سلامو نعموشاتي ,,😊 قبل ماتهجمن عليا ,, الوصيد كمل وفتحت امبارح بنت الشفره دار روحه اشتغل شوي وبعدها مزطني طفيته 😒
المهم اليوم عبيت وحنحاول انزل بالحلقتين وخده في النهار ووحده في الليل نظام مضاد حيوي 💊 😂 دلعتكن وجت علي راسي ,, مني بايدي ,,😤
وكان غبت عليكن مرة تانيه اعرفني ياما بلا رصيد او بلا ضي عارفات اني نا مايغيبني عليكن الا الشديد القوي ,,😐
وتفااااااعلن 😉
💚💚💚💚💚💚💚💚💚💚💚💚💚
رواية #نا_وضنوة_راجلي للكاتبه #Hamelo
الحلقه (الثامنه)
وصلنا لعند العيال قربعو سناء بخط ولوح وقبل تشفشفت وليث خذا ضنوته لدار البنات ووقفهم طابور وشهد جت صبت في الطابور مع خوتها مع انها بيبي وماشورها خد لكن تقليد عااد اللي ايديروها خوتها بديرها 😁 ولية كان باين عليه الضيق والغضب من اعياله وتصرفاتهم مع سناء وفي نفس الوقت حاسس بعياله وزعلان عشانهم ,,
ليث بصوت حازم : ممكن نفهم شن اللي درتوه في سناء وليش درتو هكي ? احكو بسرعه ,
والعيال شي مافتحو افوامهم مفيت اعيون زارقات وخلاص ,,😁
ليث : أحكووووووو. 😬
وهنا خشت سناء ,
سناء : ليث ممكن اتخليني نحكي معاهم شوي ?
ليث التفت عليها وقال : سناء انتي أكويسه ?
سناء بابتسامه : الحمدالله كويسه ,, مافيش داعي اتعرك اعيالك ,,لانهم مالهمش دخل ,
ليث شافلها وبعدها شاف لعياله وقاللها : بس عمتي متأكده انهم ورا اللي صارلك ,, باهي كيف طربقن فيك المفرقعات ?
سناء : لا مش هما ,, والمفرقعات مني نا قعدت انتفرج عليهن وخذيت واحد ولعت فيه نحسابه ماولعش وهو شكله ولع وبعد عزقته عالوطا ولع الباقي ,, وصار اللي صار ,, انا اسفه ,
ليث شافلها ومش مقتنع بكلامها بس قال : انشاءلله خير ,, واذا زي ماتقولي فردي بالك مرة ثانيه هالمرة ماصارلك شي المرة الجايه الله اعلم شن بيصير ,
وطلع بعد عاطه اعياله نظرة راني زارق عليكم ,,👀 ومشا لغرفته والعيال شافو لسناء باستغراب ,, انها ماحكتش وهي جت جنب شهد ورفعتها في حضنها وباستها ,,وقعدت اتلعب فيها وشهد تضحك معاها وشيماء ماعجبهاش الوضع فقالت بعصبيه : عليش كذبتي علي بابا ? وليش ماحكيتيلا باللي درناه فيكي ?
سناء ابتسمت وقالت : ماحكيتش عشان مازلت نبي نكون صديقتكم ,, ومانبيش نكون عدوة لكم ,
شاهين : اصلا انتي بعد خذيتي مكان ماما قعدتي عدوتنا ,, ومستحيل اتكوني صديقه لنا ,
سناء رفعت حاجبها مستغربه من كلامه : تي وين الطفوله بس? عنجد كلامكم تي ونا في عمركم ماني عارفه الدنيا منين زارقه عليا وانتم تخططو واتهددو وناقنين وكارهين !! شنو راضعين وانتم صغيرين بس ?
شيماء بعصبيه : والله انتي جيلك غبي ونحن جيلنا جيل ذكي ومش اي حد يكون صديقنا ,, خصوصا نحن اولاد شروق ,
سناء باست شهد ونزلتها وقالت : عارفه انكم اولاد شروق ومية مرة قلتلكم مستحيل ناخذ مكان امكم ,, ونا نتمنى نكون صديقة لكم ونعيشو مع بعضنا ,,لكن مادام طلعتو مش ساهلين واعلنتوها حرب ,, اوكي 👍 وتو ارواحكم للعبة جديده انا حنقرر شن هي ,
شيماء: تبقي مازلتي ماتعرفيش نحن من ?
