بسم الله الرحمن الرحيم ,,والصلاة والسلام علي حبيبنا رسول الله ,,
رواية #نا_وضنوة_راجلي
نبدو في المقدمة قبل 😊
قصتنا تحكي عن بنوته اسمها(سناء)متخرجه من الجامعه تخصص هندسة ديكور وعمرها 22 سنة واتعيش في حوش باتها مع خوتها الاربعه وكلهم متجوزين ماشاءلله حتى الاصغر منها ,, وهضا اللي معقدها في حياتها وسناء طبعا بنوته عاديه زي اغلب البنات بس حلوة ودمها عسل ,, بشرتها بيضا واعيونها بنيات وفيهن ذبله محليتهن ونقشها ايهبل وشعرها ناعم ولونه بني غامق لكن مرة مرات تصبغ فيه وطبعها مخلط شي طفولي علي مسترجل علي انثوي ايخلي كل شاب ايشوفها يبيها ويتمناها ,,لكن النصيب مازال ماجاها بالرغم انها عايشه قصة حب مع ولد جيرانهم واسمه( محمود) من نفس عمرها مغير اكبر منها بشهور ومكبدين في بعضهم وطبعا علاقتهم من بداية الثانويه وطبعا كيف حال اغلب المراهقات الليبيات بالدكنوني وحتى الفون من تحت لتحت ,,واتساعد فيها مرت خوها الكبير اللي حتعرفنها من ,,بشواش علي رواحكن بس 😅 اني جايتكن في الكلام حناتي ,,😁
,,و استنن بس و تعرفن علي خوتها من ,,
الكبير اسمه( سليم )وعمره 35 سنة وعملة في الشرطه وحنوووون علي سناء وهادي بطبعه لكن كان عصب ماحد يقدر يحكي معاه ,, وعنده اربع بنات ومتجوز من حب حياته بنت جيرانهم (عايشه) وعمرها 30 سنة وتشتغل مدرسة في الابتدائي. وبنياتها (علياء) وعمرها 6 سنوات و(سلوى) وعمرها 5سنوات و(عفراء) وعمرها 4 سنوات ومسميتها عمتها سناء 😅 والاخيرة اسمها(سلسبيل) طبعا الكبيرة مسميها علي ام عايشه والثانبه مسمينها علي ام محمود والتانيات اساميهن من عمتكن سناء ,
المهم ,,الاخ الثاني لسناء اسمه (هشام ).وعمره 33 ويشتغل في عمل حكومي ومتجوز (حنان) وعمرها 26 وحده دلوعه تفصع في الرقبة وادير في جو النفسيات مع الكل وخاصة سناء اللي ياما تكتها معاها وجوها معاها مش تمام ,, وعندهم ولد وديما حنان تقهر في عايشه انها جيابة بنات وهي جابت ولد ,, اخخخخخ نفسيه 😒
والاخ الثالث اسمه(ابراهيم) وعمره32 ومتجوز وعنده بنت وولد وزوجته اسمها (وفاء) وعمرها 31 كانت معاه في الجامعه وحبو بعضهم وتجوزها في اخر سنة لهم في الحامعه ويشتغل في الضمان هو وياها وعندهم ولدين ,,الولد عمره 3 سنوات والبنت سنة وحده والاخ الاصغر واسمه(سمير ) وعمره 21 سنة متجوز وجوزته اسمها (رنده ) عمرها 19 سنة وحده نوبااااجه طبعا مرت هشام تغار منها وهي تغار من مرت هشام ومانحكيلكن علي جو السلفات بعد ايغارن ,, ومازالت ماضنت ,,
رواية #نا_وضنوة_راجلي للكاتبه #هميلو
الحلقه الأولى /
المهم هذي عيلة سناء طبعا خاطي جدها بات باتها ايعيش في مدينة ثانيه وديما تمشي سناء اتغير جو عنده بعد يكثر عليها الضغط من خوتها او صباياهم ,, وحتعرفن احداث قصتها معاهم ,, المهم في يوم ناضت سناء حايسه عالحوش ضم وتنكيت وطبعا فيلة باتها الله يرحمه واسمه( سعيد) ساكنة في الدور الاول وحدها والدور الثاني فيه هشام والثالث فيه ابراهيم ومحمود باني جنب هله حوش صب صفرة وسمير ساكن عالجنب التاني في جناح كبير اشوي جنب فيلة هلها حالتهم بصفة عامه متريحه ,, لكن سناء ديما اتحس في شي ناقص فيه خصوصا بعد فقدت باتها وامها وهم مسافرين لمصر ,, ودارو حادث وتوفو وخلوها مع خوتها اللي يحن واللي ينت لعند اجوزو وطبعا تغيرت معامله بعضهم بعد الزواج ومعروف السبب ,, الا سليم ديما ايحاول مايقصرش معاها ,, بالرغم ان سناء لسانها طويل 😁 ودافع علي روحها وماتسكتش لحد ايهينها وهضا اللي مخوف صبايا خوتها منها خصوصا وسليم ديما واقف معاها ومايسمحش لحد ايهينها او يضربها ,, نافخلها ريشها العطيب 😂 سلم خيها ,,
نرجعو لسناء اللذ تسيق وداهشه وواصلة حدها ورن فون الارضي مشت ردت ,
سناء : الووو
ولقتها عايشه مرت سليم ,,
سناء: اهلين عويشه شخبارك ?
