرتب للاخير.. كلللش ضجت گلت هذا يريد يروح للمدرسه مال بنات شلون حروح لتصير مشكله...هوه الولد ميروح يوگف بالطلعه مال بنات ماعنده هيج سوالف.. بس دائما يروح بسيارته ويشوف منو من الشباب هناك وبس هوه يركز عالبنيه هاي ومنو ممكن يوصللها او اي شي يخص هاي البنية.. المهم ترددت اروح وحيل ضجت.. رجعت والعصر راسلتني ليش ما اجيت.. كلتلها هيج وهيج وما اريد تصير لا مشكله الي ولا الچ.. وهوه اصلا ماكو شي بيناتنه.. گالت عادي احنه اصدقاء.. المهم صارت تمشي الايام ونتراسل ع رساله او رسالتين .. مصارت مال نسولف هوايه..اله يوم الجمعه من وكت لو يكون خالها طالع نسولف عادي.. مرت الايام واريد موبايل چان كلش غالي وچانت الشريحة هم غاليه.. المهم فديوم العصر واگف بالباب چان تجي سياره محمله بلوك مال بناء طبگت يم قطعه يم بيتنه.. چانت منطقتنه جديده وبادين يبنون العالم.. فدا اشوف والي افتهمته انه الرجال ديكول لابو السياره نزل البلوك هنا حته يصير قريب للبناء من يبني نزل البلوك.. رحت عالرجال سلمت علي كتله ليش ما اسفط البلوكات بالمكان الي يريد يبني بي حته يصير سهل وسريع وتنطيني فلوس.. الرجال فرح للفكره كال همه من الغبشه يجون يشتغلون شوكت تسفط.. گتله الصبح تجي تلكا مسفط.. اتفقت ويا مبلغ كلش بسيط مدا اتذكره بس يمكن احصل عالسياره ١٥ الف هيج شي.. المهم بلشت ويه الرجال  تقريبا ٣ ساعات ٤ اكون مخلص. والعصر من يجي اخذ منه الفلوس.. واجمع.. ثاني يوم ابويه شافني هيج صاحني وصيح عليه ومن هالحچي.. وطب گال لامي.. گلتلهم الله يخليكم اني عاجبني اتعب واخذ فلوس احسهن حلوات ومتأثر عليه .. المهم قنعتهم رجعت للشغل بواهس حته اجمع فلوس للموبايل.. ثاني يوم العصر اجه الرجال ما اعرف مقاول لو صاحب البيت المهم.. من نطاني الفلوس وهوه فرحان بيه.. جر صوندة المي ديريد يرش البناء.. اخذت الصونده كتله اني ارش.. واذا تريد تحسبلي فلوس حته بعد اني ارش.. كال خوش فكره كتله كل مره ارشه ٥ الف كال وره ميخلصون بساعه ترشه ولازم مره ثانيه بالليل.. گتله صااااار.. وصرت اسفط بلوك وارش مي واروح للدوام الصبح وهيج مشت اموري.. اجمع فلس ما اصرف.. صعد البناء صرت ارش الصبه والبناء صار ينطيني عالرشتين ١٥ الف.. الرجال كلش حبني.. وگال اني ابني بيوت ابقه اشتغل ويايه.. كتله كاكا اني ما اكدر ابعد من هاذا الفرع.. المهم وبالفعل لو ٤ بيوت لو ٥ چان يريد يبني بالمنطقه.. كالي اريد اخلي يمك فلوس حته من يجي بلوك انته تنطي كتله كاكا لازم تخابرني واني ماعندي موبايل.. دا اجمع.. طبعا(بالدفرات واحد يفتهم عالثاني لان ميعرف عربي وما اعرف كوردي) المهم شال ٥٠ الف كال مادام دتجمع هاي هديه حته تشتري موبايل.. طرت من الفرحة.. فديوم العصر من اجه وتحاسبنه جايب ويا ولد ٢ شفتهم ديتفقون انه يحفروله اباب البيت حفره حته يوصل للبوري الرئيسي مال مي حته يسحب مي للبيت.. كمت أأشرله واسويله اكوله ميحتاج همه اني اسوي.. عرفت كاللهم ٥٠ الف كافي.. متحملت كتله كاكا اني اسوي.. المهم راحو.. گتله كاكا اني احفر بس دليني المكان وانطيني ٤٠ الف.. هم اتفقت ويا دلاني المكان والله العظيم وره ما رشيت بالليل وطبيت تعشيت وراها طلعت احفر لل٥ الفجر او لل٦ احفر هوه اشرلي ع جسمه كال لهنا تحفر يعني لحد صدره.. وصلت وماكو بوري گلت اخاف هوه اطول مني.. حفرت لحد راسي وماكو البوري.. كمت احفر يمنه يسره لحد ماوصللللت للبوري حسيته بوري مال نفط مو مال مي من الفرحة.. المهم طلعت نازل جوا بشبرين المهم طلع البوري لووووز داير ميدوره محفور.. صار الصبح متفلش تفليش.. مارحت للدوام.. طبيت نمت گعدت العصر اجه الرجال چان كلللش فرحان بالحفره ونطاني ٤٥ الف. طبيت طلعت الفلوس حسبتنهي ٣٢٠ او ٣٣٠ الف.. يبوووووو... بدلت وطلعت للسوووووووگ.. شفت الموبايلات وعجبني موبايل چان سيمنس غطاس يسمو بي ربل برتقالي صوته عالي ضد المي  عشقته.. مشتريت گلت خلي اشوف الخط. رحت شفت الخطوط سعر الخط لو ٧٠ الف لو ٨٠ الف.. فلوسي تكفي اشتريهن.. بس المشكله گالو لازم هويه ولازم عمري فوك ال١٨.. لا جايب هويه ولا عمري فوك ال١٨..كمت افر براسي.. رجعت ع ابو الموبايلات اتفقت ويا عالسعر الي يريده بس متله كاكا اني عنري زغير ولازم اخذ خط موبايل اذا تجيبلي خط اخذ منك الموبايل وبالفعل صار هالشي... وصار عندي موبايل ورقم خاص بية....... الله الله الله... لالا ما احچيييييلكم الفرحة والراحة والطمأنينه وكل احساس حلو مينوصف... رجعت للبيت واني مرتااااااااح.. رشيت مي وكملت شغلي وطبيت للحاسبه دزيتلها رقميييييي الخااااص🥰🥰🥰...... يتبع(خليتلكم صورة الموبايل نفس مالتي🤣)