سناء : لا عنوني عرفتكم ,, وتوا انتم لارم تعرفو من سناء لانكم مازلتو ماتعرفونيش ,, مغير ماتشكوش للباااابا بس بعد نغلبكم 😁
فارس : اوكي ,, حنشوفو ,
شادي : تم حنشوفو من اللي يفوز نحن او انتي ,
سناء ابتسمت ورقصتلهم حواجبعا وطلعت وبعدها تباوعتهم بوجهها بس من برا الدار وقالت : حليا منهم المافيا 😘 سنفورين ايهبلووو امممممواه 💋
وعزقتلهم بوسه في الهوا وهشت دارها وسكرت الباب وتنهدت وفنصت اعيونها وقالت: عااااا نا شن درت بس ? هاضوم نش طبيعيين 😳
وقعدت اتخمم وتفكر شن ادير وبعد المغرب توضت وصلت فرضها ولبست بيجاما عاديه بيضا وعليها رسوم كرتون اصغير ومشطت شعرها وكحلت وخطت روج وتعطرت ونزلت لقت هاجر وشهد وباقي العيال عالتي في وشيماء عالآي باد متاعها مست عليهم وخشت للمطبخ لقت نوره الخدامه اتجهز للعشاء ,
نوره : أزيك دلوقتي ياست سناء ? 😊
سناء بابتسامه : الحمدالله احسن ,☺
نوره : خلي بالك منهم دول عيال مش ساهله 😐
سناء: لاحظت الشي هضا ,,وحتى كلامهم كلام عرب اكبار ,
نوره وهي اتحط في خضرة السلطه في الصونيه : ايوه ,, لانهم متعلمين كتير ومفتحين كده وبيتابعو كل حاجه عالتي في وعالنت وغيرو ,
سناء طرمت شواربها وقالت : لازم نعرف شن نقطو ضعف كل واحد فيهم.,
نوره : بتقولي حاجه ياست سناء?😕
سناء بقصقصه : انتي لك زمان معاهم اكيد تعرفي شن يخبو وشن يكرهو ممكن تساعديني يانوره نبي نكسب ثقتهم ,,لكن في الاول لازم نغلبهم في لعبتهم عشان يعرفو ان اللعب معايا مش ساهل ,
نوره : بس ياست هانم انا خايفه الحقيقه ,,لسي ليث يزعل او الست هاجر يعني ....
وهنا سمعن صوت هاجر اتقول : بالعكس اصلا نا اللي قلت لسناء تلعب لعبتهم وتتعامل معاهم وتربيهم عشان معش ايضايقوها اويديرو شي يأذيها ,
نوره : مادام كده من عنيا ,, شوفي ياست سناء ,,
وقعدت تحكيلها وسناء تسمع وبعد كملت نوره ابتسمت سناء ابتسامه واسعه ورقصت حواجبها لنوره وقالت : بااااس كده ياخاله نوره ,,خطرت عليا فكره واااو ,, حنلعبهم عالشناكل ,😁
هاجر : ونا معاك بس بطريقه غير نباشره وكأني مش داريه بشي ,😁
نوره : والله شكلك مش ساهله ياست سناء حتعملي في العيال ايه ? 😕
سناء وقفت وقالت : مش حنقولك يانوره مرات تحت التعذيب من العيال تعترفي وتخربي اللي بيسير 😉
نوره : يانهار مش فايت تعذيب !!😱
هاجر : 😂
سناء وهي بتطلع من المطبخ : بعد يسافر المعلم الكبير حنقولك يانوره ,,اوكي? 😁
ونوره شافت لهاجر اللي تضحك وقالت : انا مش مطمنه الصراحه,, هو انتي بتضحكي علي ايه بس ياست هاجر 😒
هاجر وهي تاخذ في السلطه : ابدا ,, بنشوف شن ادير سنيوه في العصابه ,, ليا زمان ماستمتعت الصراحه 😁
وقعدت أتقرض في السلطه ونوره اتكمل في العشاء وسناء قمعزت في الصاله وهي مبتسمه وخش ليث من برا القي الجو هادي العيال عالتي في وسناء مقمعزه عالصالون وراهم وقمعز جنبها بس في مسافه وجت شهد اتكركب قمعزت جنب باتها ,,
والجو مستقر وبعد وقت طاب العشاء وبدو ايتعشو وبعد كملو والعيال ركبو لغرفهم ,, وليث وسناء وعمته مقمعزين في الصاله ,ويتابعو في مسلسل سوري ,, مش باب الحاره عاد 😒 ومنسجمعين جا فون لليث وبعد كمل مكالمه قال : عندي سفريه عالفجر وحنغيب اسبوع ,
هاجر : وين هالمره ?
