انتقام عائلتي

الحلقه 10

#للكاتبه_ژوژو_الطشهه❤‍🔥

#انتقام_عائلتي

#الحلقه_10

#لايك_قبل_ما_تقري_وتعليق_بعد_تكملي❤‍🔥

في حاجات قبل لا نبدا الحلقه نبي نوضحهن يا بنات ♥️

أول شي أنا والله عارفه تفاعلكن السمحح لي الروايه وتحمسكن وتعليقاتكن الحلوه وتشجيعكن ليا وفرحانه بالشي هدا بس في نفس الوقت يا بنات نبي نوضحلكن نقطه والله الحلقه تاخد مني حوالي ساعتين ونص ومرات توصل 3 ساعات انتن تحسابن الكتابه ساهله والله صعبه رآه كل حلقه نفكر شن نحط ونجمع الأحداث وغير الكتيبه والأخطاء الاملائيه نحاول نركز عليهن والله نوصل لل 4000 كلمه وانا نكتب بدات في رمضان مافيش وقت بكل وانا نكتب فيها الحلقه في نفس اللحظه يعني ما نقطعش قصدي نكتبها ونكملها مش نكتب ونوقف لأنه ما عنديش وقت بس نشوف في وحدات يقوللي زيديلنا حلقه اضافيه ونزليلنا حلقه آخرى أنا عارفه إنكن حبيتن الروايه بس الي بنوضحه لكن أنا الروايه مش واتيه فهمتن يعني نكتب وانزل وانا قبل بنديرها 10 حلقات بس بعدها قلت نخليها 15 احسن لانه والله ما عنديش وقت بكل ♥️
****
ثاني شي يا بنات نبي نوضح حاجه أنا الروايه أنزل فيها ع الواتباد وع الفيس وع الواتس ع الفيس فيه قروبين اسمهن
واحد اسمه
(روايات ليبيه )
والثاني
(روايات ليبيه واقعيه )
هدين أنزل فيهن في الروايه وعندهن مسؤولين يطولو عشان يوافقو ع الحلقه ما يوافقوش عليها طول لذلك البنات يحسابن التأخير مني انا 10 ونص تكون نازله ومرات قبل ال 10 ونص الخلاصه خشن لي قروبي الأصلي والوحيد اسمه
(قروب روايات ژوژو الطشهه الاصلي 📝❤️)
هك بالضبط ديرن نسخ يطلعلكن طول ❤️
******
ثالت شي واخر شي  في وحده قالتلي مش قلتي سجى ماشيه لي أوروبا قريب 5 مرات كيف مش عارفه اللغه يا بنات في فرق بين إنك تزوي مكان وبين إنك مقيمه فيه وتوا كل وحده تطلع برا ليبيا تزور مكان خمس مرات تاخد اللغه كامله ؟😂 وبعدين أنا ما قلتش ماتعرفش انجليزي بس برضو مش كل شي وبعدين هيا تخصصها هندسة ديكور زي ما قلتلكن بس تعرف انجليزي بس مش كله عشان هكي مافهمتش كلام القرسون
بالنسبة لي مؤيد زي ما حكيتلكن في الحلقه 1 يقرا اقتصاد وحاليا موقف قيده وقلتلكن أنه مزال 4 سمسترات ويتخرج المهم مؤيد ديما يوقف وكدا مفروض متخرج بس هوا يحب الانجليزي وعنده حتا الفرنسيه لأنه يسافر واجد مع أصحابه وهك ❤️
****
اسفه طولت عليكن بس التوضيح لازم يكون للجميع سامحني واه بنات بي خصوص المسابقه الي قلت عليها حسيتكن فايزات كلكن ماشاءالله عليكن توقعاتكن واضح إنه تقرن بي تركيز نبيكن ديما هك ❤️
نبدو الحلقه
عند ميس وصلت لي مكان معين اول ما خشت انصدمت وتشوف للمكان بي خوف وجسمها قشعر ووجهه الوان وتشوف في صبايا واجدات متخمرات قاعدات والسحاره كبيره في العمر ومنظر وجهه يخوف هالات سود تحت عيونها ووجهه باين عليه الشر ويديها فيهن حاجات غريبه والمكان كله بنته شينه ودخان طالع من الدار الي جوا وحاجات غريبه تشوف فيهن ميس وخايفه بس تقول في سرها اهم شي ليث يكون ليا
قدمت ميس بي خوف لاكن مبينه العكس :السلام عليكم
كلهن : وعليكم السلام
سحاره:قعمزي
قعدت ميس وضاغطه ع يديها بي خوف وتشوفلهن كل وحده السحابه تمدلها حاجه وتوصي فيها كيف ادير
بعد نص ساعه طلعن جا دور ميس
سحاره بي حده :تعالي
قربت ميس منها خايفه
سحاره :شن مشكلتك
ميس :ن ن نبي ولد عمي بس هوا ما يبينيش حتا اعترفتله هزبني ورفض وقال يعتبر فيا كيف أخته وانا نبيه ومش قادره نصدق اني نعيش بلاه  عشان هك جيتك اليوم نبيك اديريلي عمل يخليه يحبني ويجري ورايا ويتزوجني وما يشوف إلا انا
سحاره :ساهل ساهل مش ح يصير إلا كيف ما تبي وح نخليه يجري وراكي زي الكلب بس يدك ع جيبك مبلغ كويس نبي
ميس بي فرحه :ولا يهمك
سحابه :توا عطيني ## ك بدايه عشان نبدا نديرلك ولما يكمل تعطيني النص الباقي
ميس مدتلها الفلوس :تمام عطيني رقمك
عطتها السحاره الرقم وطلعت ميس وهيا حاسه بي فرحه رنت ع صاحبتها جتها عساس كانن في الجامعه روحت لي حوشهم وتتخايل في روحها متزوجه ليث
(ربي قال:لا يفلح الساحر حيث أتى حسبي الله ونعم الوكيل في كل ساحر وساحره دمرو حياة ناس وشتتو عيله وخربو سمعة وظلمو وافترو ودارو كل شي يضر انسان حسبي الله ونعم الوكيل 💔)