نفق الجحيم

١٣

توفيق سمع إن همام والسيد طفشوا وانطعن وشه بالغضب، وفكر إن داي لعبه منهم، فدخل لبيوتهم بعد ماخلي الحريم تاخد ساتر وفتش عليهم البيتين وملاقاهمش،وكمان كلف حد يلفله عليهم البلد كلها من شرقها لغربها يدور عليهم وبرضوا ملهمش أي اثر.. فقعد توفيق علي حيله وهو حاسس بالعجز ومش عارف يعمل ايه ولا يسوى إيه، وشايف من العدل إن همام هو اللي يتجوز البت مش حد غيره لأن هو السبب وهو الظالم البادي.

وشويه وعاود على بيته والهم راكبه من ساسه لراسه وراح قعد جار مخلوف علي مصطبته وبقلة حيله قاله:

دبرني ياوزير، وديه بعد ماحكاله عن هروب التنين الأندال وطفشانهم من البلد، ومخلوف فضل ساكت معارفشي يقوله ايه ولا يشور عليه بأيه فموضوع لا فيه شور ولا قول ولا ليه غير حل واحد وهو اللي اتقال ومتنفذش. 

عم السكوت دقايق بعدهم رفع توفيق راسه من الأرض وبص بعينه للمربوط في الشجره بعيد واتنهد بمراره وهمس لمخلوف:

ياهل تري يامخلوف داي آخر واكبر طمايم كرار ولا حداه حاجات اكبر؟ مع اني مظونش إنه فيه أكبر من اللي عيمله ديه ولا هيكون..ولا اقولك.. مش هظون حاجه؛ عشان ولدي كل مره عيخلف ظني ويعمل اللي عمره مايخطر فخيالي.. طيب بذمتك أني لو كتلته على إكده مش اصلح ليه وليا.. والله وبالله لو كان حداي كرامات وععرف الجاي داسسلي إيه كنت عيملت كيف مالخضر عيمل في الغلام الصغير وخلصت الدنيا من شروره.. آاااخ يابوي على عمي البصر والبصيره واللي عاملينه فيا يامخلوف اااخ. 

مخلوف رد عليه بنبره هاديه وهو عيحاول يخمد النار اللي عتاكل فيه وكل:

إستغفر ربك ياتوفيق ديه كله قدر ومكتوب ومسطر عالجبين، ولازمن المكتوب يتقرا ويتشاف ياخوي.. هدي حالك بس إنت واللي سيرها هيرسيها. 

رد عليه توفيق بوجع: ولا بينها مرسى ولا واعيلها بر يامخلوف.. مواعيش غير بحر غويط من الهم وأني واقف فنصه وولدي كرار عيشدني لتحت عايز يغرقني.. واني عامل كيف اللي ليه ايام فنص البحر وقوته خارت وخلاص مبقاش فيه حيل يشابي ويعافر اكتر من إكده. 

مخلوف: هونها بس انت وهي هتهون لحالها والعُقد ليها حلال.. المهم.. مش كفايه على كرار إكده واروح افكه الواد تلاقي رجليه بادوا من الوقفه عليهم من عاشيه والبرد نخر جتته.. مش يوبقوا أُس الفساد حرين وعيرمحوا في الدنيا والمهبل اللي إنضحك عليه متربط وعيتعذب.