رواية #نا_وضنوة_راجلي من تأليفي #هميلو 💚
الحلقه (16)
وصلنا لعند ليث خذا سناء قبل وقت الغدا ,,وطبعا شافها محمود وشافاته بس عطاته نظرة قهراته بيها وابتسمت للية اللي طلع بيها شور شركته وطول الطريق وسناء تهدرز عادي مع لية نين وصلو للشركه ونزل ليث وسناء اللي تفاجأت بشكل المبنى الراقي وشباب الأمن اللي برا وواحد منهم قرب من ليث وحياه وخذا منه مفاايح السياره عشان يركنها في مكانها في المرأب ,, وسناء نش واخذه عالجو هضا ومسكت ضحكتها وخشت معاه وطول مشبتهم الموظفين ايحييو في ليث وهو ايرد بهزة بسيطه من راسه وسناء تقصقص واتشوفلهم وهن ايشوفولها باستغراب ,, ووصل ليث بسناء لمكتبه وفتحه والسكرتيره جت واقفه وحياته وليث بعمليه قاللها : جيبيلي ملفات شغل اليوم وابعثيلي المهندس يوسف بسرعه ,
السكرتيره بدلع : حاضر استاذ ليث ,,
وسكر باب المكتب وخش القي سناء اتشوف للمكتب بانبهار ,
ليث : شن رايك في المكتب ?
سناء باعجاب : ماشااااءلله يخبل ,,مش عادي الحق ,, والشركه ملها علي بعضها تبارك الله ,,خيال كاني انشوفي في شركه من شركات الاتراك ,
ليث ابتسم وقمعز عالمكتب وقال : قمعزي تريحي ,, وخطرها اليوم نا وياك غدانا برا يعني نكمل شغلي عالسريع وننشو لاي مطعم نتغدو فيه ,
سناء ابتسمت وقالت : واااو واخيرا حنتغدا في مطعم ,,بس تعرف مفروض خذينا معانا العيال ,
لية قرن حواجبه وقال : عليش ? المفروض تفرحي انك بتتغدي معايا بروحك ,
سناء : اكيده فرحانه ,,بس ماننسش اني تجوزتك وعندك اعيال يعني مسؤولين مني ,, والحق خايفه يزعلو مني وياخذو مني موقف نا ماصدقت استرطبو معايا اشوي ,😒
ليث ضحك وقال : هههههه لا من ناحيه استرطبو فهم اكيد استرطبو كان مش بالطيب أكيد غصبن عنهم 😂
سناء لوت شوربها وقالت : اضحك اصلا مش انت اللي قبل صارلم زي توم اللي مع جيري ,, ولعو فيا قبل القيت روحي طالعه من المجال الجوي 😒
ليث ابتسم وحط ايدبه عالمكتب وقال : وليش ماهليتيني انعاقبهم مادام قبل طلعوك من مجال الارض ?
سناء تنهدت وقالت : اصلا مانبيش انزيد يكرهوني اكثر نا نبيهم يتقبلوني حتى لو ماحبونيش هم في الاخير اطفال وعنري مانلوم عليهم تصرفاتهم متوقعه منهم ,,
وفي اللخظه هذي خبط الباب وخشت السكرتيره تتفصع وهي لابسه بدله رسميه نسائيه قونه وبلوزه وفوقها جاكيت لونهن اسود ووشاح ليمرا ابيض من نفس لون البلوزه وتص الشعر باين اصفر بالرغم انها مش بيضا بس عاد شن اتقولن والوجه اتقول عرس ولد مسؤول 😒 وقربت من كرسي ليث وحطت الملفات وقالت :تفضل استاذ ليث هذين ملفات شغل اليوم وعقود العمل ,,
ليث : تمام ,
السكرتيره : والاستاذ يوسف خمسه وايكون عندك ,
ليث بعمليه : اوكي ,,
السكرتيرة وهي قريب تلصق في كتف ليث وسناء قبل ازقبت عليها عفجتها طريحه معتبرة ,,وطبعا لاحظت تجعوينها وحركاتها الرخيصه وقالت السكرتيره : تأمر بأي شي ثاني استاااذ ليث ?
ليث وهو يتصفح في الملفات اللي قدامه : لا شمرا تفضلي علي شغلك ,, وسوفي الندام شن تحب تشرب ,
السكرتيره هضا وين رفعت راسها بتشوف سناء وانصدمت من نظرات سناء لها وهي قريب تهجم عليها اتقول لبوة مفترسه ,, وخافت من نظرات سناء القويه فقربت من مرسي ليث اخرا وقالت بصوت يقققققهر ,,: المدام شن تحب تشرب ?
