كفاح امراءة ♥️

الحلقة 29 ♥️

29.
ربيعه : شن الخميسسس
محمد : استغفر الله وخلاص ‏Ⴢ̤ امي كيف الحل معاك نقولك موعد تنوضي تعيطي نقولك مش معروف برضو تعيطي ونبي نفرح بيك شن ندير هي كيف نرضيك
ربيعه ابتسمت : اعصابك يا استاذ بس ، حاضر الخميس نمشيلهم باهي ونحدد اقرب موعد للعرس وجيبلي لجين تقعد معاي
مي : ااي بنعيشوو معبعضنا
محمد : طياح سعدك وخلاص اني واخد مرتي باش نجي نقعمز ف خليقتك ونصبح فيها بناخد حوش بروحيي ونرتاح ونتهنى
مي : شنوو واحني بنقعدو بروحنا
ربيعه : شن بتاكلنا الغولة عادي اهم شيء وليدي مرتاح يكون
______
عند لميس قعمزو يتعشو ويتعاركو
ام مجاهد : ماكلة محروقة
خديجة " مرة بو مجاهد " : اكيد وحدة منن بناتك دارتها
ام مجاهد : صدقيني م تطلع الا بنتك
معتز : ناكلو ‏Ⴢ̤ عيله وقت ماكلة صوت لا ونبي
ام مجاهد : السم الهاري كل همك كرشك انت
لميس قعدت تضحك
مجاهد بصوت واطي : متدوريش هادي عادات وتقاليد العيله ضروري زي توم وجيري ف كل مكان
لميس شدت يد مجاهد
خديجة : خيرها الكنة الصغيرة متاكلش
لميس ابتسمت : ناكل اهو
ام مجاهد : بالك عجبتهاش ماكلتنا ولا مش متعودة عليها
لميس : لا لا الماكله حلوة تسلم ايديك غير تعب سفر بس
مهم كملو ماكله وهما يتعاركو
خديجة : شني كنتنا صغيرة تخشي معانا كوجينة
ام مجاهد : اليوم ضيفه غدوا تباشر شغلها وتطيبلنا كسكسي للغدي هي بروحها
لميس كحت
مجاهد : اي اي انشاء الله
مجاهد شد يد لميس وركبو غرفتهم
لميس : مجاههد نعرفش نطيب حيعلياا خنفتحً قوقل نشوفلي مصيبه
مجاهد جبد لميس منن يدها ورقدها ف حضنه : غير توا فوتي صبح نلقو حلل ، هاتي بوسه توا
لميس : اني ف شني وانت ف شني ‏Ⴢ̤ مجاهد
لميس قعدت تلعب بلحية مجاهد وعيونها ف عيونه : باهي قوليي عيلتك حلوة وكبيرةة عرفني عليهم هك وصفاتهم
مجاهد : انتتي اهم شيء حفظتي الاسماء وثبتي ولا
لميس : اي شبه سمية و..
مجاهد ضحك : ‏ᘓɹ̇ᓄ هالاخت الجديدة يلي درتيهالي 😂 حفظتي زين والله ، شوفي امي جايبة اربعه اولاد الكبير محمد شفتي شخصيته غامضه هلبا وهمه خدمته ومرته مريم الحنينة العسل هادي الفالحة تضم وتطيب وتهتم بينا كلنا وتدويش وترد ابدا ، بعدين يجي خوي معتز مرته بتول تو تعرفي شخصيتها مع الوقت ، وعندك مهند مرته سجى واني اصغر واحد ف الاولاد
لميس قرصت خدود مجاهد : ومرتك لميسس العسل الحلوة
مجاهد ابتسم : بعدين خواتي هالة وهنادي مش متزوجات ، بوي تزوج مرة تانيه خديجة وجاب منها هند وهيفاء ، هند ؏ حالها متزوجة وشفتيها ساكته لا ترد لا تعطي عندك هيفاء لسانها حالة مخطوبة وحوش ديما عرايك توم وجيري بس يحبو بعضهم.
لميس حضنت مجاهد : ووهعليا نبي يجي صبح باش نهدرز عليهم ، لا لا نبيش يججي صبح امك تبيني نطيب كسكسي منعرفش منعرفش نهاري احرف
مجاهد حضن لميس : غير ارقدي توا وصبح نلقو حل
_______
معاذ كان راقد فوق سطح ويتامل ف سمي ونجوم
لمى : انت مش ف الحوش صوت ريح جنبك شن غبيه اني
معاذ : تو نصورلك دقيقه هي ‏Ⴢ̤ همي هم انني فوق سطح لان الضيء الكلب هارب وزير الكهرباء العيل اهوا يعطي فينا حصتين بدي متطور يجيب ف ضي ساعتين ويهربه باقي وقت ولد لكلب اهوا كان نحصلهه
لمى : ساهله ولع مولد
معاذ : الله شكرا ؏ الحل مكنتش عارف بدونك شن حندير !
سكت شوية معاذ بعدين :خيرك غبيه ولا كيف مقعمز فوق سطح اكيد مولد فيه حاجة يعنيي باش مخدمتاش !
لمى : اعصابك بسس بتاكلني انت مولي شراني
معاذ : نخاف يجيني سكر منن العسل هلبا
لمى : اي اي رقعها توا
معاذ " اهدا شوية ي معاذ متسبش متهزبش " سكت معاذ وتنهد
لمى : يعني قصدك اني نكد وهم تتنهد مني
معاذ : تي خيرك انتتي
خشت مكالمة انتظار لمعاذ كانت المحامية دنيا
لمى : ساعه اتنين ف الليل وانتظار منن خش عليك
معاذ : هادي دنيا سكري شوية
سكو معاذ ؏ لمى ورد ؏ دنيا
دنيا : اهلا كيف الحال
معاذ : حمدلله بخير وانتي
دنيا : اسف اتصلت ف وقت متاخر كيف كملت قضايا بتاعي وشديت قضية اختك حددت جلسة يوم خميس باذن الله
معاذ : خلاص تمام
دنيا : اسمعني اني نبي نلقط اكبر عدد منن الادله ؏ موضوع اختك وهكي باش نحسمو هالقضية ف اربعه جلسات او خمسة نبيش نطولو فيها
معاذ : شنوو اربعه خمسة
دنيا : موضوع مش ساهل زي م تحساب انت قضايا زي هادي تاخد حتى سبعه جلسات لان غيابي ف نهاية
معاذ : حاولي تحليه ف اسرع وقت
دنيا : اي انشاء الله انني مش حنرقد لن نحله
معاذ تنهد
دنيا : تقلقش روحك ، لو ممكن نتلاقو غدوا ونتناقشو ف هالموضوع ونحاولو نلقو حل
معاذ : خلاص امالا غدوا ساعه كم يناسبك
دنيا : شرايك معع خمسة عشية هكي ، ف كافي ال£؛(
معاذ : خلاص تمام
سكر معاذ ورجع للمى متبيش ترد خش بعتلها ؏ ماسنجر
معاذ : حركات اهيا فوتي امها خير ‏Ⴢ̤ لمى
لمى : تي شن نفوتها ! تي تقولي بكل وقاحة بنكلم دنياا ! وتبيني نقولك مبروك الخيانه ولا شن
معاذ : انتي خطيبتي خيرك ! هادي محامية صفاء لقضية طلاقها
لمى : ااء
لمى اتصلت بمعاذ
معاذ : شن هالحركات يلي متعلمتيها
لمى : قصدي شن محامية تتصل اخر الليل اهيا
معاذ : والله كتر خيرها البنت ، مهم غدوا مش حنقدر نجيك
" معاذ متفق مع لمى حيجيها ف سوق لما تطلع غدوا مع لارا "
لمى : وليش
معاذ : عندي شيء بنديره
لمى : معاذ !
