نهوة حارث

البارت الخامس

إياك وكسر الخواطر .. فإنها ليست عظاماً تجبر بل أرواح تقهر !❤

،،،،،،،،،،،بقلم الكاتبه فطومةة،،،،،،،،،،

كتلهم والقران الشريف ما اتحرك خطوه وهاي بدون عبااا.. كالت هاي شنو هاي.. عندي اسم..
كتلها انجبي لا اسطرج والله.. مو ابالج اهلج هنا وامج واكفه واسمح صوتج يعله هنا ادفنج والعباس.. المره اليعلى حسها عدنه.. نكص السانها ونشمره...

هيه بقت ادردم وامها تكرص بيها.. لبسنها كوه عباه وكالن لبست كوم.. اعاينها العيون حمر من البجي..
كلت يله امشن.. مشيت على ابن عمي جاسم كتله اريد الكوستر توصلنه للعرب كال يله امشنه.. اخذ امه ومشينه

و3 من عوائل عمامي ركبو ويانه.. صارو واحد فوك الاخ بالسياره.. 21 راكب.. والركبو بيها 80 هههه

والفروخ يبووو تسطر من الصياح والدوخه.. ادور طفل ويه طفل يصيرله واهس يتخبل.. النسوان راح صوتها من الصياح

كالت امي.. يمه حارث صوتك خشن طلعه علفروخ هجولونه.. كتلها يمه خل يتونسون.. صوت الفروخ ولا صوت الصواريخ والقصف..
الله يخليهم سالمين وشكد ما يلعبون فدوه.. جا انه المن جايبهم.. غير اريد اطلعهم من جو الحرب اللي كتم نفوسهم
وصلنه العرب مزارع وشطوط والجهال نطلقت والنسوان يسلمن ويتباوسن.. واحنه الزلم طلعنه نفر العرب نسلم انه وعمامي
استقبلونه احسن استقبال نزلو الغده سمج ولبن وخظره وتمن ولحم واشكال الوان.. كملت طلعت اغسل حلكي واديه لكيت رفل واكفه بالباب

خزرتها واشرت طبي جوه.. طبت ووكفت وره الباب والولد هوسه اخاف لا يعاينولها.. غسلت ومشيتلها.. كتلها هااا

ما ردت بعد مغنتبه.. كتلهن ذيج النسوان تتغده امشي اكلي.. كالت ما احب السمج واللحم.. كتلها چا شتاكلين.. كالت اريد نستله..
كتلها خاب شبيج غبره وما بيج خير هاي خيرات الله سمج ولحم وتردين نستله.. ما ردت.. كتلها فوتي انه هسه اجيبلج..
كالت لا دزيت طفل راح يجيبلي.. كتلها لا ودع البزون شحمه.. ولج ذوله مو فروخ شياطين.. تلكيه اخذ فلوسج وشرد..
دخلتها وسديت الباب.. تمشيت.. لكيت بسطيه زغيره كاعد بيه رجال جبير.. سلمت واشتريتلها اجباس وحلويات.. ومشيت..
رديت الباب.. لكيتها واكفه يم الباب بعدها.. كتلها هاج اخذي ..ضحكت احس فرحة طفل بعيونها لما شافت الحلويات..
اخذتهن وكعدت على جذع نخله مكصوص ومسويه مقعد ..كعدت تاكل.. عاينتلها ابتسمت.. كتلها تشبعين بذن ..كالت اي ..كتلها بالعافيه..
عفتها ومشيت.. للنسوان سلمت على عماتي وحجياتنا الكبار ..عاينت لخواتي كتلهن هااا ترحن للبستان

كال يله علوااا ..كتلهن لبسن.. كامن لبسن واخذتهن بستان مال خضروات واكو فواكه..
دخلن خواتي يحوشن طماطه ويه اهل العرب.. انه رحت للهوش لزمت الهايشه وكلتها.. كلت العمتي هاي حامل..

كالت اي.. بس ذيج توها جابت.. كتلها بيها حليب.. كالت اي هواي تطي حليب.. خلت الجدر عمتي وكعدت تحلب بيها وانه اعاينلها
عاينت هناك رفل تباوعلها.. كتلها احلبيها انتي ..ضحكت كالت ما اعرف كتلها جربي.. كامت عمتي كالت ڪربي حلبيها..
كعدت علدچه وبأطراف اصابعها تكض ثدايه الهايشه.. ضحكت بصوت عالي كتلها لا تزلغين ثديها بأضافرج وتزكطج كضيها عدل
كالت اشووون كتلها باعي يلمايعه.. تقربت ولزمت الهايشه وحلبت شوي هيه خربت ضحك.. صفنت شلون ضحكه.. اتكول مسيقى