ليث : روسيا ,,مانوصيكمش عالعيال في غيابي واي حاجه تبنها وصيت السوبر ماركتكلمنه بالفون حيجيبلكم كل شي ,
هاجر : تمشي واتجي طيب يارب ,
ليث : معليش عمتي ممكن ماتسافريش لعمي نين انروح وبعدها نا بروحي انشيلك له ,
هاجر : انشاءلله ,,
والتفت ليث لسناء وقال: ممكن سناء اشويه في الدار ,
سناء انصدمت وقالت : هاه ,, اوكي ,
ومشا ليث لغرفة النوم وسناء نستغربه وشافت لهاحر اللي اتشيرلها امشي ورا راجلك ,, وفعلا لحقاته واول ماخشت لقاته مقمعز عالكنبه ,,وقربت وقالت : نعن ليث تبي شي ?
ليث وقف ونسك يدها وجابها قمعزت جنبه وطبعا سناء لنسة يده رغشت منها اول مرة اتحس باخساس وترها وارتبكت وبعد شافتلا ,
ليث : سناء ,,انا عارف اني ظلمتك لما تجوزتك وشرطت اعيالي عليك ,, وماعطيتكش فرصه وعارف ان اعيالي واعرين في طبعهم والمفروض خذيتك معايا سفرتك برا وعشتي حياتك وهضا اقل شي مفروض انديره لكي ,,بس ,... العمل مضغوط فيه ونتمنى تنسجمي مع العيال وتعاملي معاهم اذا غلطو وتبي نثق فيم وفي معاملتك معاهم ,, عارفه انتي ان هم خايفين من موضوع مرت الأب ,, وانتي متعلمة وواعيه ,ياريت تموني فهمتي عليا
سناء: اولا انا ماطلبتش منك شي ونا راضيه بالوضع الحالي واتفقنا انكونو اصدقاء قبل كل شي ثانيا اعيالم صاح طبعهم واعر الا شهد طبعا هذي عسوله واتهبل الحق ربي يحفظهالك ,,وتفرح بيها وبالنسبه لطبعهم خلي بيني وبينهم اكيد حنتفاهمو وكون واثق يوم مايتقبلونيش اولادك وانحس روحي فشلت معاهم مستعده نطلع من حياتهم وحياتك وعادي لو ربيت اعيالك بروحك ,,او مرات تلقا اللي يتقبلوها ,لعند ايجي اليوم هضا انا مش حنستسلم وحندير المستحيل عشان يحبوني ويتقبلوني ,
ليث بدون وعي وبصوت واااطي : اكيد حيحبوك ,
سناء : نعم ? قلت شي?