معاذ : الباين الليله مش حنختموها ؏ خير ف اني بنتدمدر نرقد .
سكر معاذ ورقد فوق السطح
_____
ثاني يوم لميس فاقت جو العشرة ودوشت وبدلت وساوت روحها وقعدت فاتحة قوقل تدور ف طريقة كسكسي لن فاق مجاهد قعد يمس ف سرير جنبه ملقاش لميس طول فاق لقاها مقعمزة متوترة ف كرسي
مجاهد : شنفي
لميس : مجاهد كسكسي شن بندير ساعه ١٢ امتى بتتغدو
مجاهد ابتسم : اهدي توا ، مش فتحتي قوقل ؟
لميس : اي فتحته
مجاهد : خلاص انزلي كوجينة وديري يلي عرفتيه حتى لو مش حلو اني تو ناكله بروحي
لميس تنهدت ونزلت كوجينة لقت مريم تضم
مريم : صباح الخير عروستنا
لميس ابتسمت : صباح نور ، انتتي الكنة الكبيرة صح ؟
مريم : ااي اني الكنة الكبيرة ، عمتي تبيك تديريلها كسكسي ولا خنوريك الحاجات ، تبيني ندير معاك ؟
لميس هزت براسها لا لا : تسلمي نعرف اني وريني حاجات وبري ارتاحي
مريم : اني وتيتلهم الفطور وفطرو وغسلت ماعين مقعمزين ف غرفة جلوس فوق
لميس : خلاص بري ارتاحي تو ندير اني الغداء
طلعت مريم ولميس قعدت تحوس ف كوجينة وتلبز وتحرق لن خشلها مجاهد شدها منن تالي وحضنها
لميس : مجاهد م عرفت شيء راه شن ندير
مجاهد : اني تو نمشي نشوف مطعم اكلات شعبيه ونجيب وجبات كسكسي
لميس : كءيف
خشت مريم مبتسمه : مفيش داعي ‏Ⴢ̤ مجاهد اصلا مش حتلقى مطاعم توا ، اني ولميس تو نساعدها ونوريها شن تدير
مجاهد : ايوا مريومه معانا
طلع مجاهد ومريم قعت توري ف لميس شن تدير خشت ام مجاهد
ام مجاهد : شن تديري مريم
مريم : ااء جيت نشرب ميه انني كنتنا تدير ف غدي مشاء الله ريحة فايحة
لميس ارتبكت بس ابتسمت
ام مجاهد : اذا كان كنتنا فايقه ساعه ١٢ كيف بتطلع غداء توا
مريم : اهي مشاء الله عليها
طلعت مريم ومعاها ام مجاهد ولميس كملت تدير جتها مريم منن جديد وسقتلها بعدين طلعت صفرة الغداء
_______
سعاد : هي تعالو تغدو وينن معاذ
صفاء : فيقته ميبيش
اني : خلوه امس رقد فوق سطح ، انني ضروري يوم نروح حوش باسر قعدت هلبا
سعاد : بتروححي ولا تراجي حميده يجيك
اني تحشمت وطبست راسي
مروة : حتني حسام بيجيني بيروح بيا بعدين
صفاء : وبتفضو الحوش تخلوني بروحي
اني : نوضي روحي معاي حوشش صفاء نهيجو غادي بروحنا
صفاء : فكيني منن امك
اني : مهم نتغدا وبنروح ، محمد قالي خميس بيبعت امه
تكلمت ونسيت انن حناي قاعده بكل طول شبحتلها
سعاد : اطلع ‏Ⴢ̤ حق ربي اطلع 😂😂
اني : مصارليش منن غدا بنروح طول
محمود جي خاش منن جامع : فيش مرواحة بنت اختي بتقعد اهني مفيش مرواحة م عندك م تديري فيه حوش
اني : ااء خالي ماهه ام الولد قالت لبوي بيجو الخميس
محمود : وخلي يجو بيتكلمو مع امك هما شن دخلك انتي بتقعد اهني معانا
اني : خالي منقدرشش ضروري نمشي لخميس.
محمود : قعمزي مكانك مفيش مرواحة تو الاربعاء الليل روحي
اني : تو نشوف
محمود : نطلبش ف رايك هادا امرر
مهم قعمزناا تغدينا وغسلنا ماعين ودرنا نسكافيه مع العصر هكي طول معاذ ناض جري يلبس ف تيشرت بتاعه ف دروج
سعاد : معاذ مستحيل يحول هالحركة منهه ناس تبدل ف دار وتطلع هو لا يلبس تيشرت ف دروج
صفاء : تي باهي مجتش ف سروال جت ف التيشرت 😂
معاذ : طالع اني عندي موضوع
اني : وينن ، مكلماتكش محامية دنيا
معاذ : بعدين نتفاهمو
طلع معاذ جري كافي خاش قارن حواجبه دنيا نقعمزة وتشوف ف اوراق متاعها لن لمحت معاذ واشرتله بيدها كانت طالقة شعرها وباخة هديكا صنة راقيه هي عموما وقنينه
دنيا : تفضل قعمز
معاذ وخر كرسي شوية منن طاولة وقعمز
دنيا : خيرك متعفلق
معاذ مسح وجهه بايديه ومسح ؏ لحيته : واضح عليا ولا
دنيا ابتسمت : هلباا
معاذ : والله امس الليل ضيء هارب رقدت فوق سطح اول م طلعت شمس جت ف نص عيوني قطعت نومتي وكملتها ف دار لوطا ضيء قاعد هارب قعدت نسب شوية لن جي
دنيا : حالة ضيء تعرف
معاذ : كارثه ، خنخشو ف موضوع القضية
دنيا : اسمع نبو شاهد ضروري
معاذ : اهو اني شاهد
دنيا ‏: لا ضروري يكون برا العيلة الشاهد تي حتى ولد جيران جيبه
معاذ : باهي مقدور عليه الشاهد
دنيا : نبي تعطيني تقرير منن بدايه زواجها ‏Ⴢ̤ معاذ
قعمز معاذ يهدرز ؏ دنيا قريب ساعه
معاذ : خنطلب ارقيله اني لان وضع تازم وضروري سبسي ومتقدرش ندخن اهني
دنيا خود راحتك
طلب معاذ ارقيله وحطها وبدي ينفخ ويهدرز مع دنيا
______
لارا : خنمشو كافي نطلبو حاجة
لمى : مخاطريش
لارا : تي هيا نمشو جيعانين تعب سوق
خشت لارا ووراها لمى للكافي ، لارا لمحت معاذ يهدرز مع بنت طول شدت لمى
لارا : اخخي كافي هادا نسيت صاحبتي تشكرش فيه فكينا خنطلعوو خنطلعو
لمى : تي حولي بعد خشيت والله ماني طالعه
لمى دفت لارا وشبحت معاذ يضحك ويارقل وواخد راحته
لمى : قصدك مباش يجيني ؏ خاطر هاديي !!! شوفيي شوففي
لمى عيونها دمعو ومشت جري لمعاذ ودنيا
لمى : ؏ خاطر هادي ‏Ⴢ̤ معااااذ
لمى جبدت طاسة قهوة منن دنيا وبزعتها ؏ حوايجها وحذفت طاسه ف معاذ وطلعت ركبت تاكسي هي ولمى
معاذ : ههيي
معاذ معاش عرف يلحق لمى ولا يشوف دنيا ! بعد م بيمشي للمى رجع وشبح دنيا
معاذ : اسف اسفف هادي خطيبتتي
دنيا: ااء اني اسفه سببتلك مشكلةة
معاذ : لا لا مشكلة شنيي اهيا غير نوضي نوضي امسحي حوايجك
دنيا : عادي معاذ اهدا تو نمسحهم موضوعهم ساهل واحني كملنا خدمة اليوم نتلاقو يوم خميس ف محكمة لو صار شيء نتصل بيك بنقال واسفه مرة تانيه لو سببتلك مشكلة مع خطيبتك.
