كواكب.

البارت السابع عشر

البارت السابع عشر...
شهاب...اظن كده بعدنا عنهم كفايه.
برهومه...خير يا باشا معلش انا عارفه ان البت كوكو مزوداها شويه بس كمان عشان تسُبك الدور وتدخل علي كاميليا هانم بس انا عارفه برضوا ان لسانها طويل وعايز قصه.
شهاب...بابتسامه كوكو دي عمله نادره في الوقت ده
كاميليا...يعني مش زعلان منها
شهاب...بالعكس خالص مين بس اللي يعرف كوكو و يزعل منها طب تصدقي بالله
برهومه...لا إله إلا الله
شهاب...انا لحد الوقت شوفت كوكو 3 مرات مره لما جت البيت هي وذكري علي اساس نتعرف عليها ومره لما جينا اول امبارح في الخطوبه ودي تالت مره بس مش هكدب عليكي خدت عليها وعلي وجودها دخلت قلبي ومش.
قادر اطلعها منه كوكو دي زي ما قولتلك عمله نادره صعب تلاقي زيها اليومين دول بتفكرني بكل حاجه حلوه ايام زمان بشوفها بحن للصعيد مع انها مش صعيديه بس فيها كميه عفويه و بساطه
و جدعنه واصاله مش موجوده غير في الصعيد ومش موجوده غير في العيشه البسيطه اللي كنت عايشها زمان. تسلم تربيتك ليها يا ست برهومه
برهومه...الله يخلي حضرتك كلامك ده والله فرحني بس متأخذنيش يا باشا يعني
شهاب...اتفضلي.
برهومه...يعني ادام البت كوكو عجباك وحضرتك راضي عنها اوي كده كنت عايزني في ايه.
شهاب...هقولك بس قبل ما أقولك
في سؤال من يوم ما عرفت كوكو
او خلينا نقول من يوم ما عمر قالي علي الخطه دي والسؤال ده بيلح عليا اوي و هموت واعرف إجابته.
برهومه...بعد الشر عنك ربنا يطول في عمرك يارب.اتفضل أسأل.
شهاب... وافقتي ليه يا ست برهومه علي طلب عمر ايه اللي خلاكي توافقي علي الجنان ده اسمحيلي يعني اني اقول انه جنان لانه فعلا جنان حاسس ان عندك سبب قوي يخليكي توافقي اصل مفيش ام ممكن تآمن علي بنتها تدخل لعبه زي دي خصوصا
مع حد متعرفهوش ومفيش ام توافق ان بنتها تتخطب كده وكده
ولا في ام توافق ان بنتها ممكن تسمع كلام يأذيها نفسيا
والاهم من كل ده فالاول شكيت ان عمر عرض عليكم فلوس وانتوا وافقتوا وفعلا عمر قالي انه عرض علي كوكو فلوس بس الغريب انها رفضت وانتي كمان رفضتى لكن قبلتى مساعدة عمر..حابب اوي اعرف السبب.
برهومه...طيب قولي الاول اللي حابب تقوله وانا هقولك السبب
شهاب...معني كده اني صح وفعلا في سبب
برهومه...ايوه يا شهاب باشا في سبب.
شهاب...طيب معلش احب اعرفه الاول اصل لو قولتلك اللي عندي ممكن تقولي عليا إتعديت من جنانهم و اتجننت زيهم.
برهومه..بأبتسامه بعد الشر عليك من الجنان يا باشا...هقولك يا باشا بس قبل ما اقولك مش عايزه اللي هقوله ده يخلي طريقتك من ناحيه كوكو تتغير صدقني يا باشا اي حاجه هقولها اقسمك انها ما تعرف عنها اي حاجه كل ده حجات جوايا انا وبس.
شهاب...سامعك يا ست برهومه واتأكدي ان صوره كوكو هتفضل زي ما هي.
برهومه...كان مجرد حلم حلمته يا باشا زي اي أم في الدنيا بتحلم تشوف ولادها احسن ناس.
في يوم
جاتلي كوكو لاول مره معاها راجل وماتكونش ضرباه ولا متخانقه معاه ولا حتي جاي يشتكي منها.
بس الشهاده لله لما شوفته خطف قلبي قيمه وسيما طول بعرض
تحس انه راجل بجد مش زي اي شاب تافه قبل ما اعرف حاجه قولت في بالي وانا بأنب كوكو
كده برضوا يا بت يا كوكو تضايقي الجدع هو ده ينفع حد يضايقه او يتشاكل معاه ومن اول ما شوفته وهو داخل عليا اتمنيت انه يبقي جوز بنتي.
ابتسم شهاب و سابها تكمل.
