#نكهة_الحب
(10)
رجعت وصال للشركه بعد غياب ايام ..
اول ما خشت سلمو عليها الموظفات و رحبو بيها فرحت بمعامتلهم ليها اللي مش متعوده عليها ..
.
خشت لمكتبها اول ماشافتها نسيم ارتبكت و سلمت عليها بطريقه خلت وصال تحط عليها علامات استفهام..
.
قعمزت في مكتبها و بدت تكمل في تصاميمها و اعمالها ..
و عقلها شارد في سيف اللي استاحشاته بس ماتقدرش تطلع من مكتبها لانه الاعمال متراكمات عليها ..
.
لحظات و خشت الموظفه لنسيم ..
.
الموظفه مبتسمه : تصميمك عجبهم يا نسيم .. مبروك ..
.
نسيم فرحت و تلفتت لوصال اللي ابتسمت حتى هي و باركت لنسيم بينما نسيم مزال مرتبكه و كأنها دايره مصيبه ..
.
الموظفه : بري لرئيس قسم التصميم عشان تتناقشو في التصميم متاعك ..
نسيم وجهها تلون : هاه .. كيف .. قصدي عن شنو بنتناقشو ..
.
وصال بعفويه : ضروري منه النقاش هوا اكيد يبي منك تعديلات ع التصميم و الالوان و هكي ..
.
نسيم : ايه .. صح .. ضروري ..
.
.
طلعت نسيم من المكتب ..
بينما وصال شافت للموظفه و قالت : خاطري نشوف تصميمها ..
.
الموظفه : تعالي نوريه ليك ..
.
.
مشو وصال و الموظفه للمكتب و طلعت ورقه و ورتها لوصال ..
.
وصال شدت الورقه و تفاجئت : هدا .. هدا تصميمي .. هدا اني مصممته و خليته على مكتبي قبل ماناخد اجازه ..
.
الموظفه عقدت حواجبها مستغربه : شنو .. اكيد ملخبطه انتي .. هدا متع نسيم ..
.
وصال : لالا .. متاعي .. مستحيل نغلط في تصميماتي ..
.
الموظفه : اني مضطره ننقل كلامك للمدير و هوا اللي يحكم في الموضوع ..
.
وصال قعدت تشبح للموظفه و هي مزال مصدومه من سرقة نسيم لتصميمها ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
فتحت شوق عيونها شافت عدنان راقد و وجهه مقابل وجهها ..
.
رجعت غمضت عيونها و فتحتها بسرعه ..
ابتسمت و دققت في ملامحه بالتفصيل ..
.
سرحت فيه لحظات و تمنت لو تقدر تقرب منه اكتر و تبوسه على خده ..
بس فقاعة مخيلاتها انفجرت لما حست انه بدا يتحرك و بينوض ..
.
باعدت عنه و قعمزت بسرعه ..
حس هوا بحركتها و فتح عيونه ..
تلفتت فيه و علقو عيونهم للحظات ..
.
.
عدنان في خاطره : محلاها و هي فايقه من النوم .. اخخ بس لو ..
.
شوق ارتبكت من نظرة عيونه المتفحصه بجرأه ليها ..
.
حولت الغطى و وقفت و قالت : صباح الخير ..
.
عدنان فاق من خيالاته و رجع لارض الواقع مسح على وجهه و وقف حتى هوا في الجيهه التانيه ..
.
شوق مشت خطوات للمرايا وقفت قدامها تساوي في شعرها ..
بينما هوا تبعها بعيونه و حس روحه معصب من نفسه كيف بدا يتأثر بيها..
.
.
وعشان يثبت لنفسه انه مش منجذب ليها قال بخبث : بيجاما متاعك هيا ذكرتني ب وردة .. كانت لابسه كيفها لمااا ..
.
تلفتت شوق بتساؤل ..
.
عدنان كمل بخبث : وحده من حبيباتي .. حنحكيلك عليها بعدين .. ولا نقولك عندي معاها موعد بعد ايام حنرفعك معاي تتعرفي عليها ...
.
شبحلها بخبث و فرح لما شاف تأثير كلماته الواضح على ملامح وجهها ..
