Crowns of Laurel

010-Pag-ibig ng Isang Makata

Nakatingala sa ganda ng tala
pilit na isinasawalang bahala
ang pagkislap ng mga mata
sa tuwing ika'y nakikita

Minsan ay nauuwi sa tula
ang damdaming aking dala
kahit na alam kong walang mapapala,
kahit alam kong sa wala ito mapupunta

Humihiling kay bathala
sa kalangitan, siya'y inaabala
baka sakaling mawala
o damdamin natin ay magtugma

Di ko malaman ang nadarama
Puso ko'y tila isang granada
Sumabog nang ika'y nakilala
Kaya ngayo'y lubhang nangangamba

Tila isa nangangatog na daga
naghihintay sa sagot mong tataga
sa puso kong sayo napunta,
sa galak na sayo ko nakuha

Alam kong sa alak ay hindi sasaya
Wala namang balak na tumaya
ngunit gustong makalimot nang di madama
ang sakit ng sitwasyon nating dalawa

Kailan kaya ito madadala?
mahahampas ng reyalidad itong makata?
na tumutula habang sinasalat ang luha
pilit na itinatago ang lahat ng nadarama

Huwag mag-alala
ako'y titigil na
kalat ko'y lilinisin ko na
damdamin ko'y sana mawala na.