-اتفضل يا فندم ده ورق الإستقالة
=راجع نفسك كويس، وخليك فاكر إنك إنت اللي هتخسر
-ده آخر كلام عندي يفندم ومستحيل أتراجع
=خلاص انت حر، انت اللي اخترت!
*********************
-ردت عليه بعصبية: انت بتقول ايه يا اسلام! انت سيبت شغلك!
=ايوة يا فاطمة، سيبته وبعد تفكير طويل ومرتاح لقراري ده
-ازاي تعمل كدا! وازاي تسيب شغل كويس زي دا! انت عارف كنت بتقبض كام! مستحيل تلاقي مكان زي دا تاني
=تغور الفلوس اللي تيجي من شغل زي دا، لو هتيجي من المكان ده فأنا مش عايزها والله الغني عنها..
-انت ناسي انك محتاج فلوس علشان مصاريف الشقة اللي لسه مخلصتهاش، ومصاريف جوازنا وكل ده هتعمل في ايه!
=ربك هيدبرها، يكفي اني مرتاح بعد ما تخلصت من القر*ف اللي كنت فيه ومش مستعد أخد ذنوب واشترك في حاجة زي كدا
-أيوة بس انت مالك بكل دا! صاحب الشركة والشركة نفسها هي اللي بتدعم الشذ*وذ انت مالك بالموضوع!
=مالي بالموضوع ازاي! انتي ناسية اني هبقى مشترك معاهم في الجريمة دي حتى لو معملتهاش، انتي متعرفيش أن امرأة سيدنا لوط ربنا عاقبها علشان كانت بس بتدعمهم!
-طيب سيبك من الموضوع دلوقتي، تقدر تقولي هتعمل ايه في شقتنا وفي العفش! انت ناسي أن فاضل على فرحنا شهرين!
=لا مش ناسي، وقولتلك ربنا هيدبرها
-حاول تتصرف بسرعة وتشوف شغل تاني، لأن الشقة لسه ناقصلها حاجات كتير غير مصاريف الفستان والكوافير وكل دا
= هيحلها الحلال بإذن الله
*******************
-اسلام بابا بيقولك تعالى النهاردة علشان عايز يتكلم معاك
=عايزني في ايه؟
-لم تيجي هتبقى تعرف، يلا سلام
*******************
-اسراء قالتلي أن حضرتك طلبتني يا عمي، فيه حاجة ولا ايه؟
=أنا سيبتك فترة قولت يمكن ترجع عن اللي في دماغك وتغير رأيك تاني، لكن عدا وقت كبير وانت لسه مُصر على إنك مترجعش تاني للشغل، وانا مش معاك في القرار اللي خدته، تقدر تقولي هتجيب باقي مصاريف جوازك منين!
-أنا مش عايز أكمل في الشغل ده يا عمي وده قرار نهائي، وبعدين أنا بدور على شغل ليل نهار ومش ساكت
=انت بقالك أسبوعين بتدور وبتقول نفس الكلام والشهر قرب يخلص ومش باقي غير شهر على فرحكم، هتتصرف ازاي بقى!
-ان شاء الله ربنا هيحلها يا عمي، وممكن بعد اذن حضرتك نطول فترة الخطوبة شوية بس لحد ما أكون لقيت شغل كويس