خدت دنيا حاجاتها وطلعت ومعاذ خلص وركب سيارته قعد يفكر ف لمى وتصرفها كان متعفلق منها هلبا
لمى وصلت حوشهم خشت غرفة تبكي وتبكي خدت نقالها بتتصل بمعاذ تنهي علاقتها بيه
معاذ لما لقاها هي طول رد
لمى : علاش ‏Ⴢ̤ معااذ علاش
معاذ : سكريه فمكك وامسحي دموعكك وفكينا منن دراما وهم اهوا !! هادي المحامية بتاع قضيه صفاء كنت متلاقي معاها نتناقشو ف موضوع صفاء وبس لا اكثرر لو انت دماغك صغير وهكي فكرك نظمي امورك تي كرهتيني حياتي زح تتي ناقصني هم انني تي ياسرر مشكلة اختتي
سكر معاذ ف وجه لمى وحذف نقال ف كرسي يلي جنبه
_____
عند لميس العيلة كلو كسكسي وعجبهم هلباا جت سجى نازله
سجى : شن كليتو صحتين صحتين
لميس ‏: خيرك تاكليش انتي
سجى : مدايره دايت اني حبيبتي بالصحة عليك
جت سجى شدت فلينية لميس
سجى : حححي منن زاراا اهيا لا ضروري نقعمز معاك كنتنا جديدة ونهدرزو
لميس ابتسمت : اكيد
هادي سجى مرة مهند طبعا متخشش كوجينة مليهاش علاقه بحد اهم شيء جمالها وتتابع ماركات ومكياج وهكي واحسن وحدة ف العيلة تطيب حلو عموما
مهم كملو غدي ودخلت لميس ماعين هي ومريم وقعدو يضمو
لميس : شكرا هلبااا لانك درتيلي كسكسي
مريم ابتسمت : م درت شيء انتي درتيه اني ساعدتك فيه بسس
كانت بتول ف فم باب تسمع فيهم وجري مشت للنساوين
ام مجاهد : مشاء الله كنتنا شكلها فالحة
هالة : متوقعتهاش هكي ابدا
خشت بتول
بتول : مش هي يلي طيباتهه مريم طيباته
ام مجاهد : شنوو
بتول : اي سمعتهم يتكلمو
ام مجاهد : بري ناديهمم ونادي الاولاد ترا
مشت بتول نادتهم ونادت شباب وجو
ام مجاهد : صح الكلام يلي قالاته بتول ‏Ⴢ̤ مريمم
مريم : شنفي
خديجة : ان انتتي يلي درتي كسكسي مش كنتي الجديدة
لميس ومريم طبسو راسهم وسكتو
ام مجاهد : ‏Ⴢ̤ خسارة وخلاص الحق مش ففي لميس الحق فيك ‏Ⴢ̤ مريم تكذبي علينا
معتز : تتي حصل خير مهم كلينا وتمينا ولا وكسكسي قنين
معتز فنص ف بتول مرته : وانتتي شن كان فـ‏Ⴢ̤ داعيي للدوة اهياا ولاضروري منها
بتول : شن درت م درت شيء
ام مجاهد : اني طلبت كسكسي مش شيء صعب ! وين امكك معقولة علماتكش تديري كسكسي
مجاهد شد لميس : امي لميس مع وقت حتعرف تطيب ومصار شيء يعني بتتعاركو فكونا منن نفخ تو نوض اني نطيبلكم مكرونه مصارتش
هالة : الله منال العالم
مهم توزعو كل حد خش غرفته
لميس : خيرها بتول هك
مجاهد بتسم : مش قتلك حتعرفي نوعها مع الوقت
لميس : اصلا زبطتها من شواربها الرقاق مع ان معتز ميستاهلش وحدة زيها كويس هلبا
محاهد : معتز معنداش روح مع الماكله اعطيه سم بس
لميس : بس يناري مريم طاحت ف مشكلة بسببي
مجاهد : مريم الام الحنونه تعودت عليهم.
