الرواية :السراب
الگاتبة :طيبة
===================
انا الوياك
جنت الروح بالروح
وانا بلياك
وين روحيتي تروح ؟
تعال مسامحك
والعتب مسموح
حرام تضيع عشرة عمر
وتروح ..
هذا انت العزيز وخنت بيه
شلون الغربة بعد تحن عليه ؟
حسيت على المنبه الساعه 5 ونص
كمت بس بداخلي غصه نهضت وكعدت ع الجربايه تذكرت
شكد جان احمد يحجيلي عن الجامعه ويحمسني الها جان دائما
يكول اني اقدملج بيدي وادخلج للكليه واني ايدي بيدج واخلي الدنيا تدري مريتي ناجحه وافتخر بيها
وبابا جان يكول ماريد بدنياي غير بس اشوف بنيتي بكلياتها وتصير مسؤولة عن نفسها
و مروان لمن جان يتشاقه وياي
_اكص ايدي واعلكها بالبنكه اذا تطلعين من السادس من اول دور اذا متاخذي مقاوله
واني جنت من كل عقلي اداهر واصدك وازعل عليه
مسحت دمعتي ودعيت الله يرحمهم ويرجع بابا
كمت توضيت وصليت ورديت لبست ملابسي ولفيت الشال لفه بسيطه وحطيت مسكارا وحمره خفيفه
و توني ردت اطلع سمعت شذى تحجي من ورايه
_شو وجهج عليه خل اشوف صينيه االكيمر الي راح تطلع
ابتسمت ودرت وجهي
-يا ماشالله طالعه تجنينين بس لو شويه حمره اطوخ
_لا عفيه لا والله هاهيه احس كثرت اصلا
-ع راحتج يلا كون الله يوفقج ويسعدج وكل خطوه يارب تكون خير الج
غوركت عيني بدمعها تذكرت امي وادعيتها رحت لشذى حضنتها حيلل
_الله يجبر بخاطرج ويسعدج مثل متسعديني
_يااا روحي هسه ليش الدمع مو عيب كبرتي وصرتي بجامعه
هههههه
؛_هههه يلا خل اروح
مسحت دموعي ورحت لغرفه رواد قبل لا ادخل الها سمعت صوته من جوه
_اني هنا هنا
نزلت بكل فرح جوه ولكيته كاشخ وكاعد ينتظرني بالحولي
-صباح الخير
_صباح الخيرات يابه شون صباح هذا والحيويه والكشخه
لو ندري من زمان نخليج اداومين
ابتسمت بمجامله وطلعنا للكراج
لكيت كعيد يرش بالحديقه باوعتله
_صبااحو كعود
_هلا صباح الخير عمه
بين ما يطلع السياره رواد وكفت يمه
_لا تكول عمه كول جلنار
غمز وعض شفته بخفيه
-بس جدام عمي رواد بس جدامه
-هههه خوش خوش
_حترحين للكليه
_اي شمدريك
_عمي كالي
_اهاا يلا لعد خل اروح ادعيلي
_الله معااج الله يرزقج ويسعدج
مشيت مبتسمه على فطاريته وكلامه
صعدت السياره اللتفتت عليه رواد بخزره
_كلامج ومنطقج واخلاقج ماريدهم هيج بالكليه فهمتي
باوعت مستغربه
-ليش شبيه
عوج حلكه بتقليد
_صبااحوو كعوود
ابن عمج ابن خالج وهيج ميانه رجال غريب متعرفين اصله من فصله شنو بدون مستحه انتي
-مو موقصدي ن...
قطع كلامي وكال
_لا تضلين تلغين بطلي الميانه خووش لا احشك حلكج فهمتييي
هزيت راسي بهضيمه وبلعت دمعتي الي غصت عيني بيها ابد محد جان هيج يحجي وياي صدك لو كالو البنيه بدون اهلها مذلوله ومكسوره ومتكدر تفتح حلكها
أنت تقرأ
السراب
Ficción Generalالاحداث تبدأ من محافظه الانبار لتنتقل فجاءة لمحافظة اخرى بنت بمنتصف العمر تبدأ حياتها بالانقلاب تابعوا لمعرفه الاحداث....
