رواية #نا_وضنوة_راجلي من تأليفي #هميلو 💚
الحلقة (20) ,,
وصلنا لعند عمكن ليث خطف بوسات من عمتكن سنيوة 😘 ورقد جنبها وهو سارح ويفكر ويخطط وقال في سره ( شن درتي فيا بس ياسناء,, شن اللي درتيه نين احتليتي تفكيري ? )💚
وثاني يوم ناضت سنيوة.روتين يومي عادي الفرق انها مش ماشيه للعمل بتكمل شغلها اليوم في الحوش ,, وبدت اتجهز في الضنوة كل حد ولبسته ومستلزماته وغسلت شهودي ولبستها ومشطتلها شعرها وفطرتهم ونوره فرحانه بسناء وبمعاملتها مع العيال كانهم خوتها او عيالها من روحها ,, وخشت اتجهز للغداء وسناء اتفطر في شهد ونست ان ميسا الساحره قصدي سالمين قاعده عندهم وبايته ,, ..وهي تسمع صوتها ,,: صباح الخير جميعا ,,
ليث : صباح النور ,,
العيال : صباحو النور ,,😊
سناء سكتت ودارت روحها منشغله بشهودي غامتلها من سالمين ,,خطرها روايتي ومن تأليفي ايواااه #هميلو ,, بدون سرقة 😒
ماعلينا ,,
المهم سالمين قمعزت ونادت بصوت عالذ لنوره : نوووره ,,انتي يامرخيه ,,
نوره جت تجري وقالت : ايوا ياست سالمين عاوزه حاجه ?
سالمين برفعت خشم : نبي قهوتي سادة بسرعه ,😌
نوره بتوتر : حاضر ,,
سناء ماعجبتهاش طريقة سالمين مع نوره وسكتت وهي ماسكة روحها بالغصب ,,
سالمين لليث : شن صار في موضوعي اللي قلته لكي ياليث ? 😊
ليث : انشاءلله خير ,,, 😑
سناء شافت لليث بمعنى شنو في وليث غنض اعيونه بمعنى بعدين انقولك ,, وطلعو شادي وشاهين وشيماء وفراس وفارس ,,للسيارة بتشيلهم للمدرسه وسناء لحقتهم ومسكت في كتف شادي
وقالتله : شادي ,, رد بالك علي روحك ولو ضايقك حد وخاصة بالشدوق واللي معاه قولي باهي ?
شادي ابتسم وقال : أوكي ,, ماتخافيش ,
سناء شافت لشاهين اللي ايتخزر فيها وقالتله : والكلام لك حتى انت ,, ورد بالك من خيك ,,
شاهين مشا ركب في السيارة بدون مايحكي وشادي وراه وسناء قربت من شيماء
وقالتلها : حتي انتي ردي بالك من روحك ,, را اتضايقك شي وحده وماتقوليلي ,,ردي بالك من روحك ,
شيماء ابتسمت وقالت : ماتخافيش نا اصلا اللي نخزرط فيهن ,,😁
سناء : في هذي مصدقتك ,, مغير خزرطي المنجوهات بس رقادات الريح سيبيهن باهي ? 😂
وخشت شيماء للسيارة وهي تضحك ,, ومشت بيهم السيارة وسناء اتشوفلهم وكان الجو فيه برووده بسيطه ,, وسناء ابتسمت وفرحت لأنها تحب فصل الشتاء ومافطنت الا وليث ايحط في يده علي كتفها وقاللها : تبي شي قبل مانمشي ?
سناء ابتسمت ونزلت اعيونها منحرجه العطيبه وقالت : سلامتك ,, مغير راك تنسى اتقول للعمال يبدو بس ,
