حق المظلوم¹

14

تقوى: طلعنا ادهور بينا هيا.. خاطري ضايق ديما محبوسه انا..

أيمن: شن المقابل..

تقوى قلبت عيونها..

سكينه: حقا ومنها نتعود على الطرق..

تقوى: نوتي روحي ولالا؟

أيمن: وتوا روحكم هي...

تقوى ناضت وهي فرحانه خشت لدارها هي وسكينه وبدت تشوف شن بتلبس..

سكينه خشت خدت عبايه من عباياتها وشاربه ..

لبستهم وقعدت تستنى في تقوى اللي بدت ادير في مسكرا وشوي احمر خدود .. مبتش ادير روج باش ميعاركهاش أيمن..

طلعوا هما التنين نزلوا من الدروج .. لقوا هويده وهنادي في الجردينه مع خديجه يشربوا في قهوه..

سكينه:السلام عليكم.. كيف حالكم اليوم..

خديجه شافتلها: الحمدلله شن حالك انتي وحال امك..

سكينه: الحمدلله بخير... هويده وهنادي احني بنطلعوا مع أيمن بندهوروا كانكم قالقات البسوا وتعالوا هي..

تقوى عيونها توسعوا بس خلت روحها عاديه..

هويده شافت لأمها..

خديجه: وين بتمشوا؟؟

سكينه: على أيمن توا .. اكيده بيدهور بينا هكي في الطرق ونروحوا المغرب ..

خديجه: مداما هكي بروا كان خاطركم يا بنات..

هنادي وهويده ناضوا يجروا لبسوا وسكينه قعدت تتكلم مع خديجه شوي على بوها ..

سكينه: امبكري الصبح حسيته وجها أحمر .. مخداش الأسبرين؟؟

خديجه: مياخدش فيه قداش ليه..

سكينه خافت: ضروري ياخده ميجيش هكي .. تو نتكلم معاه بعدين..

سكتت لما سمعت صوت التبيب ..

هنادي وهويده طلعوا..

وتقوى قالبه وجها..

طلعت سكينه ركبت القدام وتقوى ركبت الوراء خشت في النص..

ورصت على المسجل باش تولع اغنيه..

ايمن: اووو حتى انتم جيتوا .. تستغلوا فيا كلكم..

سكينه: خلي ننتفعوا منك شوي .. خيره ديما انت اللي منتفع مني..

أيمن ضرب ايد تقوى اللي تلبز في المسجل: انتي فوق الكل يا شيختي .. متجمعيش روحك مع حد .. شن يا بنات ان شاء الله يعجبكم المشوار معاي ..