خادمة القاسي

الجزء 14

🍷🥂خــادمـة الـقاسـي🥂🍷
   
قنعاتو بكلامها ...كانت صغيرة فاش مات باها يعني حتى هو عمرو خرجها وكانت مزال ماوصلاتش لسن القراية.

كيسر:عارف بلي كنتي فقرية نائية ماشي شي قرية لي قريبة من المدينة  ....نتي ساكنة فالعروبية ديال والماس و والماس براسها ماشي مدينة كبيرة اقليمكم هو خميسات وخميسات بعيدة عليكم ببزاف .....يعني حتى الهضرة  ديالكم ماغاتكونش مشابهة وغاتكون مفرقة بالنسبة  للقرى لخرين  ولا حتى للناس لي ساكنين فالمدينة...كمثال نتوما كاتقولو الكابوس وهادي كلمة عربية امازيغية فالوقت نفسوو وحنا كانقولو السلاح ولا البيسطولي ولا المسدس  وكاين لي كايقول الفردي ولا القدار العور  وكل بلاصة وآش.... وعارف بلي ماعندكمش الضوو وكيما قلتي اغلب الناس خدامين بالطاقة الشمسية وماكايستعملوش المسائل الكهربائية باش مايضيعوش بزاف يعني ماغاتعرفيش بالحوايج لي كاتخدم بالضو ولي أغلبها كايستعملوها غير ناس المدينة...وحتى ناس المدينة فيهم لي ماكايخدمش بيهم يعني على حسب امكانياتهم....و وماعندكش صحابات وقتك كولو كنتي كادوزيه فالرديم عند الناس يعني واخا تقولي تستافدي منهم هوما لي كايقراو ماكانش كيفاش وحتى عارف بلي  الناس لي كنتي تاتسخري ليهم كبار فالسن هوما براسهم ماقاريينش وواخا يكونو قاريين ماغايكونوش كايعطيوك وقت حيت باغين فيك غير حاجتهم. و
ماعمرك نزلتي حتى لمدينة والماس ولا شفتيها باش غاتعرفي  بهاد الأمور لي كاينين فالمدينة؟! ولكن غير ماتقلبيش لشي حاجة  السمية.... فحال البيسي سميتيه البورطابل لي كايتحل وكايتسد... السوشوار سميتيه الرابووز... الجاكوزي سميتيه البانيو ...الماكينة ديال الصابون سميتيها الثلاجة القصيرة لي كاتشطح...الحدادة سميتيها الباطو الحامي....الكرافاطا سميتيهاا القجاجة....  لي ما عرفتيهاش سوليني عليها ونوريك ماتعدايش عليهم بدوك السميات الغريبة لي كاتجيبي  من راسك.

حبسات ضحكتها وحنات براسها كاتهزو وتحطو بالإيجاب.

وقف فبلاصتو وتقدم للبلاكار حاط السلاح فالمجر مكانو ووقف عليهاا داير يديه فجيابو ناطق.

كيسر: الأمية كاتخلي البنت تبان مكلخة و غبية  وضعيفة الشخصية....القرايا كاتخليك تبان واعي وفاهم وكيما قلتي نتي زاعم...الى بقيتي هكا غانعاني معا ك بزااف حيت انا من النوع لي ماكايحملش يعاود الهضرة و يشرح كثر من مرة ونتي كاتخليني ندير هادشي وهكا كانسخط ونجعععر ونقدر فأي لحضة نجري عليك  بلاا مانفكر.

هزات فيه راسها دغيا فاش سمعاتو قال غايجري عليها ودغيا تغرغرو عينيها.

كيسر: نتي دماغك خفيف وفهمك سريع ومطيعة كاتسمعي للهضرة  ...... هادشي علاش من اليوم  غاندير معاك حصص خاصة فوقت خاص نقريك فيه هكا  تخرجي من دوامة الجبن والغباء وتخرجيني من قوقعة الأعصاب لي كايجيوني بسبابك.

كيسر: كانخدم 4 ايام فالسيمانة ....النهار لي مانكونش خدام فيه غاتاخديه...غانحاول نعطيك شوية من وقتي ونوريك لي من قبل ماشفتيهاش ونعلمك لي ماتعرفيهاش ونسمعك بلي ماسمعتيهاش....واخا؟!