ကျွန်တော့် ဆည်းလည်းလေး (U/Z) {Completed}

အပိုင်း (၁၉)

'လောက၌ရှိသော လူသားအားလုံး ကြောင့်ကြခပ်သိမ်း ကင်းငြိမ်းကြပါစေ၊ စိုးရိမ်ခပ်သိမ်း ကင်းငြိမ်းကြပါစေ၊ နှလုံးစိတ်ဝမ်း အေးချမ်းကြပါစေ၊ စိတ်နှလုံး ရွှင်ပြုံး နိုင်ကြပါစေ'

'ဖရဏာပီတိ ဂွမ်းဆီအိသကဲ့သို့ ပီတိတွေနှင့်လည်း ဝေဖြာနိုင်ပါစေ၊ အတွင်းရန် အပရန်ဟု ဆိုအပ်သော ရန်အပေါင်းမှလည်း ကင်းဝေးနိုင်ပါစေ၊ အားလုံးစုံသော ဘေးအပေါင်းမှလည်း ကင်းဝေး နိုင်ပါစေ၊ ကိုယ်ရောစိတ်ပါ ကျန်းမာချမ်းသာစွာဖြင့် မိမိ၏ ခန္ဓာကိုယ် အတ္တဘေးကို နိဗ္ဗာန်တည်းဟူသော သောင်ကမ်းသို့ ပို့ဆောင်နိုင်ကြပါစေ'

ဖာ့နှင့် မို့လေး၊ ညီမငယ် သုံးယောက်။ ကျွန်တော် ချစ်ရသော မိသားစု။ ကျွန်တော် ကာကွယ်ရသော မိသားစု။ သူတို့လေးတွေ ကိုယ်ရော စိတ်ပါ ကျန်းမာ ချမ်းသာကြပါစေ။ ပြီးလျှင် ခွဲခွါရသော ကိန္ဒရာမောင်။ ရင်းနှီးရသော သူစိမ်းလေး။ ထိုသူစိမ်းလေးသည် နိုင်ငံရပ်ခြားမှာ ပညာ ကောင်းစွာ သင်ယူနိုင်ပြီး မိဘ အားကိုးရသော သားကောင်း ရတနာ ဖြစ်လာပါစေ။

ရွှေဝါရောင်နှင့် သပ္ပာယ်လှသော မြတ်စွာဘုရား၏ ရုပ်တုတော်ကို ယုံကြည်ကိုးစားမှုနှင့် မော့ကြည့်သည်။

မာရ်နတ်စစ်ကို အောင်တော်မူသော မြတ်စွာဘုရား။ ဪ ဒေဝပုတ္တမာရ်ကို သာမက ခန္ဓမာရ်၊ ကိလေသာ မာရ်၊ မစ္စုမာရ်၊ အဘိသင်္ခါရမာရ်၊ မာရ်ငါးပါးစလုံးကို အောင်မြင်တော်မူသော မြတ်စွာဘုရား။

မြတ်စွာဘုရားဟူသည် အောင်မြင်တော်မူသော သူ။ အောင်မြင်ခြင်းမက အောင်မြင်တော်မူသော အရှင်။ ထို့ကြောင့်လည်း မြတ်စွာဘုရားကို ဇိနဟု လည်းကောင်း၊ မာရဇိဟု လည်းကောင်း ပူဇော်ခေါ်ဆို ကြသေးသည်။

အဓိပ္ပါယ် ကြီးပါဘိ။ ကြည်ညိုဖွယ် ပြည့်ပါဘိ။ အားတက်ဖွယ် ရှိပါဘိ။

ကန်တော့ခြင်း ငါးပါးနှင့်တကွ ရိုသေစွာ ရှိခိုးကန်တော့ခြင်းဖြင့် ကျွန်တော်သည် မနက် ဝတ်တက်ခြင်းကို အဆုံးသတ်သည်။

အိမ်အောက်ဆင်းကာ တစ်ကိုယ်ရေ ဝေယျာဝိစ္စတွေ အမြန် လုပ်ဆောင်၏။ အားလုံး ပြီးသော် ပြန်လာစဉ် မို့လေးလည်း ထလေပြီ။ ထမင်း၊ ဟင်း ချက်လေပြီ။