عايشه : الحمدالله ياسمحه ,,قتلك نبي نقولك تمشي معايا اليوم لفرح عيت ال........ باهي
سناء لوت شوربها ورفعت حاجبها وقالت : ينقنك فوتيني يانونه ابطلت ونا نحضر في فروح العرب ونا فرحي ماباه ايجي 😒
عايشه: ياهمي مغير وتي روحك نمشي نا وياك اخت العريس عزمتني وقالتلي انجيبك معايا ومنها اتغيري جو ,
سناء باستغراب : ومنين تعرفني بنت عيت ال......... نين تعزمني ? 😕
عايشه : نا حاكيتلها عليك ومتشوقة تبي اتشوفك ,, فيش اديري توا انتي ?😕
سناء: انكت في هالقطرة اللي هدت جهدي 😤
عايشه : خلاص انسيبك تكملي وعالمغرب نلقاك واتيه فااااهمه ?
سناء : باهي ياهمي ,,شن نلبس ?
عايشه : عندي فستان ايهبل جبته من اختي نور ايحي عليك نا ماجاش عليا قبل نبي نلبسه ,,تعرفي ايجي عليك من غادي حندزه لكي مع علياء افتحيلها الباب ,
سناء: نجك ليا احلى مرت خو في الدنيا ,, ربي يجبر بخاطرك بعيل ياعايشه يابنت صالحه ,
عايشه: امين ياسنيوا ,, هيا نسيبك تكملي شغلك ,باي
سناء: باي بوسيلي الداعشيات قرعتي 😘
وسكرت من مرت خوها وتلتفت وتلقا عمتكن رنده لابسة عبايتها وخاشه عليها بصاكو صغير ,
رنده : صار احلى مرت خو في العالم ,,هه ربي يدوم.😏
سناء غمتلها بعد شافتها بحكم رنده ديما تعزق في الدوة لسناء اني اصغر منك ومتجوزه وانتي مازلتي وشاكة ان سناء تحب حد بس مازالت مامسكت دليل عليها ,,
سناء : اهلن ,, اكيد انشاءلله ربي يدوم.عويشه اتهبل وتستاهل كل خير ,
رنده خشت قمعزت عالصالون متاع الانتري في الصاله ,
سناء : خير انشاءلله وين سبع البورمبه ,, ? وكنك جاية بروحك ?
رنده : عنده شغل ,, وقالي ماتقعديش بروحك., جابني عندك ,, في ماااانع ??
سناء : لا حبيبتي مافيييش ,,مغير بعدين عندي فرح ماشيتله ,, مرات تقعدي بروحك فرني عليه وقوليله ,,عشان ماتقعديش بروحك ,
رنده : فرررح ?! فرح من ? ومن بيشيلك ?