خاصة عيونها اللي غرقو بالدموع ..
.
ميل فمه بخبث و طلع من الدار خش للحمام و قفله عليه و خبط يده ع الحيط بالقوه ..
عدنان : تحمل ياعدنان و ماتخليش قلبك يلين يا راسك يا راسها ..
.
بينما شوق قعمزت ع السرير و استسلمت لدموعها و احساسها بالحزن و اليأس ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
في مكتب سيف خبطت وصال و خشت ..
.
سيف وقف لما شافها وابتسم : اهلين وصال .. نورتي الشركه ..
.
وصال ملامحها واضح عليهم الغضب : اهلين .. منوره بيك استاذ سيف ..
.
سيف : خيرك وصال ؟.. امك فيها حاجه؟
.
وصال قربت من طاولته : لالا امي الحمدلله كل يوم احسن..
.
سيف : امالا خيرك ؟..
.
وصال : نسيم ..
.
سيف : خيرها؟
.
وصال: سارقه تصميمي ..
.
سيف : مستحيل .. نسيم مش حتديرها ..
.
وصال : بس .. اني شفت التصميم اللي مقدمته .. هدا تصميمي ..
.
سيف سكت شوي : متأكده؟؟
.
وصال : طبعا متأكده .. هدا اني راسمته بيديا هما ..
.
سيف سكت شوي يفكر كيف بيتصرف من غير ما يسبب احراج لنسيم و بوها اللي يعرفه ..
.
سيف : بري انتي توا لمكتبك و اني توا نحل الموضوع..
.
طلعت وصال بينما سيف قعمز يفكر في الموضوع اللي مش حاسب حسابه ..
عنده ثقه في داخله انه وصال ماتكذبش بس في نفس الوقت محتار في نسيم و علاش دارت هكي ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بينما في المزرعه كانو ساجده و آيه و شوق و وطن مقعمزات على الكراسي برا و يهدرزو ..
.
وطن حاسه بملل من هدرزتهم زي كل مره و شوق اهو تجامل و تهدرز و عقلها مش معاهم ..
.
.
ساجده شافت قطوسة وطن تلعب قريب منهم قالت : غررريبه علي خلا قطوساته يلعبو هني ..
.
وطن قامت حاجبها : عطاها ليا ..
.
ساجده و آيه شهقو و شافو لبعضهم ..
.
آيه : ابدااا .. علي مايحبش يعطي حاجته لحد .. و ..
.
قاطعتها وطن بنبرة تحدي : و اني مش اي حد ..
.
ساجده شبحت لوطن بنظرة غيره و تفحيص و تدقيق مع قيمة حاجب و عيون مشتعله.. ايوااه بالزبط هاديكا النظره اللي جت في بالكم ..
.
.
شوق حست بالشراره بين ساجده و وطن حبت تغير الموضوع و تكلمت عن مواضيع الموضه و الميك اب..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
سيف في مكتبه نادى نسيم و وصال عشان يواجههم ..
.
خشو هما الزوز نسيم مش عارفه شن الموضوع و وصال تشبح لنسيم بي غل
.
.
سيف اشر بيده على الزوز الكراسي اللي مقابلات طاولته ..
.
قعمزو هما الزوز ..
سيف طلع تصميم اللي نسيم قالت متاعها و حطه قدامها ..
نسيم لما شافاته وجهها تغير لونه و شبحت لوصال بنظره سريعه ..
.
.
سيف شبح لنسيم : نسيم .. وصال قالت انه التصميم هوا تصميمها .. ؟!!
.
نسيم فتحت عيونها و رسمت على ملامحها علامات الاستنكار : شنو ؟.. كيف تصميمها و اني اللي راسمته بيديا هما ..
.
وصال بنبره هجوميه قالت : كذابه .. هدا تصميمي اني و انتي سارقاته ..
.
نسيم شهقت و شبحت لسيف بزعل و قالت : معقوله هكي يا استاذ سيف تسمع فيها تهين فيا ب اتهامها و كلماتها البيئه و انت ساكت ..
.
سيف شبح لوصال و قال بصوت هادي : اهدي يا وصال ..
.
نسيم وقفت : مزال تهدي فيها بدال ما تطردها من الشركه ..