شوية هكي جت سجى نادت لميس ومشو غرفة تقعميز تعلم فيها كيف تحط مكياج واعطتها ماركات مكياج منن عندها خشت هيفاء " المخطوبة "
هيفاء : وروني كيف نديرر ختيبي يحب حاجات هاديي
شوية تاني جو هالة وهنادي
هالة : شن تديرو
سجى : نلعبو كورة شن تشوفي فينا نشوفو ف ماركات ميكب وهكي
هالة : اها وروني معاكم
قعدت لميس تعلم فيهم ،
هالة بصوت واطي : اسمعي شرايك نديرو المقلب متاعنا ف كنتنا جديدة نستقبلوها استقبال حلو
هنادي ابتسمت : هي هي ننزل انني نديره وانتي شوية نزليها
هالة : تمم
قعدو شوية يهدرزو طلعت هنادي وكملو هدرزة هما وتعرفو ؏ لميس اكتر
هالة : لميس انزلي لوطا تلقي مكسرات جيبيهم ونبي باش نهدرزو وناكلوهم
لميس : وين
هالة : دوري دواليب تو تلقي
نزلت لميس وكان دور لوطي ظلام كيف خشت كوجينة فتحت ضيء تطلعلها هنادي منن وراء الباب لابسه قناع يخوف وناضت لميس تعيط لن طاحت ف ارض وبدت تبكي ، نزلو كلهم لوطا بعياط لميس
مجاهد : شنففي
هنادي نحت قناع وبدت تضحك : وووهعليا كنتنا خوافه😂😂😂
مجاهد نزل الارض وقعمز جنب لميس وهي طول حضناته
مجاهد : مبرد عمك زفت بعدين نتفاهموو بصارة اهيا ولا شن
خديجة : تو ناس هكي تبصر لا حول الله وتقولي ليش منتزوجش لتوا منن هبالك لو كنتي عاقله انتتي واختك زي هند وهيفاء بناتي راه توا بصغاركم
مجاهد قام لميس وهي تبكي دخلها دار وحضنها وقعد يسكت فيها ويمسح ف دموعها لن رقدت
______
نسرعو الاحداث يوم الاربعاء ، مصار شيء طبعا كنت ف. حوش جدي روتين عادي ، لميس تعايشت معع عيلة مجاهد مرة تضحك ومرة تزعل وعراك قاعد ، ومعاذ معاش رد ؏ لمى ابدا قاعد متعفلق منها
كنا ف حوش جدي متجمعين عازمين لمى ولارا ♥️ معاذ ميعرفش طبعا
مهم نهدرزو ولمى حكتلنا عركتها هي ومعاذ
لمى : اي ومعاش يبي يكلمني منن يومهاا
شوية هكي جي معاذ نازل
صفاء : تعال سلمم معاذ
معاذ شبح هكي لقاها امى جت عينه ف عينها فنص فيها وجاي بيطلع وهي قعددت تبكي لمى انني طول لحقته
اني : معااذ
معاذ : شنفي
اني : لمى حرام عليك
معاذ : قتلك ؏ تصرف يلي داراته !!! هي
اني : عندها حق حبيبها وتلقاه مع بنت شن تتوقع تدير !
معاذ : تي مش ماشي نلعب انني قتلها محاميهه !
اني : غير اهدا وكلمها توا بتموت را
معاذ : خلي تموت ونبي اني طالع معنديش خلوق للبنات وغدوا موعد جلسة صفاء
شوية هكي جت لمى وشبحت لمعاذ
اني : اني بنشوف بنات
رجعت للبنات وخلي لمى شادة يد معاذ وهو يشبح للجهة تانيه
لمى : حط عينك ف عينني
لمى بايديها شدت وجهه معاذ وخلاته يشبحلها
لممى : ليش هالحركات قصدي ‏ᘓɹ̇ᓄ مفروض يزعل ! تخيلني اني مع ولد هكي.
معاذ حط ايده ؏ فمها : وقتها جنازتك حتكون صدقيني
لمى : خلاص معاذ شن تتوقع رد فعلي ! تي اني نموت غيرة عليك !
معاذ : اول شيء تعرفي ان البنات يلي مش متحجبات يجذبوش فيا ابدا ونشبحلهمش ! وتاني شيء انتي خطيبتي وروحي ! لو منبيكش نقدر نصارحك بهالشيء منن بدايه ! ف اهدي واعقلي وكوني لمى يلي نعرفها اني مصايقني موضوع صفاء ونبي نحله باقرب وقت وبس
معاذ حضن لمى وهي خبطاته
لمى : بارد يعني فيي داعي تدير هادا كله !
مهم تصالحو معاذ ولمى ومر يوم عادي ثاني يوم فقنا بكري طول مشينا محكمة
صفاء : اي مروشتي توا ماشين للمحكمة ادعيلي
مروة : كملي وتحاليلي فـ‏Ⴢ̤ مستشفى نحللك
صفاء : خلاص تم
سكرت صفاء
صفاء : هادي مروة بعدين بنمشيلها مستشفى نحلل
طبعا مروة خدت شهادة تمريض وبدت تخدم ف مستشفى وحطوها ف معمل تحاليل معاهم لوطا واكتسبت خبرة مع الوقت
معاذ : هي وصلنا انزلو وانشاء الله خير
_______
محمد كان يدير ف تمارين ضغط متاعه خشت عليه امه
ربيعه : شن متبيش تمشي خدمة
محمد : لا لا بنكمل تمارين وماشي صالة نتمرن ونلعب كورة مع الاولاد ونجي نرفعك لام لجين
ربيعه ابتسمت : واخيرا وليدي العسل بنفرح بيهه وبنديرله مرا
محمد مقدرش يكمل تمارين صغط وتمدد ف الارض
ربيعه ضحكت : منن امتى حميدتي يطيح ف تمارين ضغط 😂😂😂 نعرفك تدير مية ومتعياش ولا ذكرنا اسم الحب قلبك فرفر
محمد : حاجة زي هكي ‏Ⴢ̤ نبع الحنان
________
بوي : اليوم بتجيك ام ولد معاي ف شركة محمد يلي كان شاديها مدة غيابي ولجين قعدت معاهم لما مسافرين
امي تنهدت : وشن بنديرلها يعني
بوي : استقبليها وخلاص
امي : وشن سبب زيارتها اني مش فاضيه
بوي : تو تعرفي لما تجي
لبس بوي حوايجه وطلع للشركة
_____
لميس كانت ف غرفة تتكلم هيي ومجاهد
لميس : تعرف كنت متمنية انن اماليا جنبي
مجاهد : انتي اخترتي هالطريق متحسسينيش بالندم
لميس : مجاهد انني مستحيل نحس بالندم عارفني ! ونحبك بس تمينت امي كانت موافقه مع انن ميهمنيش رايها بسس ااه وخلاص انسى حبيبي
حطت لميس ايديها حول رقبة مجاهد وباساته
بتول كانت خاطمة وسمعت حديث لميس ومجاهد
بتول : حييي بدون علم امها ولا شنو مفهمتشش خيرها هكي قالت
_____.
مهم احني وصلنا محكمة لقينا دنيا نزلت اني وصفاء ومعاذ جي موعد جلستنا خشينا دنيا عرضت القضية ؏ القاضي وقعدو يتناقشو ف موضوع قضية وهكي ويسال ف صفاء بخصوص زواجها وهي تجاوب
صفاء : مكانش عندنا حوش اصلا نقعمزو فيه ولا شيء كنا منن حوش لحوش ومكانش يصرف عليا كنت مجرد خادمة عندهم لا اكثرر
القاضي قعد يتناقش مع يلي معاه لمدة خمسة دقائق
القاضي : ناجلو الجلسة ليوم الثلاثاء الجاي انشاء الله
مهم كملنا وطلعنا
دنيا : القاضي شبه استجوب معانا بس اهم شيء تجيبو شاهد ف جلسة جايه باش نتاكدو وخلاص
معاذ : انشاء الله ، نعزمكم ؏ فطور توا
دنيا : لا لا مفيش داعي اصلا عندي قضية..