ليث : لا ابدا ,,مغير ياريت اتوسعي بالك معاهم وبعد انروح حنعوضكم بمفاجاءة ,,لكي وللعيال ,
سناء وقفت : انشاءلله وانت طيب ,
ووقف ليث ونزل شنطة سفر من فوق الدولاب وفتحها وبدا ايحط في دبشه وسناء حست روحها غريبه يالاه ففضلت تطلع من الدار واول ماسكرت الباب وقف ليث وشاف للباب وبان عليه الحزن وتنهد وقال بصوت واااطي: ااااااه ياسناء مش عارف ليش اضايقت لما قلتي نطلع من حياتكم ,, زعما تكوني الزوجه اللي حتكمل معاي ومش حتكره اعيالي وتعاملهم معامله شينه 😔
وكمل ترتيب دبشه في الشنطه وهو سارح وسناء خشت عالمطبخ وصبت عصير وشرباته وهي تخمم ,,وتفكر وهابا علي سنيوة بعد تفكر وتخمم 😁 وجا وقت النوم والكل رقدو وعالفجر ناض ليث صلى ولبس وسناء واعتها ريحة برفانه وشافاتها يلبس في كندرته ومنظرها كان ايهبل وهي واعيه شعرها نازل عليها ولبستها زي الاطفال وقالت : بتمشي توا ?
ليث رفع اعيونه القيها تحك في عيونها زي البيبي وشكلها طفلة مش زوجه ابتسم وقعد ايشوفلها وقال : صباح الخير ,, اسف كان واعيتك نحساب روحي مادرتش ازعاج ,,
سناء بعفويه : لا اصلا نضت من ريحة عطرك ,, ماسمعتش ازعاج منك ,
ابتسم ليث وقرب منها وهمس: مادام نضتي توضي وصلي الفجر بالمرة ,,لان فيها اجر مش عادي ,
وكان يحكي وايشوفلها وبسمة خفيفه علي شفايفه ,
سناء رفعت اعيونها لقاته قريب واعيونه عليها انحرجت وحست بالنفس بحح 😂 والوجه انحمر وانصفر ولاحظ توترها وحطت سناء يدها علي فمها وقالت : اوكي حنمشي ووا ,
وجت تجري ناحية التواليت ولفت لقت لية ناسك الشتطه وبيطلع وقالتله : بتسافر توا ?
ليث لف وجه ناحيتها وقال : نبي نمشي للمطار واكيد اول مانوصل الطيارة تطلع ,
سناء : تمشي وتجي طيب يارب ,
ابتسم ليث وطلع من الجناح وسناء زعلت بسفره وخشت توضت وصلت ,, وبعدها نزلت وخبطت جبهتها بيدها وقالت : حيييي ليث مافطرش اكيد ,
وخشت للمطبخ لقت نوره تشرب في فنجان قهوة ,
سناء : صباحو احلى نوره 😊
نوره بابتسامه : يسعد صباحك ياست سناء ياصباح الفل ☺ اكيده جهزتي سي ليث عشان سفرو ,,😊
سناء ارتبكت وهزت راسها بس ,وبدت اتجهز في الفطور وطبعا العيال كل حد ياكل في حاجه والطاوله تقعد معبيه شي مالح علي جبنه وحليب وشاهي وزيتون وشي كعك وحليب باجو والبي حليب نيدو واللي مربى وجبنه واللي كورن فلكس يعني خبر مخلط ,,
المهم سناء طبخت الدحي وطفت عليه وجهزت الطاوله مع نوره وخشت تغفا اشوي وراها حرب عاد مع المليشيا ,,😂
ورقدت وناضت لقتها ال6:30 وفاقت مشت غسلت وجهها وتوضت صلت الصبح وخشت عالعيال لقت شهد راقده في حضن شيماء خذتها بشووووااااااش وشالتها لغرفة هاجر وحطتها بشواش جنبها ,,وغطتها وهاجر فطنت ولاحظت سناء طلعت ابتسمت وحضنت شهد وباستها ورقدت وسناء خشت لدار نومها وغيرت دبشها بسروال سرتش اسود ولبست عليه تيشرت مشماشي هادي عليه رسمة ميكي ماوس وحطت وشاح مشماشي فيه رسوم زي الشريط علي راسها ودارت شعرها كعكتين قعد منظرها متظر وحده متشرده 😂 وخذت مغطة طنجرة كبيره معاها كاشيك ساقم وخشت علي دار العيال وبدت اتخبط بقوووة ومانحكيلكم علي وجوهم وهوم منفجعين ,,
سناء بصوت حرش : نوووووضو قااايله ياسنافر ,
شادي وهو منفجع وحط النظارات علي عيونه وقال : كنك شن في ?
