اللعنات العشر (الجزء الثاني من مغامرات إلى عالم الأساطير)

الرابع

الحارس: ادخلوا أيها اللصـوص
رعد بغضب: إحنا مش لصـوص
الحارس: اصمت أيها الغريب

أدخلهم إلى السـجن جميعا ثم أغلق الباب

سيف: هنعمل إيه دلوقتى؟
مروان وهو يجلس: ولا أى حاجه هنستنى
رعد بغضب: أنت إزاى بالبرود دا
إسراء بقلق: مروان أنت كويس؟ أنت عمرك ما كنت كدا
مروان: كدا إزاى يعنى؟
إسراء: مش مهتم باللي بيحصل ومش همك، بقيت ... بقيت بارد أوى
مروان وهو يستند بظهره على الحائط: وإيه يعنى ... بصى يا حبيبتى فى حاجات كدا الواحد لازم يسيبها تمشى براحتها ويستمتع بيها واللي إحنا فى دا واحد منها
إسراء بإستنكار: أنت حصلك إيه؟
لم يجيبها بل شبك يده خلف رأسه وأغمض عينيه لينام بعمق
آسيا: هو فى إيه؟
إسراء بحزن: مش عارفه أنا مبقتش فاهمه حاجه
سيف: هو ممكن يكون دا تأثير الكتاب؟
إسراء وهى تضع يدها على أذنيها: معرفش معرفش
دعاء وهى تحتضنها: خلاص يا جماعة الأفضل أننا نرتاح دلوقتى *ثم وجهت حديثها إلى إسراء* وإنتى كمان يلا

أخذتها وجلسا فى أحد الجوانب وقد سمحت لها بوضع رأسها على كتفها لتنام براحه
ابتسمت آسيا لهذا ثم وجدت رعد يجذبها من يدها ثم جلس على الأرض وأجلسها فوق قدمه واحتضنها

آسيا بضحك: حتى هنا
رعد: مبقتش أعرف أنام غير كدا

ضمها إليه وثبتها فى حضنه فابتسمت ووضعت رأسها على صدره وناما متناسين أين هما أو ماذا حدث منذ قليل

سليم بضحك: أهو عصافير الحب نامو
سيف: هتحسدهم اسكت
سليم: أحسد مين يا ابنى بس أنا عايز كتكوته أنا كمان
ضحك سيف وهو يتمدد على الأرض: لما نرجع ابقى هاتلك واحده بس خالى بالك لتموت تانى يوم
سليم بعدم فهم: وهى هتموت تانى يوم ليه؟
ثم فهم أنه يسخر منه فصرخ قائلا: أنت .. انت بتستهزء بيا
ضحك سيف بصوت عالٍ حتى قام الحارس بضرب الباب من الخارج ليصمتوا فوضع يده على فمه ومازال يضحك بصمت ... نظر إليه سليم شذراً وأولاه ظهره وحاول النوم هو أيضا

*معلومة تاريخية*

معبد حتشبسوت أو المعبد الجنائزي لحتشبسوت هو معبد من الأسرة الثامنة عشر المصرية، وأحسن ما بقي من معابد بُنيت منذ نحو 3500 سنة في الدير البحري بمصر ... بنته الملكة حتشبسوت على الضفة الغربية للنيل المقابلة لطيبة (عاصمة مصر القديمة) (الأقصر اليوم).
يتميز معبد حتشبسوت بتصميمه المعماري الخاص المنفرد بمقارنته بالمعابد المصرية التي كانت تُبنى على الضفة الشرقية من النيل في طيبة.
يتكون المعبد من ثلاثة طوابق متتابعة على شرفات مفتوحة.... بُني المعبد من الحجر الجيري، ونُصبت أمام أعمدة الطابق الثاني تماثيل من الحجر الجيري لأوزوريس وللملكة حتشبسوت في توزيع جميل.
لقد بُني معبد حتشبسوت في فترة تصل إلى 15 عام من فترة حكم الملكة حتشبسوت فقد استمر بنائه إلى السنة 22 التي كانت تحكم فيه.
........
*فى اليوم التالى *
فُتح باب السجن ودخل قائد الحرس وهو يصيح بهم قائلا: استيقظوا أيها اللصوص
سليم بضيق: إيه ياعم حد يصحى حد كدا
قائد الحرس: ماذا تقول أنت .. هيا انهضوا ستقابلون الملكة
استفاقوا وأخذهم الحراس إلى غرفة واسعة يوجد بها عرش الملكة وكان عبارة عن كرسي من الذهب تزينه الأحجار الكريمة
أجلسوهم على الأرض وانتظروا دخول الملكة حتشبسوت