شعر شعبي

الليله اخيره

‎جنها الليله اخيره وباجر افراك
‎الحب مو كوه بس الفركه كوه
‎بعد ياهو اليكلي شبيك زعلان؟
‎ويشاقيني ويكلي دموعي تسوه
‎وبعد ياهو اليكلي شبيك مهموم؟
‎ويحسسني حتى احزاني حلوه
‎ياهو من الرسايل يدري مخنوك
‎المن اتعب ضحكته تصير تجوة
‎ياهو يحل مشاكل دنيتي وياي؟
‎ياهو لتضحياته يروح فدوه؟
‎اليسندني ويقويني على الاحلام
‎ودرب احزاني يصير يمه خطوه
‎اليهتم بيه حتى وهو تعبان
‎مريض وخاف لا تلمسني اذيه
‎مو بس كلبه احسه بكلشي وياي
‎جان يشيل خوف امي عليه
‎عود يسد وجوده انسان؟هيهات
‎وابد ماعندي هاي القابليه
‎اللحظه العابره اذكره وياه
‎التفاصيل الابد مو منطقيه
‎على هذا الحجي ما اطول اسبوع
‎لان تكتلني ذاكرتي القويه
‎راح اشتاق لروتيني وياك
‎بطريقة حبك وذاك اهتمامك
‎المشاكلنه السهرنه الغيرتي عليك
‎لنبرة صوتك ولهجتة كلامك
‎تزعل وانت فارض احترامك
‎اه يل تختلف حتى بسلامك
‎تهددني تروح ايام وشهور
‎وبحبك وحده تنسى انتقامك
‎جنها الليله اخيره وباجر فراك
‎اخر رساله اللك بجروحك اقراها
‎واتخيلك تختنك وتعيش وياها
‎انا ادري موقف صعب
‎لا هو حب لا هو حرب
‎وهاي اهم ذكرة الك مراح تنساها
‎منه وجاي تعيش مكسور
‎والمشكله ما رحت مجبور
‎وهذا الفراغ العايش الدور
‎جر اذنه كله الدنيا ناعور
‎اخر رسالة اكتبها واتلوه
‎واخر وصية الك احجيها بلكوة
‎بالك تثق بدرب مابي الك  اي خطوة
‎وبالك تضحي لوطن ما يفهم الفدوه
‎اخذ الحجي ولم دمعك ونام
‎وباجر اذكرك بيه الايام
‎اذكرني من تبتسم ومن تحزن انساني
‎ما اضن نرجع سوه بس لا تحب ثاني❤️

كلمات الشاعر محمد الطالقاني#