سناء لوت فمها وطرمت شوربها وشافتلا بعيون مفنصات وخشمها فنش وقالت بلهجة الشباب : نوض ياغالي سادك نوم وراكم شغل واااجد ,, اليوم بالذات نبيكم مصحصحين يالااااااا ,😤
شاهين وهو ايشوفلها بغل قال : مش نايض نحن في عطله وانطولو ونحن راقدين ,
سناء خبطت اخرا بازعاااج وقالت : لا ياروحي ده كان زماااان ,,, توا نووو حتنوضو قبل الستة ونص وطبعا دايرتلكم برنامج صباحي طويل هيا منك ليه واللي مش حينوض مايلومش الا نفسه ,
وطلعت خشت علي شيماء ولقتها راقده وصبت جنب رلسها وهبطت بقوووة نين ناضت اتعيط ,
شيماء : عاااااااااا ياماماااا شن في 😨
سناء جت جنب وذنها وقالت بصوت عالي : نوضي ياحنه ياللاااااا توم للقوايا معش في هياااااا ,
شيماء : انا حنقولها لعميمه هاجر وانقولها لبابا ,
سناء بابتسامه : اصلا خذيت التصريح من عمتك هاجر ومن باتك ,, وماتحسابيش اني طيبه وبننسا انكم ولعتو فيا بالخط وللوح هيا خمس دقايق نلقاك غاسله ومصليه ونلقاك عالصفرة الفطور ,
وطلعت خشت لغرفة العيال لقت فارس وفرلس نايضين وشادي مقمعز في فراشه وشاهين راقد ,,طلعت وبعد 5 دقايق جت وهي جايبه سطل فيه مية من الشيشمه وكببب قجتها علي شاهين اللي ناض مفجوع ,
سناء بصوت عالي : هضا انذار المرة التانيه تلقا روحك راقد في الشارع هيااااااا ,😬
والتفتت علي فارس وفراس البي لصقو في بعضهم وشادي جا مصبي استعداد واعيونهم زارقات وقالتلهم سناء: عندكم خمس دقايق تجهزو ارواحكم والا مافيش فطووور ,
وطلعت وخلتهم منصدمين ,العرق المصري مع الليبي يشكل نوعية مخيفه مانحكيلكن 😁
شادي بصدمه : هذي من ? 😳
فاري وفراس مع بعضهم : مرت بوووك 😳
شادي : كنها تحولت ? اتحسها قعدت زي امر الجيش 😳
وناضو العيال يجارو بعد سمعوها اتعيط وتقول : 4 دقااااايق ياعصااابه ,
وشاهين ناض غصبن عنه ,
وبعد جهزو ارواحهم نزلو لقيوها مقمعزه وتفطر وتشرب في قهوة ,
شيماء: انتي من عطاك السلطه علينا عشان تتحكمي فينا ? نحن حنقولوها لبابا ,😬
سناء : احسن قولوها ,, عشان نكون الفايزه عليكم ونقعد معاكم غصبن عنكم وطبعا اللي يشكي لحد يعتبر خسران واعترف بخسارته ,
نوره اتصب في الحليب وتضحك ,ةمشت وهي عاحبها الوضع ,, جتها اللي تاخذ حقها من العفاريت علي قولها 😁
سناء بلهجة الامر : قمعزو افطرو لانكم محتاجين لطاقتكم اليوم ,
شاهين بغل : وشن بديري اصلا ?
سناء : افطر بعدها ساهل ,
وفطرو وهم يتخزرو فيها وهي اتخزر فيهم وكمل الفطور تخزير في تخزير ,,نين انحولت 😵
المهم بعد فطرو طلعت بيهم للجنينه ولقو .........
بعدين او بكره تعرفو شن لقو 😉
في حد داعي عليهم العيال هاضوم,, سناء بتجننهم 😂
حسهم وجعوني ,,,من توا ,,
توقعاتكن نعموشاتي 💋
لو في اخطاء املائية اسفة جدا ،، الكيبورد مش مساعد
#Hamelo ✒
