حكاية براءة بقلم رندا رمضان

الفصل العاشر

هذا الكسر 💔
الذي يملأ اركان قلبك
وتابي عينيك ان تظهره 🥺😔
ابقيه كما هو سيجبره الله
الله وحده🍁🍂🥀

*************
كانت حياه وهاجر يتابعان حديث عمر وبراءه لتتدخل حياه قائله بسخريه موجهه لبراءه : - بقا احنا نسيب شغلنا ومستقبلنا وانترفيوهنا مخضوضين علي حضرتك  وفي الاخر نيجي نلاقي الهانم بتحب هنا
لتبتسم براءه بخجل بينما عمر مسح خلف رأسه بحرج من حديث حياه واردف :- احم معلش ياجماعه سوء تفاهم واتحل خلاص يلا بقا عشان تلحقوا الانترفيو

لتنظر له براءه بتساؤل يتحول لمرح : - انترفيو ايه ،  دانا لو دخلت احتمال الراجل اللي جوه ده يبلعني لا ياعم انا مش لاعبه

لينظر لها عمر بتهكم وهو يقول بصوت منخفض :- ادم يبلعك دانا بخاف علي نفسي وانا معاكي قال يبلعك قال و الله انا خايف عليه منك

ليسمعه الجميع وتكتم هاجر وحياه ضحكاتهم. بينما براءه قالت بغيظ :-  بتقول حاجه يا عمر

ها لا يا بيبو انا اقدر اقول حاجه برضه وبعدين  يلا بقا ندخل  وانا هتكلم مع ادم. هكذا اردف وهو يسبقهم ناحيه المكتب ليجد ان ادم قام بجميع المقابلات وحده عادا الثلاث فتيات

***************
داخل غرفه ممدوح بالمشفي
سميحه وهي تجلس بجوار اخيها : - عامل ايه دلوقت يا ممدوح

ممدوح :  الحمدلله من وقت ما براء سامحتني وانا مرتاح كنت خايف اموت وانا شايل ذنبها

سميحه. بخوف حقيقي: - بعيد الشر عنك يا اخويا انا قولتلك لازم نقولها انت اللي مكنتش بتسمع الكلام

ممدوح بحزن: - كنت خايف اتصدم فيها هي كمان بعد اللي عملته مديحه وكمان كنت  خايف متسامحنيش

سميحه بود: - يعني كده مش زعلان ان براءه عرفت مع ان مش انا اللي قولتلها والله

ممدوح بابتسامه :- لا سميحه مش زعلان. بس انا عايز اعرف هي عرفت منين انت منا مش كل ما اسالك انتي وبنتك تقولوا مقولنالهاش اكيد يعني مش بتشم علي ضهر ايدها

سميحه بضحك علي حديث اخيها : - لا مبتشمش علي ضهر ايدها البت فرحه قالت لعمتك عفاف وعمتك هي اللي قالتلها

ممدوح بذهول :- وهي براءه تعرف عمتي عفاف منين دانا اخر مره شوفتها يوم ما جوزها مات من اكتر من 10سنين

سميحه: - براءه كانت بتروح مع امها الله يرحمها لعمتك يطمنوا عليه كل شويه ولما امها ربنا افتكرها بقت تروح هي وفرحه وياخدو بالهم من عمتك ويجيبوا كل اللي يلزمها