حق المظلوم¹

9

وأخيراً بعد اسبوع كامل روحوا ..

أيمن طول الوقت هادي وساكت وقالب وجها..

حتى أنه يتجاهل في امه وبوه وميردش عليهم.. غير بالمختصر..

في الليله هادي قعد نايض النوم طاير .. بحكم انه راقد يوم كامل .. وحتى التفكير المفرط خلى عنده أرق ...

قعد يفكر وسارح لين الدنيا ضوت ..

أيمن: مسمعتش الفجر حتى!!

خش للحمام توضى وصلى وخش لدار خواته لقي سكينه نايضه..

سكينه: أيمن؟؟ خيرك مرقدتش مال..

أيمن: اي .. جيت نشوف فيكم بس.. أرقدي أرقدي وانتي زي الدجاج تنوضي من وين

طلع من الدار وهو يتأفف.. كان يبي ينوض تقوى باش يطلع منها الدوه..

قعد أيمن على اعصابه لعند الظهر...

شاف امه طالعه هي وبوه..

مسألهمش بكل ..

بس تمنى لو انهم خدوا معاهم سكينه..

لذلك وقف بسرعه وطلع من الباب..

أيمن: وين ماشين يا بوي؟؟

صلاح: للسوق .. خيرك تسأل؟

أيمن: ارفعوا معاكم سكينه شكلها قداش ليها مطلعتش..

حواء: لالا ماعندها علاش طالعه..

صلاح: برا ناديها نرجوا فيها..

أيمن: تم..

خش قاللها .. في الاول رفضت بس لما قاللها قاعدين يراجوا فيك..لبست عبايتها ووشاحها وطلعت..

أيمن: أطلعي قدامي انتي..

تقزى: عندي حوسه مش فاضيتلك..

أيمن: تقوى متحرقيليش دمي!! اطلعي وحطي بلي على راسك ماشاء الله براكة خضره هي مش حوش ..

تقوى خدت بدلة الصلاه وطلعت معاه وهي ترعش ..

أيمن: قعمزي ..

تقوى قعمزت وهي تشوفله..

أيمن قعد ماشي جاي .. بعدين شاف لتقوى ..

أيمن: شن اللي خلى بوك يخطب سكينه لمحمد؟

تقوى فمها انفتح بصدمه..

أيمن: يحسابوني مش حانفهم .. تي بدال ما يعزوا غادي يباركوا لبوك وعمك ومش حاتلقى لبنتك خير من ولد عمها !!

تقوى تنفست بعمق..

أيمن: تكلمي يا تقوى .. خلي نحله الموضوع قبل ما يكبر!! .. بوي نعرفه ميقدرش يجابهه.. اهوا انا معاكم والله ما يطرالكم شيء وانا عايش .. ولا يغصبكم حد على حاجه وانا نتنفس..