رواية #نا_وضنوة_راجلي
الحلقة (السادسه)
وصلنا لعند سناء وليث روحو لفيلا المزرعه اللي فيها الضنوة وعمته هاجر وطبعا بطلب من سناء لانها ماتبيش اتعيش كذبه معاه علي اساس عرسان وهم اتفقو يبدوها اصدقاء فحبت تتعرف علي اعياله وتبدا اتعيش معاهم طبيعي وهضا قرار حتندمي عليه ياسنيوه 😁
المهم اول ماوصلو ووقفر عالباب وليث بيفتح الباب سناء طبت علي راسها كرة قدم وعيطت ,,
سناء: ااااااه ياربي ,, شنو في?
ليث شاف لفوق ماشاف حد بس شك وقال : معليش سناء اكيد العيال يلعبو بيها وماشافوكش ,,
سناء تعابير الالم علي وجهه وتملس علي مكان الضربه وقالت : لا عادي ,, اعيال اكيد ماشافونش ,
وطبعا فتح وخش هو وياها وطبعا في اللحظه هذي عند السنافر ,
شاهين : زي مااتفقنا ,, ماحد يحكي معاها بكككل ,, وقدام بابا عاملوها كويس فاهمين ,
باقي الشله : فاهمين ,
شيماء: تمنيت عزقت عليها صندوق ولا خيطه كبيرة مش كورة ,😬
شادي : بشواش علي روحك عصبيتك هذي مرات تكشفنا فمثلي بدورك زي ماتفقنا ياشيماء راك تفضحينا ,
شيماء تنهدت وقالت : اوكي خلاص هيا خلوكم مستعدين لان بابا حينادينا او يجيبها لنا ,
وفعلا قعدو يخططو ويتفقو علي سناء وهي ماجايبه علم وين زرطت روحها 😁
وعند سناء وليث تفاجأت هاجر بيهم مروحين وقربت سلمت عليهم وقالت : غريبه حبايبي مروحين ,, ليش ماقعدتو في الفيلا ايام ,?
ليث : سناء هي اللي اقترحت نبدو انعيشو مع بعضنا عادي بدون رسميات ,
هاجر انقهرت من عمل ولد خوها وقالت : مهما كان ياليث انتم عرسان جداد وسناء عروسه لازم ترتاح وتدلع ايام تعريستها ,باهي ليش ماتسافرو برا ?
سناء لاخظت ليث جامد وقرن حواجبه وقالت : مافيش داعي ياعماي هاجر ,,, انا وليث مبارح تفاهمنا واتفقنا انعيشو عادي ,,اساسا انا وافقت نجوز ليث وهو بعايله فاكيد عندهم حق عليا ولازم نبدا واجبي اتجاهم ,,
هاجر وجعتها سناء وفكرت ان ليث ممكن معاركها امبارح وشارط اعياله عليها بالقوة وحبت اتغير الموضوع ,,
هاجر : اوكي خشو لغرفتكم جاهزة فوق ولو انها عاديه مش زي غرفتكم.اللي في المزرعه ,, بس اهم شي ترتاحو ,, وحنبدا في الغدا نا والخدامه عشان اتكون اول لمة مع بعضنا ,
ليث هز راسه بمعني اوكي وعمته مشت والتفت علي سناء وقال : شن رايك انعرفك عالعيال توا ?
سناء ابتسمت وقالت : ياريت ,
وفعلا ركب لفوق وخلا سناء في الصالة مقمعزة عالصالون وترجا ,, وبعد 10 دقايق نزل وقال : خمس دقايق ويكونو جاهزين ,
سناء خست بشعور غريب وقلبها بيبلط من مكانه فتنهدت وقعدت مبتسمه وعقلها كل مرة يقوللها في راي وهي خايفه من مقابلتها للعيال وبعد أشوي سمعت صوت كنادرهم من عالدروج نازلين وكأنهم عسكريه ,,سناء بينها وبين روحها قالت ( ياساتر هاضوم اطفال ولا جنود كنهم يمشو هكي ,? 😕)
استني ياشابه مستعجلة علي قدرك لييييه ملو حيباااان 😁
المهم وقفت ولفت ناحيتهم وهي تنصدم بست اطفال وقعدت مفنصه وفاتحة فمها وحواجبها مرتفعات من الصدمة معش تكلمت وليث بدا ايعرف فيها علي انتاجه 😁
ليث : انعرفك علي اعيالي هذي شيماء وعمرها 11 سنة وهي اكبر اولادي وبعدها شاهين وعمره 10 سنوات وبعدها شادي وعمره 9 سنوات وبعده فارس وفراس توأم طبعا زي ماشايفه وعمرهم 7 سنوات واخر العنقود عندي شهد عمرها 3 سنوات وهد المبيده عاد مانحكيلك ,ياولاد هذي سناء زوجتي الحديده وحتكون امكم ,,وياريت تتقبلوها وترحبو بيها وتكونو صداقة معاها ,
العيال شي ولا واحد فتح فمه بكلمة مفيت ايتخزرو فيها وهي اتشوفلهم من شيماء لشهد وترد اخرا من شهد لشيماء ,, قرب منها ليث وهمسلها : كنك ياسناء كأنك مصدومة في عيالي ولا شنو ?