.
سيف رجع ظهره ع الكرسي و قال ببرود : هوا اكيد فيه وحده حتنطرد منكم .. بس لما يطلع الحق و نعرف من اللي ظلمت التانيه ..
.
وصال تنفست براحة لانها عارفه روحها صادقه ..
بينما نسيم رجف قلبها رجفة قلب الكذاب لما يعرف انه كذبته حتنكشف ..
.
.
سيف : تقدرو تطلعو توا .. بعدين فيه اجتماع نبيكم تحضروه الزوز .. و بالمره تحكيلنا عن تصميمك يا نسيم و تقوليلنا تفاصيله و كيف قدرتي تصميميه و التعديلات اللي حنطلبهم منك كيف حتعدليهم .. كل شي حتوضحيه لينا على الشاشه قدام الكل ..
.
حست نسيم بقلبها طاح من كلامه ..
بينما وصال ابتسمت بنصر .. عرفت انه نسيم مش حتقدر ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
في المزرعه كملو البنات غداهم و ناضو يلمو في السفره و يحوسو في المطبخ ..
.
.
و مزال النظرات المشتعله بين ساجده و وطن ..
.
لحظات و سمعو صوت علي في الصاله هدا وين روح من العمل ..
.
ساجده: علي جي ..
.
وطن قلبها ولعت فيه شعلة ..
.
عاتكه : حطو ع راسكم يا بنات مرات علي يخش ..
.
حطو ساجده و آيه وشاحهم على راسهم ..
بينما وطن و شوق لا ..
.
.
آيه : وانتم .. قصدك ماتتحجبوش قدامهم ..
.
وطن شبحتلها و لفت وجهها عنها ..
شوق : لالا .. اساسا اني و اختي مش محجبات .. غير لما جينا هني علي فرضه علينا ..
.
ساجده شبحت لوطن من فوق للوطه و قالت : ايه علي مايحبش البنت اللي مش محجبه و اللي تلبس في لبس ضيق ..
.
.
وطن عرفت انها تقصدها بس شغلت دماغها و خططت امتى تردهالها..
.
.
لحظات و سمعو صوت علي يخبط ع الباب و يتنحنح ..
.
عاتكه : خش يا علي ..
.
علي خش و سلم على بنات خاله من بعيد من غير مايشبحلهم ..
.
طلعت عاتكه بينما وطن قربت منه و هي مبتسمه و هوا بلا شعور منه لما شاف ابتسامتها ابتسم ..
.
وطن وقفت جنبه و قالت بصوت هادي و شبحت لساجده و قالت : ساجده قبل شوي قالت انهم يتحجبو قدامك هي و اختها آيه .. و قاتلي علاش ماتتحجبي قدام علي و حتى طريقة لبسي ماعجبتهاش ..
.
علي قام حاجبه و يحاول يفهم وطن لوين تبي توصل ..
.
وطن كملت و هي تشبحله : ماتحسابش انه انت عندك عادي نكون بلا وشاح قدامك انت .. بس غيرك لااا ..
.
علي ملامحه جمدو على عيون وطن و كلام وطن ..
بينما قلبه طلع من مكانه لعند وطن ..
.
و ساجده حست وكأنه حد حطها ع النار حست بنار تاكل فيها ..
نار غيره تحرق فيها ..
.
.
ساجده : بس .. مافيش فرق بين علي و بين خوته .. كلهم ولاد عمك .. و ..
.
علي قاطعها بعدم اهتمام : وتولي غدايا ..
.
وطن ابتسمت : حاضر .. دقيقه و يكون عندك ..
.
علي بخبث: خلي ساجده اتجهزهولي ..
.
تلفت لساجده و قال وهوا مبتسم : جيبيه ليا برا في المكان اللي تحبيه انتي يا ساجده ..
.
وطن ملامحها تغيرو و النار اللي كانت تاكل في ساجده توا قعدت تاكل فيها هي ..
.
طلع علي .. و ساجده حست بالانتصار بعد الموقف اللي صار قبل شوي ..
كوّرت وطن يدها و حافظت على هدوئها و رسمت على وجهها ابتسامه باش اداري بيها نارها ..