معاذ : عليا الطلاق مفيشش بنعزمكم كلكم
اني ضربته : غير تزوج بعدين ساهل😂
مهم مشينا لكافي جنب محكمة وفطرنا بعدين معاذ حطني ف حوشنا لقيت امي قاعده راقده ضميت وبخرت دنيا نراجي ف ام محمد وههعليا ركبت فوق نكلم ف محمد مباش يرد فوتت نص ساعه هك ورجع كلمني
اني : وين كنت متردش
محمد : نلعب ف كورة كيف طالع مروح حوش انتي وين تلودي منن صبح وما اعطيتينش اي اتصال
اني : مشينا محكمة وروحت حوش توا
محمد : شنصار ف محكمة
اني : عندنا جلسة يوم ثلاثاء باذن الله
محمد : انشاء الله خير
اني : محمد خايفه هلبا اليوم
محمد : متخافيش يلي كاتبه ربي حيصير ، ولو احني نصيب بعض باذن الله حنكونو لبعض
اني : شن قصدك محمد حتستنى النصيب انت !!
محمد : لجين سكري موضوعع اني قريب نوصل حوش نرتاح شوية ونكلمك
اني تنهدت وسكرت ؏ محمد
______
عند لميس تغدو وقعمزو كلهم يهدرزو
هيفاء : خطيبي مريض ضروري نمشي نشوفه
هالة : تي انشاء الله تلحقيه
هيفاء : نعمم شن هالحسد
خديجة : ههي شدي بنتكك شن تدعي ؏ بنيتي وعرسها قريب
ام مجاهد : ونبي تبكشي منن عليا
بتول : مازال ميبوش يروحو ‏ᘓɹ̇ᓄ خدمة رجالتنا
سجى : انني بيروح هنودي وبيطلعني بنشري مكياج
ام مجاهد : هادا همك انتي ، ‏Ⴢ̤ لميس وين مجاهد
لميس : مجاهد حيبدا خدمة قال
ام مجاهد : خيرك محنيتيش انتي
لميس ‏: منحبهاش الحنه
خديجة : كيف عروس مش محنية ضروري يا فالحة
لميس سكتت
بتول : لميسس اماليك وين
لميس : نعم
بتول : امك وبوك وخوتك وخواتك
لميس : عندي راس اخت اكبر مني مش متزوجة وامي وبوي قاعدين
بتول بخبث : خليهم يجونا مرة
لميس : ااء ااي اي انشاء الله مدة جايه حيجو
_____
معاذ وصفاء حطوني ف حوش ومشو مستشفى نزلت صفاء لوطا للطابق يلي تحت الارض لقت مروة سلمت عليها وسحبت منها دم دارتلها تحاليل
مروة : انتتي ديما تشكي منن صبع رجلك وجيتي جيتي يعني خنركبك لدكتور شاطر هكي يشوفها مبين طلعت نتيجة تحاليل
صفاء : لا لا فوتي.
مرة : تي شن فوتي جيتي جيتي انتي
معاذ : ركبيها تشوف دكتور تعدليش عليها ، تي يوميا تشكي منن صبعك بري شوفيه
صفاء استندت ؏ معاذ وركبو فوق خدو رقم بعد نص ساعه دخلوهم للدكتور شبح رجل صفاء
الدكتور : منن امتى هالالم
صفاء : ليه هلبا قريب شهر وشوية
الدكتور : درتي تحاليل او شيء
صفاء : اي توا كيف درتهم
الدكتور : نكويهولك معناها
صفاء شبحتله
الدكتور : متخافيش كوي بسيط توا نديرهولك عشرة دقايق وخلاص ينتهي الالم
معاذ : يلي تشوفه مناسب ‏Ⴢ̤ دكتور
الدكتور كلم ممرضة باش تجهز حاجات الكي " زي التحديد يعني حاجة  تكون سخونه ويحطوها ف المنطقة يلي يبو يديرولها علاج بالكي ♥️"
معاذ شد يد صفاء : اهدي
مروة : فيش تخدير دكتور
الدكتور : ميحتاجش اصلا
صفاء كانت شادة يد معاذ وضاغطه عليها ! الدكتور دارلها الحديد ؏ صبعها يلي يوجع فيها وهي تعيط وشادة يد معاذ وتعض فيه وخلاص لن كمل وهي رقدت ؏ سرير تبكي ! شعور صعب يعني لما حديدة سخونه تمس جسمك ! شعور يقطع فعلا !
معاذ يمسح ف دموعها : خلاص خلاااص كملنا ‏Ⴢ̤ صفاء
مروة : دكتور نقدر نديرلها مسكن
دكتور : اي رقدوها ف اي حجرة فاضيه وركبيلها تغذيه ‏Ⴢ̤ مروة
مروة : تمام
معاذ قام صفاء ودخلوها حجرة ركبولها " مسكن مورفين " ♥️
معاذ تنهد : كويس مسكن اهوا ‏Ⴢ̤ مروة ؟
مروة : اعطيتها اقوى مسكن مورفين تو ترقد شوية وروح بيها حوش اني بننزل نشوف للمعمل باهي ، روح انتت اني بعدين بيجيبني حسام تو نخطم عليكم نتيجة تحاليل
معاذ : اهو ني مقعمز اهني نراجي فيها تفيق
مروة : كان هادا ارفعها ترقد ف حوش احسن ‏Ⴢ̤ معاذ
معاذ : زعما
مروة : اي
معاذ قام صفاء يلي كانت راقده زي جثة مغمي عليها منن مخدر يلي خداته باش يسكنلها الالم ركبها سيارة وروح بيها حوش طول رقدها ف دارها
سعاد : شنفي
معاذ : ماه صبع رجلها دارولها كي باش يريحها
سعاد : وووهعليا منن بنيتي ، لجين اتصلت تطمن قتلها قاعدين روحوش طمنها وليدي منن بكري تتصل
معاذ : تو نكلمها
سعاد : جلستكم ثلاثاء قتلي
معاذ : اي
ركب معاذ غرفته واتصل بيا
اني : شنصار
معاذ : اهو كيف روحنا تحاليل بعدين تجيبهم مروة دارولها كي لرجلها بس
____
محمد : اممي هيا اطلععي عاد وقت
ربيعه : هي وليدي
طلعت ربيعه ومحمد وصلها حوشنا ودرس برا هو يلعب بنقاله
اني لما وصلت ربيعه كنت نراجي ف روشن ونكلم ف معاذ لن سريتها وباب طق حسيت قلبي يلي طق معاه
اني : معاذ بنسكر توا باهي شوية ونجيكم
معاذ : مجتش ام محمد يوم خميس
اني : ااي كيف جت
**
ام محمد فتحتلها ماري دخلتها غرفة جلوس ومدتلها عصير شوية هكي نزلت امي
امي : اهلينن
ربيعه : اهلا كيف حال.
امي : قالي زوجي انك حتجي عندك موضوع
ربيعه : اي والله
امي : خشي فيه طول لاني مشغوله هلبا فضيت روحي بالسيف والله
ربيعه : والله شن بنقولك بنتك لجين قعدت معانا مدة وحبيناها هلبا وتعودنا عليها وهي تعودت عليها
امي ابتسمت : يعني بتتتبنوها ولا شن
ربيعه ضحكت : حاجة زي هكي ، اني عندي وليدي محمد يخدم مع زوجك ويبي يتقدملها
امي : منعطوش احني
ربيعه : كيف متعطوش
امي : منعطوش لبرانيه الحق
ربيعه :وكيف تعطيش لبرانيه
امي : زي م سمعتي معندناش بنات للزواج الحق
ربيعه : بس..
