" في الوقت ده كُنت مغمضة عيني وإيدي بتِرتعِش ومِن قدامي ربنا خايفة أقابله وأقوله إني انتحرت بسبب فشلي في حياتي، ومِن ورايا دُنيا فيها ناس قاسية عليا لمُجرد إن ربنا خلقني مُختلفة عنهُم.
وانا واقفة ما بين الإتنين ومستنية أقرر هاخد الخطوة لقُدام ولا
لـِ ورا ! ".
- واحد زائد خمسة يساوي كام يا مريم؟
" بصيتلُه وأنا خايفة، وفضلت ساكتة".
- ما تردي يابنتي، ده الطفل اللي في حضانة بيفهم أكتر مِنِك.
" فضِلت أفكّر فترة كبيرة وأهز في راسي وقُلت:
= واحد زائد خمسة يساوي أربعة.
" بصلي وهو غضبان وعينه حمرا وراح ضارِبني جامد بالقلم علي وشي والنضارة وقعِت وسناني جابت دم".
- اطلعي برا يا غبية وماتجيش الدرس عندي تاني.
" في اللحظة دي صُحابي بصوا عليا وفضلوا يضحكوا ويقولوا:
يا مريم يا غبية يا مريم يا غبية، خدت شنطتي بسرعة وطلعت أجري علي البيت".
"فضلت أكتر مِن ساعة في أوضتي بعيط، وأول ما ماما دخلت عليا جت جري ناحيتي وقالت:
- بتعيطي ليه يا حبيبتي؟؟
= المدرس ضربني وطردني يا ماما.
- ضربك وطردك !! ليه بس كدة يا حبيبتي؟
"بصيت للأرض وقُلت:
= علشان قالي مسألة صعبة في الحساب وماعرفتش الإجابة، وصحابي فضلوا يضحكوا عليا ويقولولي يا غبية، وأنا مش غبية وهما اللي أغبيا كلهم.
- هو سألك في ايه؟
= قالي خمسة زائد واحد يساوي كام، وقولتله يساوي أربعة.
"ماما بصتلي وهي زعلانة وحطت إيدها علي كتفي"
- لا يا حبيبتي انتي مش غبية، أنا هوديكي لمدرس أحسن مِنه.
" وباست راسي وسابتني ودخلت لبابا"
- بقولك يا عمرو.
= نعم يا إجلال!
- بنتنا دلوقتي عندها ١٠ سنين ومش عارفة واحد زائد خمسة يساوي، قلبي واجعني عليها أوي.
= حبيبتي هي دلوقتي بتمُر بظروف صعبة، ولازم نقف جمبها ومانحسسهاش بحاجة.
- طب أبوس إيدك دخلها مدرسة خاصة، مش عاوزاها تحِس إنها تعبانة أو أقل من حد، خليها تتعامل مع مُدرسين فاهمين حالتها كويس وتكون وسط ناس شبهها.
" وأنا واقفة جمب الباب سامعة كُل حاجة فـ زقيت الباب ودخلت"
= بابا هو أنا صحيح ربنا خلقني غبية؟
" أمي حطت إيدها علي بؤها وكتمِت صوت العياط"
- لا يا حبيبتي ربنا عمره ما يخلق حد غبي ليه بتقولي كدة!