.
.
قعمز علي برا في مكان فيه اشجار خوخ و تحتهم طاوله بكراسيها ..
جي عدنان قعمز جنبه و بدو يهدرزو عن العمل..
.
علي : يشكرو فيك في الشغل كل مره نسأل عنك ..
.
عدنان ابتسم : بسرعه تعلمت و خديت عليه ..
.
علي : مليح .. هكي نبيك ..
.
.
جت ساجده حطت السفره ع الطاوله و قالت : صحتين مقدما..
.
هز علي راسه و بدا ياكل هوا و عدنان ..
بينما ساجده قعدت تتمشى بين الاشجار ..
.
و عيون وطن تراقب فيهم من بعيد و تحاول تقرا ملامح علي و تستنتج منهم اذا كان معجب بيها او بينهم شي او لا ..
و مزال الفضول ياكل فيها شن قصة هالمكان اللي تحبه ساجده ..!!؟
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
في قاعة الاجتماع كانو الكل حاضرين وصال في كرسيها و نسبم مقابلتها وتفرك في اصابعها ..
.
.
تناقشو في كدا موضوع يخص الشركه لعند ما قال سيف : يلا آنسه نسيم اوقفي و اعرضيلنا تصميمك و احكيلنا عليه ..
.
وقفت نسيم و نظراتها واضح عليهم الخوف ..
بينما وصال كانت نظرتها واثقه ..
.
وقفت نسيم و انعرض قدامها التصميم قعدت واقفه تشبحله و تشبحلهم..
.
سيف بنظره ثاقبه : شنو يا نسيم ..
.
نسيم نزلت راسها لحظات و الكل كان يشبحلها ب استغراب ..
ثواني و اعتذرت نسيم و طلعت لمكتبها و الدمعه فعيونها ..
.
.
بينما وصال وقفت و قالت : هذا تصميمي و اني اللي نقدر نحكي عليه و مستعده نتلقى تساؤلاتكم ونجاوب عليها ..
.
سيف: تفضلي ..
.
طلعت وصال و بدت تحكي عن التصميم بثقه و تجاوب ع اسئلتهم ..
و سيف يشبحلها بنظره مختلفه عن نظرته ليها قبل ..
نظرة الاشمئزاز من مظهرها اللي كان مايحبش حتى يشبح جيهتها ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
كملو عدنان و علي من غداهم و مشو جيهة الخيل ..
لحقتهم ساجده لما شافتهم ..
و وطن لما شافت ساجده لحقتهم نادت شوق و مشت لحقتهم حتى هي ..
.
مستحيل تخليها تنفرد بيه ..
حست و كأنها في ساحة قتال و ضروري تثبت وجودها علاش و كيف مش عارفه ..
.
.
وصلو ساجده و عدنان وعلي للخيل و وقفو ع السياج يهدرزو ..
لحظات و وصلت وطن و عيونها زي الصقر على ساجده ..
.
.
علي شاف لنظراتها ابتسم في داخله بس دار روحه مش فاهم شي و مش هامه شي ..
ساجده : وين الفرس متاعك ياعلي ..
.
علي : في الاسطبل ..
.
ساجده تسال في علي : نمشو نجيبوها ..
.
وطن : ماتقدريش تجيبيها بروحك ..؟!!
.
علي ابتسم : لالا ساجده تخاف ..
.
وطن : ما شاء الله حافظها صم ساجده ..
.
علي زادت وسعت ابتسامته اللي عدنان مستغربها
.
ساجده : عيب عاد متربين مع بعض ..
.
وطن ضيقت عيونها و شبحت لساجده ..
.
ساجده وسعت منها و قالت : بس زعلت لما القيتك عطيت وحده من القطوسات لوطن .. و اني قبلها طلبتها و رفضت .. نبي القطوسه اللي عند وطن ..
.
وطن فتحت عيونها ع وسعهم ..
بينما علي قال بثقه : لا عاد في هادي سامحيني .. وطن حاجه بروحها .. مسموحلها اللي ممنوع على غيرها ..❤
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الكاتبه:Beba pink
واتباد "BebaPink89"
قروب روايات العنود Beba Pink
