لماذا انا 💔

17

بديت نحل في عيني و دنيا نرا فيها فلو و مضببة ، تحركت شوي حسيت بوجيعة قوية في حزامي ، بدات التصويرة تولي واضحة لقيت روحي في بيت بيضة سيروم معلق في يدي و اكسيجين في خشمي ، في رمشت عين تفكرت ليلة لمشومة لي تعدت عليا ، هبطت دمعة سخونة علا خدي و من دمعة ولات دموع ، خسرت اغلى معندي ، خسرت عذريتي و حق راجلي نهار ٱخر ، نجمتش نحمي روحي و الي زاد شواني و حرقلي قلبي ، لي خسرني في شرفي هوا لعبد لي قلبي دقلو ، متوقعتهاش منو ، بدات النار تاكل فيا وليت نشهق مالبكاء معاد نحب شي انا ليوم انسانة محطمة ، حاسة حاجة في سدري توجع فيا ، اه يا ربي علاه يصير معايا هكا ، اه راني تعبت ، قعدت على الحالة هاكي ساعة و دموعي محبوش يكفو حتى دخلت طبيبة تتفقد فيا
طبيبة:حمدلله على سلامتك مدام شتحس في روحك
مجاوبتهاش و دموعي زادت هبطت اكثر حزامي منيش حاسة بيه و كرشي توجع فيا
طبيبة:شوي ٱخر و ينجمو اقاربك يزوروك من بكري راجلك لي جابك لبارح واقف قدام بيتك متحير عليك ...
معندي حد معايا عايلتي كان يسمعو يصير فيهم موش مستعدين يسمعو خبر يزيد يرجعهم للنقطة صفر ، ههه راجلي ، يليتو جاء  راجلي و حلالي ، هاكة مغتصبي ....
سوار:سامحني منحب حد يزورني نحب نرتاح تاعبة و موجوعة 💔
طبيبة:باهي ارتاح تو نقلو كي يجي يرجع في وقت ٱخر
هيا خرجت و انا شديت سيروم قطعتو و نحيت لأكسيجين من خشمي شديت في سرير و حاولت نهبط اما حسيت بوخزة قوية نجمش نتحرك بديت نسايس في روحي و هبط مالفرش حطيت ساقي على الارض و مشيت شوي مالوجيعة كاتما صيحتي لازمني نخرج تخنقت منحبش نقعد لهنا نحيت حوايج الكلينيك و لقيت ساك فوق الطاولة فيه حوايج باين انس جابهم💔 لبست لي جاء قدامي و خرجت بشوية خطوة ورا اختها و انا شادة روحي حاسة كي سكينة تغرست فيا ملوطة نقاوم بسيف ريت لفراملة متعدين عملت روحي نفركس على بيت مريض، ستنيتهم تعدو و كملت ثنيتي خرجت مالباب و نحاول باش نظهر روحي انسانة عادية كانت تزور حتى بعدت شوي لقيت جردة عمومية معادش نجم نزيد نمشي حبست شوي نتنفس حسيت بدوخة اما شديت روحي ،و لعرق هابط مع جبيني ، حتى لمحت كرهبتو وقفت في باركينڨ تابع لكلينيك ، جمعت قوتي و عفست على قلبي و شديت ثنيا هازة لبلاصة شبه ريفية منحبش نقابلو نحب نهرب، نعرفش قداه قعدت نمشي تلفتت ملقيت حتى بشر طريق خالي من الكراهب و ديار بعيدة و اراضي واسعة فلاحية ، شمس حرقتني و بديت نحس في حاجة هابطة بين ساقيا و لوجيعة عمال و تقوى معادش نتحمل اكثر طحت على الارض و دم هابط حوايجي تمسخو و اطرافي تشلو يدي منجمتش نهزها ، مالي إلا ثواني و عينيا بدات تتسكر حتى لمحت خيال يمشي و يقربلي هاكي كانت ٱخر حاجة ريتها قبل متضلام الدنيا في عينيا و معاد نشعر بشي ...💔

هزيتها للكلينيك صارلها نزيف قوي ، نقذوها في الدقيقة لأخيرة، حبيت نشوفها ياخي منعوني مالدخول حاطينها تحت المراقبة كلفت اسماعيل يجيبلها حوايج مالدار و يحطهملها في بيتها و انا خرجت هزيت روحي و مشيت لدار مكرم ، حكيتلو لي صار لكل ، قعد يعاتب فيا اما موش وقتو كلفتو باش يحل مشكلت ايمن و يحاول يبعدو لمدة هاذي خاطر لي صار موش باش يعديه بالساهل و انا توا منيش ناقص حتى نحل مشكلت سوار ، هزيت معايا درة مرتو و رجعنا للكلينيك حبيتها تحكي معاها خاطر ظاهر موش باش تقبل تقابلني توا ، وصلنا و مشينا لبيتها اما  لقينا لفراملة و الطبيبة قدام لبيت يتناقشو انا وصلت عندهم و هوما وجوهم لخلخت و صفارت باين فما مصيبة اخرى تستنى فيا ،
انس:شبيها سوار شصارلها لاباس؟؟؟
طبيبة: monsieur انس لمدام ملقيناهاش في لبيت
انس:شمعناتها ملقيتوهاش في لبيت اه جن هيا اختفت ر**** فاش قاعدين تعملو لهنا انتوما مالا ياخي خضار حالين لعباد داخلة خارجة و انتوها ز***. عينيكم عمات
طبيبة: monsieur  انس هدي روحك هانا نلوجو عليها تو نلقاوها بعثنا شكون باش يجيب تسجيل لكاميراوات ...😖
خفت كان يطلع ايمن خطفها و الا رجعلها 😠 قعدت نستنا في التسجيل على احر مالجمر ، جابوهم و دخلت للبيرو انا و درة مع الطبيبة باش نشوفوهم ، بدينا نتفرجو و نلوجو ...
درة:تره ثبت لهنا شوف هاكي
انس:هيا ، خرجت وحدها 😠 كيفاه تخلو لمرضة متاعكم تخرج ا**** لكلينيك نهده على ريوسكم بهايم تخدمو تدورو بوذنيكم مريض يتعدا بيناتكم مغير متحسو عليه
درة:انس صياح توا معندو باش يفيد توا لازم نخرجو نلوجو عليها هيا معندها حد في اطاليا تو فيسع نلقاوها نلوجو في لوتلة و فنادق لكل هيا معندناش وقت نضيعوه ...
كلام درة رجع فيا لامل اما حسيت بغصة قوية ، هربت مني و نفرتني 💔 مستحيل كان نخليها ، سوار متاعي 💔🔥انا لي ملكتها
خرجنا نلوجو كلمت الرجال و مكرم و لي يعرفوها و راوها معايا لكل ، مخليناش حتى وتيل و حتى ملجأ و حتى تركينة ملوجناش فيها و هيا تقول ارض انشقت و بلعتها ، طاح علينا ليل و احنا نفركسو و شي نافع ربي.... ملقينالها حتى اثر ....💔