سناء حطت كراع علي كراع وشافتلها برفعة حاجب وقالت بصوت انثوي دلوووع يبنج : ياريت واحد كابتشينو يامزمزيل ,,
والتفتت علي ليث وقالت : وامتي حبيبي شن نحب تشرب ?
لية انصدم بعد سناء حكتلا هكي وشافلها وهو سارح بعيونها وضحكتها وعاودت سناء تسأل فيه تحت نظرات السكرتيره المنصدمه وقالت سناء : اكيد قهوة وسط ولا ?
وشافت للسكرتيره وقالتلها : اوكي مزميل واحد كابتشينو وواحد قهوة عرببه وسط لو سمحتي ,
السكرتيره شافت لليث اللي من جوا حس بفرحة مش عاديه والتفت عليها وقال : اللي قالتلك عليه الندام لو سمحتي ,
السكرتيرة في اللحظه هذي اتبزنها بابره ماتطلع منها نقطة دم 😂
المهم طلعت وهي تفنص في سناء وسناء تشوفلها بابتسامه لعتد طلعت الحلوة وليث لاحظ نظرات سناء للسكرتيره وعرف الموضوع فيه غيرة حط يده علي حنكه وقرن حواجبه وقال لسناء : شن قلتي بدري اشوي ?
سناء لفتلا وهي عارفه شن يقصد بس ضربت الحوله وقالت بعفويه : عادي طلبت قهوة لكي وليا ,,غلطت ?
ليث هز راسه بلا وقال : ابدا بس قلتي كلمة مش عارف اذا سمعتك صاح ولا تخيلت ,
سناء غيرت الموضوع وقالت: شركتك تبع هندسة شنو بالزبط هتدسه واعمار ولا شنو ?
ليث عرفها تتهرب فقال : كل مايخص الهندسه والاعمار والديكور تختص بيه شركتي ,
سناء بفخر : حتى نا تخصصي هندسة ديكور وطلعت الثالثه علي دفعتي ,,
ليث بأعجاب : ممتاز ,, لكن ليش مااشتغلتي بيها شهادتك ?
سناء : ظروف ,, واصلا مادورتس عمل الحق ,
ليث شافلها وفي اللحظه هذي خبط الباب وخش المهندس يوسف ووراه عامل الكافي جايب القهوة والكاباشينو وخطهن وطلع ,
يوسف سلم علي ليث وقال : وينك امس واليوم ياباشمهندس ?
ليث بابتسامه حاول يخفيها علي سناء بس لاحظتها : ابدا شوية مشاغل هكي ,,ها شن صار معاك ?
يوسف : كله تمام ووافقو علي شروط العقد ووقعوهن ,
طبعا سناء بعد خش يوسف وقفت وقمعزت عالكنبه ماحبتش تحرج ليث او تعرقز شغله ,,
ليث : ليوسف : باهي توا شن ناقص ?
يوسف : بصراحة المهندس محمد واللي معاه ماصارش منهم في نوضوع الشغل اللي ملفناه بيه وتحجج ان المكان ضيق وتفصيلته مش مساعده ومايقدرش ايفصل ديكور مناسب والزبون اللي يبي الشغل هدد انه يدور واحد ثاني يتعامل معاه ,
ليث : فوت المهندس محمد توا ودور واحد ثاني ,
يوسف تنهد وقال : صعب الوقت ضيق واللي تكلمه يقعد يشرط شن رايك تتكفل انت بالموضوع انت احسن واحد يفهم فيه شغل الديكور ,
ليثحط يده علي حنكه وفمه وقعد يفكر وشاف لسناء القيها اتشوفله ونظرة حزن بانت في اعيونها وبعد شافاته شافلها نزلت اعيونها لوطا واشغلت روحها بكوب الكابتشينو وقعدت تشرب فيه ,
ليث ليوسف : تمام عندي الموضوع جيبلي اوراق العنل الخاصه بيه ,
يوسف : تمام ,, واسمحلي توا ,
ليث : قبل ماتمشي نبيك اتعرف علي المهندسه سناء ,
وشاف يوسف لسناء وابتسم طبعا لاخظها بس لما ابتعدت عن المكتب ماحبش يحرجها وقعد يحكي كع ليث ,
يوسف : اهلا وسهلا ياباشمهندسه سناء ,
سناء بعملية ردت السلام ددون ماتمد يدها وقالت: اهلا بيك ,
ليث : طبعا المهندسه سناء حتكون النسؤوله عت مشروع الديكور لانه تخصصها ,
يرسف اتصدم وبانت الصدمه في عيونه وزاد ليث وقال : وطبعا هي المدام يايوسف ,
يوسف معش تكلم امفيت قال : مدام حضرتك ,,?
