كنت بتسمع أغاني وبطّلت.. هتلاقي في العربيّة الأغاني الي بتحبّها وكنت بتسمعها دايما.
كنت بتُقع في ذنب مُعيّن وبطّلت.. في مرّه هتلاقي نفسك لوحدك وكُل حاجه حواليك متظبّطه علشان تعمل الذنب بتاع زمان.
كنتِ بتلبسي لبس ضيّق ومكياج وكده، وبطّلتِ.. في مرّه هتلاقي كل أصحابك حواليكي بتتكلّم عن المكياج الواو والفُستان التُحفه الي علىٰ صحبتك فُلانه.
كنت بتكلّم بنات وتُبت لربّنا .. في مرّه هتلاقي بنت كان نفسك تكلمها وتلاقي الدّنيا متهيّئه جدًا إنّك تبدأ كلام معاها، والعكس للبنت.
كُنت مبتصليش وبعدين بقيت تصلّي .. بعدها بفتره هتلاقي ألف حاجه تشغلك عن الصلاة.
كنت بتعمل ذنوب وتُبت .. بعدها بفتره هتقع في نفس الذّنوب تاني.
كل ده في الآية دي "أَحَسِبَ النَّاسُ أَنْ يُتْرَكُوا أَنْ يَقُولُوا آمَنَّا وَهُمْ لَا يُفْتَنُونَ"
أنت مش هتسيب ذنب كده والموضوع انتهىٰ لاء !
هتجيلك فتنه وهجيلك إختبار من ربّنا ..
وهيكون مطلوب منك متيأسش لما تقع .. وتجدّد توبتك وتقوم تاني،
ومتسيبش نفسك للشيطان ييأسك ويحزنك ويقولك يااه كل مرّه بتقول مش هعمل ذنوب تاني وتقع .. ده أنت مفيش رجا منك!
قال رسول الله ﷺ :"إن الله لا يملّ حتى تملّوا "
أنت محتاج تظهر إيمانك وصدق قلبك إنّك توبت لربّنا ,,
علشان ينجّيك ويخلصك..❤