برهومه...المهم خدت كوكو عالمطبخ عشان تفهمني ايه قصه الجدع اللي هي جايه وسحباه وراها لا موأخذه و حكتلي كل الحكايه مكدبش عليك يا باشا فالأول أتخطفت ماهي برضوا بنتي يا باشا واللي خلاني استني واسمع كلمه كوكو قالتلي انا جبتهولك هنا عشان ترفضي لو عايزه عرفت وقتها ان بنتي صادقه..خرجت وسمعت كلام عمر وحسيت انه صادق هو كمان وبسرعه الخطفه اللي كانت في قلبي دي راحت ووافقت ولما جت معاه هي وذكري هنا أمنته انه ميخليش حد يجرحها بالكلام خصوصا الهانم لانه حكالي شويه من طباعها وهو وعدني ان مفيش حاجه هتمسها..لما رجعت كوكو من المقابله دي و حكتلي عاللي حصل وقالتلي ان كده اللعبه خلصت و حكايتها مع عمر مكانتش محتاجه اكتر من يوم عشان كل واحد فيهم يروح لحاله
وقتها سمعت صوت من جوايا بيقولي انه لا لسه اللعبه مخلصتش لسه في حجات كتير
هما ميعرفوش ان هي ممكن تحصل.. و استنيت تاني يوم لقيت عمر رجع الصبح و بيقول ان والدته وافقت انهم يقرأوا فاتحه
مكدبش عليك يا باشا فرحتي مكانتش سيعاني كوكو كانت رافضه خالص وخايفه تتحسب عليها خطوبه قصاد الناس لما تسيبه انا اقنعتها محدش هيعرف و هتبقي عالضيق  وعمر اقنعها بكلامي لحد ما وافقت معرفش ايه اللي اتغير جوايا لاقتني تاني يوم بجيب نور وكراسي وبعزم الجيران وصاحبه من بدري اعمل في اكل كنت فرحانه وكأن بنتي بتتخطب بجد.. جات هي من الكوافير اتفاجئت باللي عملته كانت هتتجنن بس انا كنت فرحانه ولحد يومنا ده يا شهاب باشا في صوت جوايا بيقولي ان اللي بيحصل ده مش مجرد لعبه
في حاجه بتحصل حاسه انهم مش شايفنها ولا حاسين بيها
يمكن انا عارفه ان الحلم ده كبير يعني انتوا في عالم واحنا في عالم تاني خالص بس كمان القلوب بتتلاقي من يوم الميلاد يا باشا
صدقني اللعبه دي مش هتخلص بسهوله او يمكن متخلصش كل اللي خايفه بس منه ان بنتي تتوجع بس كمان حاسه ان هي دخلت برجلها جوه دوامه القدر يا باشا...لما بسأل نفسي ازاي شافوا بعض ازاي اتقابلوا ازاي نصيبهم جمعهم..يمكن يبان السبب اللي جمعهم غريب بس كمان السبب ده حساه حقيقي وكل ما احاول الاقي إجابه للأسئله دي بلاقي الرد الوحيد اننا مكملين لسه فاللعبه.
ابتسم شهاب وبص بعيد وفضل ساكت شويه و الرضا مرسوم علي ملامحه.
برهومه...انا خلصت كلامي يا باشا ياريت ما كونش ضايقتك
بصلها شهاب...بالعكس يا ست برهومه هتصدقيني لو قولتلك ان الكلمتين اللي كنت عايزك فيهم هما نفس الكلمتين اللي قولتيهم
بصي يا ست برهومه لما عمر جه وحكالي معترضتش بس لما شوفت كوكو حسيت اني أنا أتمسكت باللعبه دي اكتر يوم ما جينا نطلب كوكو يعني قدام كاميليا نكمل اللعبه بمعني اصح لاقيت نفسي بكلم صحابه من وراه وبقولهم يجوا معانا واتفقت
معاهم انهم يعملولوا زفه بجد كنت فرحان زي ما انتي كنتي فرحانه لما جينا عندكم كنت طاير من الفرحه ومحستش لحظه اني في لعبه وتمثليه هابطه انا شايف في كوكو زوجه لابني يا ست برهومه عارف ان هي دي اللي هتبقي سند ودعم وقوه عارف ان دي هتبقي بيت واطفال وحياه
عارف ان كوكو مناسبه وهي اللي تستحق تعيش مش اللي كانت بتجبهم كاميليا ...زي ما قولتلك كوكو عمله نادره شايف قلبها من جوه وعارف ان دي اللي هتقدر
تسعد عمر
برهومه...بصدمه تقصد ايه يا باشا
شهاب...عمر قرر انه يلعب علي كاميليا ودخل كوكو في لعبته وهي وافقت وعرفنا كلنا.وبقينا احنا كمان بنساعده في لعبته
والغريب ان كاميليا قالتلي انها وافقت علي خطوبته من كوكو عشان عارفه انه ممكن ميقدرش يكمل معاها ولعبت هي كمان عليه
والغريب ان انتي كمان يا ست برهومه لعبتي عليهم وقلبتي الحكايه لفرح بجد والاغرب اني عملت زيك طاوعت كاميليا في لعبتها وانا عارف ان اللي هيحصل غير ما هي متوقعه طاوعت عمر نكمل باقي لعبته وانا من وراه بلعب لصالحه....هي فعلا لعبه ولحد الوقت محدش فيهم قادر
يحس ان السحر هينقلب عالساحر
عشان كده عايز احط ايدي في ايدك
برهومه...مش فاهمه
شهاب...نكمل اللعبه يا ست برهومه ونخلي اللعبه تبقي حقيقه 
بدل ماهي تمثيل وانا اهو قدامك
بطلب ايد كوكو منك وبقولك اني
مش هلاقي احسن منها لعمر
برهومه....بدموع بتلمع جوه عينها
هو حضرتك بتتكلم جد
شهاب...طبعا بتكلم جد كوكو تشرف اي حد ونسب انا شخصيا
اتشرف بيه