امي ابتسمت : خلاص سكريه موضوع ، شن تشربي نسكافيه ولا قهوة ولا خلاص بتروحي
ربيعه : شكرا بارك الله فيك مرة تانيه انشاء الله توا بنروح
طلعت ربيعه لقت محمد مدرس ركبت سياره وتعابير وجهها تدل ؏ الحزن
محمد : شنفي
ربيعه : قالت تعطيش لبرانيه
محمد : شن تعطيش لبرانيه هادي بمزاج بوها ، وربي عرفتها بتدير عمهم حركات اهيا
_____
كنت ف غرفتي متوترة وقريب نبكي لن خشت امي درت روحي طبيعيه
اني ابتسمت : شني ‏ᘓɹ̇ᓄ جي ‏Ⴢ̤ امي
امي بصوت عالي : تتامري عليا انتتي وبوك غير يججي بوكك بسس ليلته سودااء صارر بتديريلي زي لميسس !! لاا متحلميش ‏Ⴢ̤ ماما متحلميششش فوتيها فكرة محمد ! شني قعمزتي معاهم شهرين نظمتي امورك مع الولد خلاااص !!! عجبكك !! ردي بالكك تحلمي بيهه حتى ف الحلم فاهمهههه
طلعت امي واني سكتت بصراحة كنت متوقعه رد هالفعل بس محمد وعدني اننه مش حيرضى بكلام امي وحيحاول لن ياخدني معدلتش عليها لبست عبايتي وقلت بنمشب حوش جدي خير منن الهم يلي مع امي
______
وصل محمد حوش متعفلق ويسحن
ربيعه : متقلقش روحك وليدي باذن الله نرجعلهم يوم تاني
محمد ‏: امها ‏Ⴢ̤ بنقتلها ‏Ⴢ̤ بنقتلها
ربيعه : اهدا وليدي اكيد حتوافق ، قالت متعطيش للبرانيه
مي : برانية شن ونبي امها مريضة ، مفروض لجين تدير زي لميس
محمد فنص ف مي : شن لميس اهيا ردي بالك تجيبيلها هالفكرة اني نبي ناخدها بموافقه اماليهاا
ربيعه : حميدة تقلقش نوعدك هالبنت باذن الله ليك انت
محمد سكر نقاله وحذفه
_____
وصلت حوش جدي خشيت متعفلقه
معاذ : شنفي
اني حضنت صفاء وبستها : شنجوك توا احسن
صفاء : اي احسن بهلبا
اني : قتلكم خلوني نمشي معاكم مستشفى
صفاء : تي اهو كويسه ني
معاذ : خيرك قارنتيهم
اني : امي
معاذ : رفضت محمد ولا
اني هزيت براسي اي
معاذ تنهد : عارفها اصلا امك هادي حاله متخافيش تو يلقو حل ‏Ⴢ̤ لجين
صفاء حضنتني : تزعليش
معاذ : تو نكلمه محمد نشوفه ونجي
طلع معاذ ولع سبسي واتصل بمحمد لقاه مقفل
جت مروة وخش معاها معاذ
معاذ : شن نتيجة تحاليل.
مروة شبحت لصفاء : غبارتك سوداء زيدي كولي شكاليط زيددي ! تراكمي متاعك 12
اني : نهار احرففف
معاذ : وشن معناها هادا
اني : تراكمي هادا كمية سكر يلي متراكمة ف جسم الانسان ، طبيعي يكون منن اربعه ل ستة ، وهي 12 !
مروة : ضروري تاخدي علاج سكر ‏Ⴢ̤ صفاء وباقرب وقت وتشوفي دكتور سكري وتبدي تنظمي ف علاج وتاخدي الايباري راه نسبة تراكمي هلبا
صفاء تغيرو ملامح وجهها وجايه بتنوض شدها معاذ
معاذ : وين
صفاء : مش ناقصني نبدا مدمنة ! ناخد دواء هادا ! اني كويس ومعع وقت تو يختفي ومتناقشونيش ف هالمووضع مش ناقصهه ابدا
معاذ : صفااء
صفاء نحت يدها منن معاذ واستندت ؏ حيط لن ركبت غرفتها
معاذ تنهد : متكلموهاش ‏Ⴢ̤ عيله براحتها
مروة : تي شن براحتها نقولك عندها سكري وتراكمها عالي ومش راضيه تاخد علاج وتقولي خليها براحتها
اني شبحت لمروة : اسمعي موضوع ايوب ماثر ؏ نفسيتها خليها مدة هادي نكملو قصة ايوب وباذن الله نلقو حل ونخلوها تتعالج هي مش متقبله فكرة مرضها بسس
ركبت اني لصفاء طقيت باب
اني : افتححي
صفاء :مفتوح خشي
خشيت لصفاء حضنتها
صفاء : لو بتكلميني ؏ مرض فوتي
اني : لا لا بنقولك مستعده لجلسة ثلاثاء
صفاء : اي انشاء الله ، وانتي تزعليش اكيد حميده مش حيخليك
اني : م كلمنيش غريبه
صفاء : اتصلي بيه
خديت نقالي واتصلت بمحمد مقفل عيوني دمعو
اني : مقفل
صفاء : تبكيش حميده مستحيل يخليك يحبك هلبا را
______
روح بوي استقبلاته امي بالنكد
امي : صار باعتلي امم يلي معاك هاداا باش تخطب لجين
بوي : اي ووين غلط
امي : فهمني حمار انت ولا تبي بناتك يضيعو !! عندك عادي تعطي بنتك لشخص معنداش مستقبل !! فهمني بس عاددي !! خيرك
بوي : محمد راجل وحيحميها
امي : اي راجل صح ! شن فايده معنداش حياة حلوة يعيش بنتي فيها ! بنتي مش حتعيش مرتاحه زي م كانت ف حوش اماليها ! اهو انت ديما خدمة ومخلينا ف حوش بروحنا بس حمدلله حالتنا كويسة ويلي نبوه يجينا ! بس تخيل بنتك خليتها لمحمد !! هو حيخدم وهي تقعد ف حوشهم يلي ابصر كيف شكله مع ناس ابصر كيف شكلهم وتعاملهم برايك بنتك حتتحمل !! راه نزبطهم ناس يلي ف طبقة هادي !! ييبي ياخدها باش يتقرب منكك ومنن شركتك وفلوسك وانت حمار تبي تعطي بنتكككك !! راه هادي لجين الدكتورة بنتت قيس ! وبنت فاطمه تعطيها لهالمحمد ! فكر بعقلك
قعدت امي تعيط ؏ بوي وتكشخ عليه
روحت اني حوش لقيت اصواتهم عالية مدورتش خشيت غرفتي اتصلت بمحمد مقفل قعدت نبكي شوية لن رقدت منن بكي
_____
لميس : ريت امي رفضت محمد لجين بتموتت
مجاهد تنهد : الله غالب محمد مش حيسكت وحيحاول معاها وكان موافقتش ف نهاية حيخطفها.