هز ليث رايه باها وحياهم يوسف وقال : شرفتينا يامدام سناء ,, وانشاءلله معرفو خير ,
سناء : تسلم شكرا لذوقك ,
وطلع بعد اتفق مع ليث وسناء مش اقل صدمة من يوسف اللي طلع وقالت وهي منفجعه: انت شن درت ?
ليث : عادي ,,انتي مهندسة ديكور وحبيت نختبر شطارتك ,,
سناء: بس انا ماعمريش اشتغلت ولا عندي خبرة ,
ليث : كل شي له اول مرة ,, واذا تبي تشتغلي بشهادتك فانا انحب نعطيك الفرصه عذي ,
سناء شافتلا والدموع بدن في اعيونها يرقرقن وليث يحسابها زعلت ووقف واتجه ناحيتها وقمعز جنبها ومسك ايديها بين ايديه وقال بصوت حنون : سناء انتي زعلتي مني?
سناء هزت راسها بلا وكانت اتشوفلا ,,
ليث : كنك ياسناء عليش تبكي ? اذا ماتبيش عادي خلاص ماتحطيش في بالك ,
سناء بصوت يرجف : لا مش هكي نبي نشتغل وخاطري من اول ماتخرجت ونا نبي نشتغل بس.. بس ربي ماكتبليش يعني ,
ليث ابتسم وقرب منها وقاللها : فجعتيني ,, يعني هذين دموع فرحة ? باهي معناها كويس اني جبتك معايا وعرفتك عالشغل والشركه ,
سناء ابتسمت وشافتلا واعيونهم علي بعضهم هو سارح في اعيونها المليانه براءة وطفوليه وهي سارحه باعيونه الجذابه السودا ونظرتها اللي مليانه حنان وحب ,, وقعدو سارحين ابعضهم وتندلش عليهم السكرتيرة نين قبل طارو ,,😁
ليث تنحنح وسناء شافت للسكرتيرة بغل والسكرتيرة انقهرت وقربت من ليث وقالت. اسفه عالازعاج استاذ ليث بس المهندس محمد اتصلت ببه مرة ثانيه بطلب من مهتدس يوسف ورفض انه يجي وقالي ان شروط عقده تحتاج تعديل ,
ليث وقف ومد يده لسناء اللي مسكت بيده بدلع وكانت نظراتها للسكرتيره تسحن 😂 وقال ليث : فوتيه هو الخسران ,,اصلا عندنا مهندسه جديده حتمسك المشروع ,
السكرتيره : اوكي ,, تحب نوصيلك علي غدا تتغدا لان استراحه الغدا بدت ,
ليث : لا مافيش داعي حنتغدا برا انا والمدام وقولي ليوسف يكمل عني اليوم وبجهزلي تقرير بالشغل ,
وخذا مفتاح سيارته ونظاراته وطلع وسناء ماسكه في يده ,,طبعا عاجبه الوضع عمكن ليث وسناء تبي تقهر السكرتيره وخلاص وليث عاجبه جو الغيرة وطلع بيها وركبو في السياره ومشو للمطعم بيتغدو واول مرة سناء اتحس باحساس انها مهمه عند خد ومتجوزه ووراها سند ,, المهم عند السنافر بعد حذتلهم نوره الغدا ومعاهم هاجر وبدو يتغدو ,
شيماء : غريبه بابا اليوم ماجاش تغدا معانا !! 😕
هاجر : اميده عنده شغل حبيبتي تغدي انتي ,😊
شاهين : بابا حتى ولو شغله واجد بثيجي يتغدا معانا يوميا ,,عمره ماسيبنا انتغدو برواحنا ,😒
هاجر طبعا عندها علم ان ليث ماشي لسناآ وهي اللي اقترحت عليه ياخذها ايتغدو برا مع بعضهم فقالت : ياحبيلي ياشاهين ,,بابا شغله واجد وبعدين مش يسافر بالاسبوع والاسبوعين ونتغدو مع بعضنا بدون بابا ?
