Unicode
အောက်အီးအီးအွတ် !
မည်သည့်အရပ်ဆီကနေ တွန်မြည်နေမှန်း မသိရသည့် လင်းကြက်တွန်သံကြောင့် သူ့မျက်လုံးအစုံ ပွင့်အံလာရသည်။ နိုးနေသည့်တိုင်အောင် ချက်ချင်းမထသေးပဲ အိပ်ယာထဲ လှိမ့်နေမိသည်။
ဂလုန်း ! ဂလွမ် !
"အကိုအိပ်နေပါတယ်ဆိုကာမှ လက်က တုန်ချိချိနဲ့ စိုင်းခမ်းနောင်ရယ်... သေချာဂရုစိုက်လုပ်စမ်းပါဟ"
ဒန်အိုးအဖုံး ကြမ်းပြင်ပေါ်သို့ ပြုတ်ကျသံနှင့်အတူ ထွက်ပေါ်လာသည့် ကိုယ့်ကိုယ်ကို အပြစ်တင်နေသည့် ခမ်းနောင်လေးရဲ့အသံကြောင့် သူပြုံးလိုက်သည်။ ဒီကလေးဘယ်အချိန်ရှိသေးလို့ အစောကြီးနိုးနေရတာပါလိမ့်။
အတွေးထက် လက်ကမြန်စွာ စားပွဲပေါ်မှ ခရမ်းရောင် စားပွဲတင်နာရီလေးကို လှမ်းယူကာကြည့်လိုက်တော့ နံနက်(၄)နာရီခွဲသာ ရှိသေး၏။ ပြန်အိပ်၍လည်း မရတော့တာကြောင့် အိပ်ယာထက်မှထကာ အိပ်ယာသိမ်းလိုက်ပြီး ၊ ညက မိုးတစ်ပြိုက်နှစ်ပြိုက် ရွာထားသည့်အပြင် တောင်ပေါ်ဒေသဖြစ်၍ ရာသီဥတုကလေးက ချမ်းစိမ့်စိမ့်ကလေး ဖြစ်နေတာကြောင့် အသားရောင် ဆွယ်တာအပေါ်ထပ်ကလေးကို ဝတ်ဆင်ကာ မီးဖိုချောင်ဘက်သို့ ထွက်ခဲ့လိုက်သည်။
မီးဖိုချောင်ထဲရောက်တော့ ခမ်းလေးက ဘာလုပ်နေသည် မသိ။ မီးဖိုချောင်ထဲ သူဝင်လာသည်ကို သတိမထားမိသည်အထိ သူ့အရှေ့ကအရာကိုသာ အာရုံစူးစိုက်ကာလုပ်နေသည်။ မှိန်ပြပြ ဖယောင်းတိုင် မီးရောင်လေးအောက်မှ မြင်နေရသည့် ခမ်းနောင်လေးရဲ့အသားအရည်လေးက ရွှေရောင်အလား ဝင်းဝါနေ၏။ ပြုံးလိုက်တိုင်း ပေါ်လာတတ်
သည့် ပါးချိုင့်နက်နက်ကလေးတွေကလည်း အသည်းယားစဖွယ်ကောင်းလှသည်။
"ဘာလုပ်နေတာလဲ ခမ်းလေး"
ခုံပုတစ်လုံးကို ဆွဲယူကာ ခမ်းနောင်ဘေး ဝင်ထိုင်လိုက်ရင်း မေးလိုက်တော့မှ ခမ်းနောင်လေးက သူ မီဖိုးချောင်ထဲ ရောက်နေတာကို သတိထားမိတော့သည်။
"အယ် ခမ်းကြောင့် ဆူညံနေလို့ နိုးသွားတာလား အကို"
"မဟုတ်တာ... မြို့မှာဆိုလည်း ဒီအချိန်ဆိုနိုးနေကျပါ"
![ညွှန်းဖွဲ့မမီ [Completed]](https://img.wattpad.com/cover/311408377-64-k457989.jpg)