شرين نقال لميس
لميس : بوي
ردت لميس
لميس : ايوا بوي
بوي : كيف حالك بنتي
لميس : كويسهه بخير شنحالك انت بابا
بوي : كويس ‏Ⴢ̤ عيون بابا غدوا باذن الله حنجيك
لميس : الله
بوي : والله
لميس : بسيارة
بوي : لا لا حجزت طياره معع عشيه تطلع جو ساعة نوصل
لميس : توصل بالسلامة ‏Ⴢ̤ رب
بوي : خلاص امالا قوليلي ؏ عيلة مجاهد وشن يحبو وهكي باش نجيبلهم هدايا غدوا هكي قنينه
لميس ابتسمت : تمام
سكرت لميس وحضنت مجاهد
لميس : جوددي غدوا بوي حيججي طيارته صبح
_____
محمد كان ف غرفته مجاش نوم يدخن ويتامل ف صقف !!
شد نقاله وهو متردد اتصل بيا قريب اربعه مكالمات مرديتش كنت راقده خامس مكالمه شديت نقال لقيته هو طول قعمزت ف سرير ورديت
اني :ًمحمد
محمد : هم
اني : متسكتش خيرك متردش عليا بنموت كنت والله
محمد تنهد : واضح ؏ صوتك كنتي تبكي
اني دموعي نزلو
محمد : متخافيش اني امي حتجيكم مرة تانيه ولو حارت بارت ! بنخطفك وبعدها يزوجوني ليك بالسيف
اني ضحكت : نحبك هلبا محمد
محمد : وني نموت فيك خلاص ارقدي
اني : نلا نبي نهدرزو مستاحشاتك
محمد : اسمعي كلام
اني : محمممد به بنرقد وخليك ؏ خط
محمد : حاضر
رقدت وركبت سماعات ف ودني ومحمد كمل دخانه وتمدد ؏ سرير لن رقدنا معبعض
_____
ثاني يوم فقت لقيت بوي فايق وواخد شنطة سفر صغيره وامي مقعمزة ف كريي تفطر غريبه فايقه بكري
اني : وين
امي : بوك بيمشي للميس
اني : حي ليش مقلتليشش بنمشي معاك
بوي : مرة تانيه لجين اني حجزت طياره عشيه تو بنطلع بناخدلها هدايا ليها ولعيله مجاهد
اني تنهدت : سلملي عليها هلبا بابا
حضنت بوي وفهالحضن كان فيي مليون سؤال ! بخصوص مووضع محمد ليش بوي متكلمش مجابليش سيرة دار الحوله علاش !!!!
طلع بوي وهو فاتح واتس يشوف. فرسائل لميس بخصوص هدايا خدي هدايا وجي موعد طياره طول ركب
***
لميس : بوي اتصل بيا كيف اططلع
خديجة : ايحح لغدوا باش يوصل
لميس : لا لا ساعه بس
هالة : شن جاي ببساط علاء الدين ولا شاد ف يد سونيك باش يجي ف ساعه
لميس ابتسمت : لا لا بطياره
خديجة : اها معبيين
معتز : نمشو مطار اني وانت مجاهد نستقبلوه
لميس : حتني بنمشي
ام مجاهد : لا لا خليك ف حوش لميس تو يمشو مجاهد ومعتز قعمزي ضمي مع بنات
بتول : وين امك ‏Ⴢ̤ لميس ليش مجتش
لميس : ااء مريضه امي وبتسافر اصلا
بتول : ااها نحسابك متعاركة معاها بسس
ركبت لميس غرفتها وشوية هكي ركبلها مجاهد
محاهد : السوسة بتول نحس فيها تعرف بمشكلة امك مشعارفه ليش
لميس : الضعيفه هادي ام شوارب رقاق يلي ظوافرها مش باينات كم ليها تلقح الكلبة وجهها تقول ضاربينها بافيكو
مجاهد ضحك وباس لميس : محلاها المتعفلقه
____
مهم اني طلعت غرفتي ضميتها دوشت وطول مشيت حوش جدي هدرزة وضحك اني وصفاء
___
وصل بوي للميس هديكا الاحضان والبكي ونزل هدايا كان كل كيس عليه اسم شخص منن عيله اعطاهولهم الاىلاد كلهم جابلهم توت ايدادس وسبيدروات والنساوين كبار قفاطين وصنة وشبشب حوش وعلاقه ذهب وسجى وبنات جابلهم بارفانات ماركة وميكب ، ولميس جابلها نقال جديد وبارفانات وتيشرتات تحبهم هي قعمزو استقبلو بو لميس هلبا وحبوه
بوي : انني خننوض بنمشي فندق توا
مجاهد : وين ‏Ⴢ̤ عمي عيب حوش قاعد وكبير
بوي : شوف عندي حوش صحابي هلبا اهني لو قعدت معاك حيزعلو ! وبعدين اني حاجز ف فندق ويراجو فيا غادي عندي اجتماعين
مجاهد : ولو ‏Ⴢ̤ عمي اقعد معانا
لميس : بوي اقعد معانا
بوي : والله حتجيكم يوميا غير لو قعدت اهني حيزعلو مني قتلك وبعدين فندق قريب عليكم اهو طالعلي ف لوكيشن
ام مجاهد : لوكيشن ولا لكوليشن هادا شعوذة ولا جن ولا شن
هالة : اس اس اممي فضحتينا
مجاهد تنهد : خلاص تمام عمي
رفع مجاهد بو لميس فندق باش يرتاح غادي
____
نسرعو احداث شوية مر كم يوم جي يوم الاثنين ام محمد حتجينا مرة تانيه ! قضية صفاء قاعده زي م هي جلستها غدوا ! اما رجلها معاش توجع فيها يومين فاتو منن بعد الكي ومعدلتش ؏ سكري وقاعده تاكل ومدورتش ومخدتش علاج ! ومحمد يخمم ف مووضوع امي ! اما بوي كان مع لميس طول ؏ اساس يوم ف الليل حيروح "
جتنا ام محمد حطها هو ودرس قدام باب يتنهد ♥️!
خشت ام محمد غرفة جلوس ومشت ماري تنادي امي جت اممي ولقت ام محمد قعدت واقفه ومربعه ايديها وتشبحلها
امي : اهلين
ربيعه : كيف الحال
امي : لو سمحتي اني معنديش وقت لو جاية ؏ خاطر نفس موضوع فوتي قلنالك
ربيعه : غير فكينا منن جو متعطيش للبرانيه وهالحركات !!
امي : شوفي مش قصة برانية بس قصًة مستويات ! الاشكال يلي زيكم نعرفها عينكم ؏ فلوس !
