نهوة حارث

البارت الثالث

،،،،،،،،،،،بقلم الكاتبه فطومةة،،،،،،،،،،،

بنت عمي رفل نهيت عليها ما تتزوج غيري ولو تزوجت والعباس چيله براسها وراس اللي ماخذها وعمي يطلع من العشيره..
كالو لا حقك احنه من باجر نطلع لبغداد ونحاجي عمك ونخطبلك المره ولا يكون خاطرك الا طيب انت الغالي ابن الغالي مره تكّدر خاطرك.. ما مقبوله
كتلهم : كفو منكم بس انه تحز بنفس عمي يرفضني.. جا شعايزني.. شنهي مو زلمه بعينه وبعين بته.. حتى لو كاعدين ابغداد واخذو اطباع بغداد يبقون منا وبينا.. وبته احنه عمامها احق الناس بيها..
كالو لا هاي اعتبر السالفه خلصانه..
………
رفل اجيت من المدرسه فد يوم واشوف الصاله مالتنه كلها رياجيل لابسه عكل ودشاديش عرفت ذوله من عمامي..
دخلت ومهتمت.. بعدين سمعت صوتهم عالي وصياح طلعت وشفت امي تضرب على خدودها وتضرب ايد ابأيد..

كتلها شكو ماما.. اشرتلي اسكتي.. تصنتت وياها..
يكلولون لابويه عيب عليك ابن عمها وترده.. هو احق واحد بيها.. ابن عمها ستر وغطا الها..
وبتك متصير لغير حارث.. باوعت لماما كتلها: ذوله شديخربطون.. ؟
-اسكتي مصيبه وكعت على روسنه..
لشوي طلعو منه زعلانين.. اجا ابويه عيونه نار..
كلناله.. هااا شكو ؟

-حارث ناهي على رفل ما تتزوج..
امي كالته وين عايشين بيا تخلف شنو ينهي عليها..
اكو قانون واشتكي عليه..
كال الها : ماكو قانون يحمينه من العشاير.. ذوله منه وبينه.. يعني لو سويت شي ضدهم يهجمون بيتي..

باوعلي بتوسل. كال بابا اقبلي بحارث..
- مستحيييييل ما اقبل اني اخذ هذا الهمجي.. والله لو اموووووت ولا اصير لواحد مثله

عفتهم ودخلت للغرفه و اسمع ماما تحجي وياه و مخبوصين.. لليل جريت التيليفون وخابرت عمر.. كتله هذا ابن عمي نهى عليه..

- يعني شنو..
-شمدريني.. يكولون يعني ما اصير لغيره.. ولو خالفتهم انقتل اني واللي ياخذني.. 
- ذوله وين عايشين شنو هالتقاليد الهمجيه..
- شسوي ذوله عمامي مكروهين ابد ما احبهم من عقولهم.. عدهم المره اداة فقط لخدمة الرجل والاطفال.. ما الها اي حقووق

- معليج حبي لو اعرف اهد الكون اخذج اخذك..

ضحكت وكتله : واثقه بيك الله يخليك اليه..
بقيت مستمر بعلاقتي ويه عمر.. ولا همني هالشي.. ومرت سنه و عادي بعدها محد فتح السالفه بس انعرفت عند العالم كلها

ابن عمي ناهي عليه حتى بعد محد تقدم لخطبتي ابببد.. وكل اليجي يخطب بعدين يعرف ابن عمي ناهي عليه يروح بعد ما يرجع

بس عادي ويطبهم طوب عمر حبيبي يكفيني ومراح يعوفني..
…… .

حارث.. بعد ما راحو عمامي لبيت عمي وهم رفض ينطي بنته.. ثبتت نهوتي عليها.. وبس تفكر تتزوج تنكتل..
بس كتلهم بعد لحد يروح ولحد يوصل.. هاهيه رفل نهوتي عليها وما تطلع لغيري.. مصيرها تقبل ورجليها فوك راسها