REBIRTH OF A LAZY YOUNG MASTER [ ZHANYI ]

Chapter 1 : Am I reborn gain?

[ Unicode ]

Chapter 1 : Am I reborn again?

မျက်လုံးများကို အားယူဖွင့်လိုက်တော့ ကျွန်းသစ်ရောင် မျက်နှာကျက်အား ဦးစွာတွေ့လိုက်ရသည်။လေးဘက်လေးလံက စူးရှလှသော အလင်းရောင်ကြောင့် မျက်လုံးများအား ချက်ချင်းမှိတ်ချမိသည်။ထိုအလင်းရောင်ကို ကျင့်သားရသွားမှ အခန်းပတ်ပတ်အား စူးစမ်းကြည့်လိုက်​၏။ရင်းနှီးနေသော အခန်းအပြင်အဆင်ကြောင့် ရိပေါ်ရင်ထဲ ဝုန်းခနဲအသံပင် မြည်သွားသည်။

သူ သေသွားတာ မဟုတ်ဘူးလား?
ဆေးရုံမရောက်ဘဲ ဘယ်နှယ့်ကြောင့် ဒီအခန်းထဲပဲ ပြန်ရောက်နေတာလဲ?

မဟုတ်မှလွဲ အဲ့ဒီလူကြီးက သူ့ကို ဆေးရုံမပို့ဘဲ အိမ်ကိုပြန်ခေါ်လာတာလား?

ထိတ်လန့်မှု၊စိုးရွံမှုနှင့်အတူ ကုတင်ပေါ်မှ အလျှင်အမြန် ထလိုက်သည်။အံ့ဩစရာကောင်းသည်မှာ သူ့တစ်ကိုယ်လုံး နာကျင်ကိုက်ခဲမှုကို မြူတစ်မှုန်မျှ မခံစားရပေ။

သူ ကားတိုက်ခံလိုက်ရတာ မဟုတ်ဘူးလား​?

ဒါမှမဟုတ် ကားတိုက်ပြီးပြီးချင်း ကောင်းကင်ဘုံကိုများ တန်းရောက်သွားလေသလား?

မဖြစ်နိုင်ပေ။
အကယ်၍ ကောင်းကင်ဘုံကို ရောက်သွားလျှင် သည်လို အကျဉ်းထောင်လိုမျိုး နေရာသို့ နောက်တစ်ကြိမ် ပြန်ရောက်စရာ အကြောင်းမရှိ။

ရိပေါ် သတိကြီးစွာထားပြီး အခန်းပတ်ပတ်လည်အား ဂရုတစိုက်ကြည့်လိုက်မိသည်။အရာအားလုံးက သူ့နေရာသူ၌ ရှိပြီး ပုံမှန်ပင်။

ဤအခန်းသည် သူနှင့်ရှောင်းကျန့်တို့​၏ အခန်းဖြစ်ပေသည်။အခန်း​၏ အကျယ်သည် အိမ်တစ်လုံးစာလောက်ပင် ရှိတာကြောင့် သူနှင့်ရှောင်းကျန့်တို့ လက်ထပ်ပြီးချိန်တွင် သည်အခန်းထဲ၌သာ အတူတကွနေထိုင်ကြ​၏။

အခန်းအတွင်း မည်သူမျှမရှိသဖြင့် ရိပေါ် ရေချိုးခန်းဘက်သို့ ထွက်လာခဲ့သည်။သူ့ခန္ဓာကိုယ်ပေါ်၌ ဒဏ်ရာရှိမရှိ စစ်ဆေးကြည့်ရန် ဖြစ်သည်။မှန်ရှေ့သို့ ရောက်သွားသည်နှင့် မှန်ထဲကလူ​၏ အပြာရင့်ရင့်ဆံပင်တွေကြောင့် ရိပေါ် မျက်လုံးများပင် ပြူးကျယ်သွားသည်။