ربيعه : شنو
امي : لو عينكم مش ؏ فلوس مالا شن !!! قصدي فكري بعقل بنتي وين وولدك وين ! بنتي بفلوسها تقدر تشريكم كلكم ! ولدك مستحيل يعيشها عيشة زي م هي عايشتها اهني ! ناس مستويات وطبقات ! فكري بعقل شويه ومعاش تطقي بابي !! معاش تجي !!! اني بنتي فيي واحد يبيها وحياخدهاا توا اعطى فيها كلمة خلاص ريحينا وباب يستقبلكك هييي ! هادا ناقص ناس معندهاش لا كرامه لا هممم اول مرة لزيناك شن جاية تاني تديري ولا ضروري نلزوكم فقش ، دقيقه بس اصبري
ربيعه : خيرك انتي !!
فتحت امي شنطتها وطلعت فلوس حذفتهم لام محمد
امي : هادم فلوس تحلميش تشديهم ف يوم ! لو مرادك فلوس خوديهههم واقلبي وجهك منن علينا بسس واي مبلغ تبيه خوديه مهم ريحيني ! وتوا لو سمحتي اطلعي براا.
ربيعه كانت ساكته ممصدومة ودموع ف عيونها امي شدتها منن يدها وطلعتها برا حوش !
طلعت ام محمد وخاطرها مكسور هلبا ركبت سيارة ودموع ينزلو منن عيونها
محمد : شنفي ادووي
ربيعه : غير برا تو نقولك
محمد : اممي متخلينيش ننزل نفجرها توا شنففففففففففي
ربيعه : قالت ان فيي واحد عاطي كلمة ف لجين
محمد : كيف مسمعتش شن عاطي كلمه اهيا
ربيعه : غير برا الحوش
محمد كان سايق بسرعه ومتعفلق ويفنص وصل امه حوش نزلها ورجع طلع
قعمزت ام محمد تبكي خشت دوشت وطلعت منن جديد تتفكر ف كلام امي وتبكي !!
______
اني كنت نسمع ف اغاني وفرحانه ! لان محمد مستحيل يخلينني يعني حتى لو امي رفضت اكيد هو حيدير حل !  خشت امي زي الغوله وشدتني منن شعري
امي : مش قلناا معاش تبعتتتيه هالولد ولاا
اني : شنففي
امي : نقولك حاجةة فيي ولد يبيكك وحيجي اسبوع جاي ياخدك تبي م تبيش غصب عنك حتوافقي فاهمهه !! وهلي باعتيهه مسحت بكرامة امه الارض وكانه راجل يوريني ووجهه هو ناقصني هالناس
اني : مش حنوافق مش زي م تبي انتتي اني بنعيش معاه مش انتي
امي ضربتني كف : بتسكري فمك وبتوافقي ويلي اختررتهولك حترضي بيه فاهمهه !!
طلقتني امي وني قعمزت ف سرير نبكي
_____
محمد اتصل ببوي رد عليه
محمد : ايوا
قيس : اهلا محمد
محمد : كنت نبيك ف مووضوع طول مدة فاتت عرفت انك مسافر ف معاش قادر نصبر لن تروح حنقولهولك توا
بوي : اني يوم ف الليل مروح صبح تلقاني ف شركة
محمد : موضوع يستناش للصبح
بوي : تفضل شنفي
محمد : اني تقدمت للجين مرتين وحضرة مرتك رفضت
بوي تنهد : شن بنقولك ‏Ⴢ̤ محمد الكلمة الاخيرة للام يعني وهي تعرف مصلحة بنتها والله غالب انتت شوف بنت تانيه وربي يجمعك بيها
محمد : شنو
بوي سكر ؏ محمد وهو قربع نقال ف كرسي سيارة يلي جنبه
اي بوي اقتنع بكلام امي التافه !! بوي انسان طيب ويمشي بودنه الحق وكلمة امي هي يلي تمشي ف نهاية للاسف ! رغم ان بوي كان عاجبه محمد وهلبا بسس كلام امي خلاه يقتنع ويرفض محمد ! محمد هديكا اللحظة حس بكسرة وهلبا روح حوش سمع امه تتكلم مع مي وتبكي بعبرتها وتحكيلها امي شن قتلها بالتفصيل
مي : خلاص امي معاش تبكي حسبي الله ونعم الوكيل
خش محمد ؏ امه ومي ، وكان قارن حواجبه متعفلق هلبا عضلاته بارزات وعروق ، دم كان يمشي فيهم بسرعه منن كتر ما كان متعفلق !
محمد : هادا كلهه وساكتهه !!!! قتلك هادا كلهه وسكتتتي !! تي معاشش يلي يبي يبكيك تي طز فيها هي وبنتههها تخلي بنتها عندها معاشش يلي ينزلك دموعكك ‏Ⴢ̤ اممي
ربيعه ‏: محمد اهدا وليدي برضاي عليك انني كنت نبي نفرح بيك وبس والله ‏Ⴢ̤ محمد نبي نفرحك بيكك وبس.
محمد خش غرفته وقربع باب اتصلت بيه مليون مرة يسكر ف وجههي !! قعمز شوية يفكر بعدين خش ؏ ماسنجر !
______
بعد كلام امي وانها جايبتلي عريس جتني صدمه سكتت شوية نستوعب موضوع اتصلت بمحمد مليون مرة كان يسكر ف وجهي تخيلو !!! اتصلت بمي مقفل ! معاش عرفت شن ندير فوتت شوية وقت وني نصلي وندعي وخلاص لن وصلتني رسالة ؏ ماسنجر وجتني صدمة وقتها معاش عرفت نقتل روحي ولا نبكي ولا شن ندير!!!
___
مي : صنة دخان معبيه حوش
ربيعه : هادا محمد ‏Ⴢ̤ كبدي عليه ولدي ااه وخلاص ! رجع للدخان معاش عندي مًندير
مي : يناري ؏ لجين هكي امها معقولة
ربيعه تنهدت ومسحت دموعها : خلي نفوت هكي ونرجع نكلم لجين ونشوف خوالها بالك يتدخلو نكلم محمد يشوف معاذ
مشت ربيعه طقت باب غرفه محمد
محمد : خلوني ف حاللي فاهمين خلونني ف حالللي !
ربيعه : محمد افتح
محمد : قلنا خلوننني
ربيعه : محمد
محمد فتح باب وطول طلع برا حوش
_____
معاذ كان فوق سطح ضيء هارب كالعادة يسبس ويسب ف وزير كهرباء شرين نقاله رد
معاذ : الو
ايوب : شني وين تريس مقدرتش تطلقهاا مش قتلك صعب عليككك !! صدقني مش حتطلقق وحنرفع اني عليكم قضيه وناخد مرتي منكم بالسيفف وحتشوفو شن يصير وقتهاا
_____
هادي حلقات يوم شن رايكمم شن توقعاتكمم !! محمد شن حيدير ! وربيعه هل حتحاول تكلم ام لجين ‏ᘓɹ̇ᓄ جديد !! وام لجين منن هو العريس يلي تكلمت عليه وهل لجيم حتوافق ولا لا ! وشن شبحت لجين ف ماسنجر باش انصدمت هكي ! وصفاء شن حيصير فيها هل حتتطلق ولا لا ! وايوب هل حيدير يلي قال عليه ؟