سناء فطنت لروحها وسكرت فمها وبلعت ريقها ورمشت بعيونها كم مرة وقالت بتوتر ملحوظ: لا مش قصدي ,,بس ..ماتوقعتش ايكونو .... يعني احسبتهم مش اكثر من 3 الحق ,😓
ليث قرن حواجبه وقاللها بصوت ماحد سمعه الا هي : تبي تفهميني انك ماعندكش علم ان عيالي ستة اشخاص ? وعمتي ماحكتلكش ?
سناء ارتبكت وحست بروحها تسرعت وقالت : لا مش قصدي بس بسلامتهم ماتوقعتش اعمارهممن 11 ماشاءلله ربي يحفظهم ,,.لان ماحد حكالي انهم من 11 سنة ولوطا بس وعادي يعني عليش متحسس اهو تعرفت عليهم وانشاءلله معرفة خير ,
ليث شافلها بشك وخوف ,,وهز راسه وقال: تعالي ورايا انوريك غرفتك ,
سناء ابتسمت بطفوليه وليث عطاهم ظهره ومشا وسناء تبي تلحقه شافت للعيال وابتسمت وهم كل واحد دارهلها حركه متاع داعش اللي هي بنذبحوك 😁 واللي دارلها قبضتين بيده ويفنصو فيها واسنونهم يعضو بيها علي بعصهم ماعاد شهد اتشوف لسناء بطفوليه وحاطة صبعها في فمها وسناء انصدمت من تعابير التعديد واول مالحقت ليث ومسكت في يده لف عليهم شافت للعيال لقتهم يبتسمو ويشيرولها بباي 😂 بيهبلوها حي عليها ,,,
المهم وصلت هي وليث لغرفتهم وخشت وهي منفجعه رسمي من تصرفات العيال وليث لاحظ توترها وقاللها : انخليك ترتاحي وتغيري دبشك واذا تبي تاخذي دوش التواليت هنا ,,وبالنسله للعيال عارف معاملتهم جافه ,,لكن لازم تصبري عليهم هاضوم اطفال ,,ومازالو مايعرفكش ,ولازم تفهمي ان اي طفل مايتقبلش اي حد في مكان امه ,
سناء ابتسمت وقالت بتوتر : ماتشيلش في بالك عارفتهم اطفال واميد ماحد ياخد مكان امهم وربي يقدرني ونحاول نكسب ثقتهم عالاقل نكونو اصدقاء ,,
ليث ابتسم علي كلامه وقال : شكرا لتفهمك.,,
هزت سناء راسها باوكي وطلع لية وسمر الباب واول ماعرفت انها قعدت بروحها قعدت تندب 😂 وتقول بصوت واااااطي : حي عليا ناااا شن درت في روحي ياربي هاضوم مش اطفال ,,تي هددوني بيذبحووووني ووك ووك شن اندير نا توا ? عاااااا عويششششه وينك ? 😭
وخشت للتواليت هذت شاور ولبست فستان احمر مخصر بحزام ذهبي وكان طويل للكعب وكمبدي للمرفق وجففت شعرها وحطت مايكب خفيف وتعطرت وتنهدت واول ماجت بتطلع طلعت راسها قبل وتلفتت يمين ويسار وطلعت من الداروهي نازله من الدروج شافتهم مقمعزين جنب باتهم ويهدرزو ويضحكو معاه وهو حاضنهم ويبوس فيهم وشهد في حجره وماسكه طرف كيكه تاكل فيه وكان منظره معاهم ايهبل ونزلت وهي منجذبه لشكلهم وقداااش حاسه بفقدان حنانهم لامهم لانها زيهم فاقده امها وهي في سن صغيرة وشعرت بنغزه في قلبها واول ماقربت منهم جت هاجر وقالت :سنيوه تعرفتي عالسنافر ? ,😊
سناء : طبعا ,, وبصراحه ايهبلو كلهم خصوصا شهد اتهبببل اتخطر عليا في بنت خويا الصغيره واسمها سلسبيل انحبها موووت ,
هاجر : تسلمي ياسنيوه واناي تهبلي وربي يحفظك ويشرح صدرهم ناحيتك ,
وهمستلها ( مغير وسعي بالك مااهم بس )
سناء هزت راسها وقمعزت جنبهم وبعد وقت جهز الغدا واتجهو للطاوله بيتغدو عليها واتجي شهد قمعزت جنب سناء وشادي علي يمين سناء واول مابدو في الغدا .............
توقعاتكن شاركوني عاااد 😐 وماتقولنش قصيرة الضي والنت جابولي حاله خفتهم ايقصو ,, بلة ريق هير من بلاش 😂😁
قراءة زاااايطه 😉😘
#Hamelo ✒