فراس: اكيد ,, بس تبو الحق رايفت علي سناء 😁
شيماء : بصراحه هي مش بطاله
شاهين بعصبيه : عي مازالت تمثل عليكم ماتصدقوش حركاتها اصلا نا عارف كل اطروحها 😠
هاجر : عيب شاهين ليش تحكي هكي ? وبعدين سناء طيبه وحنونه لانها حتى هي امها ماتت وهي صغيرة زيكم ,, واكيده حاسه بيكم ,
شاهين وقف وقال بصوت عالي : انا مايهمتيش هي شنو وميف عاشت انا يهمتي انها خذت مكان ماما وتبي تاخذ بابا منا ,,ومستحيل نسمحلها بهكي ,
وطلع يجري عالدروج وخوته ايشوفوله ولعب الشك في اعقولهم وشيماء قرنت حواجبها وتنكدو عالتغدايه ,
هاحر : تغدو سلم اعويلتي شاهين واعر من يومه ربي يهديه هيا كملو وكالكم عشان بابا مايزعلش منكم ,
وقعدو العيال ياكلو وتغدو ومر الوقت وروح ليث وسناء واستقبلتهم نوره اللي جايبه فنجان شاهي لهاجر في الصاله وخشت سناء سلمت علي هاجر ونوره وقمعزت تهدرز معاهن شوي وليث معاهن وبعدها ركب ليث لعياله بيطمن عليهم القي شهد راقده وباقي العيال مجتمعيت وباين عليهم الغل والحيرة والقهر ,,
ليث : انشاء لله ملتمين عالخير ,,حبايب بابا فيش يفكرو ? 😉
شيماء جت حضناته وقالت : بابا كنك ماجيتش تغديو معانا اليوم?
ليث ماحبش ايقوللهم تغديت برا مع سناء فقال : كان عندي شغل واجد وبعد جبت سناء من حوش هلها وروحت ,
شاهين بغل واضح : وليش ماخليتها في حوش هلها نحن مانحبوهاش ,😬
وهنا خشت سناء وهي تبتسم وقالت : لاني ماخسرتش ياعيني عشان نقعد في حوش هلي ,, لعند توا نا اللي فايزه عليكم في لعبتكم ولا ?😉
ليث شافلها محتار وسناء غمزتله وقالت بهمس : ماتحطش في بالك لعبة بيني وبينهم ,
وليث وقف وقال لعياله : هيا حبايبي عارفكم زعلانين مني بس الله غالب شغل عاد ,وتوا انخليكم ترتاحو ونا نبي نرتاح مانبيش مشاكل فاهمين ,!?
العيال هزو روسهم باوكي وسناء عرفت ان في معركه ثانيه بتخش عليها لان العيال مازالو حاطينها في روسهم وخاصة شاهين ,, فقالت بعد طلع ليث : شن رايكم بعد العصر اتخشو معاي للمطبخ واتساعدوني انديرو تورتا ?
فارس وفراس وشادي وشيماء فرحو وقالو : اوكي ,
شاهين قعد ساكت وقارن حواجبه وايشوفلها بغل ,
سناء قربت منه وتنهدت وقالتله : افرديلي زومتك والنبي,, خطرت عليا وجه دامبي كان تعرفه ?! 😁
شاهين : علي اساس انتي تشبهي كارينا كابور 😏
سناء شافتلا وقالت : لا الحق كارينا اعيونها خضر لكن انا نشبه لروحي وبس سنااااء وصدقني اكسبني خيرلك ,, صديقه قويه لك خير من عدوة شرسه راه 😌
شاهين وقف وقال : انتي مرت باتي ومرت البات ديما شريره وانتي اكيده مش حتكوني طيبه ,
سناء تنهدت وقالت : فكني من جو سندريلا الله يربحك وبعدين شوف لصوابع يدك اذا هن طول واحد وزي بعضهن معناها كلامك مزبوط وتوا فكر في كلامي نبي نجهز روحي نا والشله انديرو مع بعضنا ,
وطلعت هي وخوته وقعد ابروحه واذمر امه وقعد ايشوف لصورتها وقال بصوت واطي : عليش سيبتينا ياماما ? نيك انتي نا مانبيش وحده تاخذ مكانك ,💔
وقعد يذكر في كلامها وحنانها وقعد يبكي ,
اما سناء فقررت تكسب حبهم واولهم شاهين باي طريقه وخشت لدارها غيرت دبشها بتوته حلوة ورديه ورفعت راسها بكعكه حلوة وخشت للمطبخ ومعاها العيال وبدت اتحط في مكونات التورتا ونوره اتفرج عليها ومستغربه في العيال كيف يسمعو في كلام سناء وقالت لروحها (العيال شكلها كيوت وهي زي القطط كده اومال عاملين عليا مافيا ليه ? )
ونزل لية القي سناء حايسه ومعاها العيال وكل واحد ايدير في حاجه وقمعز جنب عمته اللي حكتلا انها تبي تمشي لخوها وفي اللحظه هذي رن الجرس متاع الفيلا ومشت نوره فتحت لقت ...........
بعدين بعد الواحد حنزل وحده ثانيه للسهرانين ,,توقعاتكن 😘
قراءة ممتعه 💋
#Hamelo ✒