سناء تنهدت : فرح عرب ماتعرفيهنش ,, وبيشيلني خوذ طبعا ,,من بيشيلني 😒
رنده بخبث : لكن سمير حطني وقالي احتمال نتأخر ونروح بيك في الليل راه ,😒
سناء رفعت النشافه وتبي اتخش للمطبخ وقالتلها بدون ماتشوفها : معناها رني عليه ياحنه وخبريه ,, نا اليوم مش قاعده ,,ونبي نمشي ,
رنده : 😡
وعلا رنت علي راجلها وخبراته بطريقه ان سناء نتت ولزتها وعاركت وسمير اظطر يروح وعارك سناء وسناء ماسكتت وتعاركت هي وياه وخشت علياء بنت سليم وشافت الموقف وسمير ايتحزز علي سناء وفريري راحت خبرت امها وباتها وجا سليم جري وخش القي سمير ماسك سناء من يدها يبي يضربها و
سليم : سمييييييير 😠
سمير طلق يد سناء وشافله بغل : تعال شوف الهانم اللي مقويها علينا ,,ولسانها يبي قص 😠
سناء : مراتك اللي تبيلها قص لسان انا ماقلتش شي ,,بنمشي مع مرت سليم انت شن دخلك ?
سمير : اتلزي مراتي من حوش باااتي عشان تبي تمشي ? 😡
سناء : مالزيتهاااش ,
سليم : ممكن اتفهموني شن في ? 😤
سناء حكت باللي صار بينها وبين رنده ,,
سليم : ريت اختك مش غلطانه وفهم مراتك ان الناس عندهم وقتهم وحياتهم ومش من حقها تدخل في حياة اختنا تقعد ولا لا ,, 😡
سمير : باهي شن فيها كان جت وقعدت في الحوش ولا الهانم مغش تبي حد ايجيها ? 😠
سناء : تبي تفعد ماحد لازها لكن هي قالت انك ماتبيهاش تقعد بروحها ونا قلتلها اترن عليك وتفهمك اني طالعه بس 😒
ويمير خذا مراته اللي عيونها علي سناء وحقد ماليها عليهاوعلي سليم اللي سند لاخته وماياخذش فيها دوة ولا شي ,وبعد طلع سمير خبط الباب بقوة وسناء وجعتها معاملة يمير بس دايما ماتحبش اتوضح لحد ,,
سناء : ربي ايخليك ليا ياسليم وماننحرم منك ويفرحك ربي باللي يجبر بخاطرك يارب ,
سليم شدها لحضنه وباس راسها وقال : انتي بنتي مش اختي افهميها كويس ياشينه ,,واللي يبي يكلمك ايواجهني نا قبل ,
سناء : هههههه نجك ليا ,, سبع ياخواتي وبدل مايقعد عندك.اربع بنات تمينا خمسه 😅
سليم ابتسم : واحلا بنات ,,ربي يخليكن ليا ,وتو خليني نمشي انطمن عويشه سيبتها منشغله عليك,
سناء : تعالي هنا ,,من خبركم انتم ,?
سليم : علياء جت جايبتلك امانة في الشكارة وجت طايره خبرتني ,
وشافت سناء للكيس لقاته عالوطا خذاته وفتحاته ولفت الفستان وسليم روح وخشت دوشت وبخرت الحوش وخست حطت حاجة خفيفه تاكلها,, وخشت اتقيس في الفستان اللي جا مرسوم عليها رسم ,, وجهزت روحها وحطت مايكب خفيف كحل عين وروج وبودره طلعت اطلع طول 😍 ورنت علي الكبيده وحكتله انها بتمشي ,, وطبعا قنعاته وسمحلها ,, وجا الوقت ومشو .
عايشه : ماشاءلله عليك سنيوا اتهبببلي ,
سناء: نجك ليا ياذوق انتي ,, جبتي معاك الروج الاحمر ?
عايشه : اها جبته ,, لكن ماتكثريش والله مكاجك ايهبل خليك بنوته بيش يعرفوك بنوته بااكي شي عزوز تخطبك لولدها?
سناء : لا ياحنه ,,عندي الكبيده يسد ,, وربي يسهل نصيبنا ادعي انتي بس ,
عايشه وجعتها سناء وقالت في سرها (يستر الله ياسنيوا تنصدمي صدمة عمرك وماتقدريش تتحمليها 😔)
وعمتكن سناء تتخيل في روحها مكان العروس و.......................
قراءة ممتعه 💋
هذي بدايتها انكملها ولا نفوتها 😐 اذا تفاعلتن وعجبني التفاعل انكملها وانزل يوميا ,,😊 كان هضا ماعندي عليش امتعبه روحي ,,, 😒
#Hamelo ✒
