نفق الجحيم

٢٣

نفق الجحيم ٢٣

شام سلمت أمرها لله وإتقدمت على المواعين ولمتهم كلهم جار الطرومبه وجابت الطشت والعاوين(رماد الفرن)

وإبتدت تحاول تفرك فيهم بيد وحده من غير ماإيدها المنصابه تلمس العاوين،

لكن غصب عنها كان بيوصلها، وتقوم كل هبابه تغسلها من الطرومبه وتعاود تاني، لغاية ماإهتدت لإنها تثبت الماعون بين اقدام رجليها عشان تعرف تتحكم فيه، وتقدر تفركه بالعاوين بيد وحده.. وإستمرت عالحاله داي لغاية ماخلصت المواعين والعذاب اللي شافته فيهم بسبب وجع يدها ماشافته عمرها.. وبعد ماخلصت كان جرح إيدها ملتهب بزياده من الميه والصابون والعاوين اللي حصلها

وحتي رجليها اللي عمر الوسخ معرفلهم طريق إتبدل لونهم الاوبيض للون سواد الحلل اللي إتمسح فيهم

وحاولت لحد ماتعبت تنضفهم وترجعهم كيف الاول بعد ماخلصت غسيل المواعين وحتي فركتهم بالعاوين، لكن السواد كيف مايكون إتطبع وشم على رجليها ورافض يسيبهم.

وهمت عشان تعاود على أوضتها اخيراً، بس وهي يادوب عتخطي أولى خطواتها على بره الموطبخ.. لقت حوريه داخله عليها ووراها حريم البيت كلهم كيف مايكونوا طابور عسكر، ووقفت فطريقها حوريه وقالتلها:

على وين ياسنيوره؟ ديه معاد تجهيز العشا، همي جهزى مع الحريم.. اركبي مع بدور نزلي ماجورين رايب من فوق، وامرسوا جبنه خضره مع طمام، وانتي ياورده انتي ونعمه اسلقوا بطاطس وحمروها، وانتي يافكريه إغلى لبن، واني وعدويه هنقمروا العيش.

وهي خلصت توزيع المهام والكل اتحرك ينفذ فوراً.

وطلعت شام مع بدور على السطوح عشان تنزل مواجير الرايب، وبمجرد ماوصلت السطح جريت على سوره، وبقت تتلفت لبعيد وتدور وتلف من الأربع جهات بتوع السور، لعلها تعرف سكته أو تلاقي لرؤيته سبيل.. لكن للأسف الشجر كان محاوط البيت من كل الجهات، وكان اعلى منه لدرجة ان شام حست إنه عازله عن كل الدنيا كيف مايكون سجن وقضبانه فروع وأوراق الشجر.

عاودت شام بخيبة أمل لبدور اللي كانت واقفه وعتتطلع لشام بإستغراب علي جريها وتنطيطها من زاويه لزاويه كيف ماتكون مضيعه حاجه وعتدور عليها!

وبمجرد ماوصلتلها اتنهدت وهي عتقولها:

وينها مواجير الرايب؟

ردت عليها بدور وهي عتقلب فأديها بعجب:

المواجير اهه قدام عنيكي تحت القفص الجريد.. قلي القفص وطلعي ماجورين يكونوا رابو.

بس قبل المواجير قوليلي كنتي عتتطلعي على أيه وعترمحي عالسطوح عشان تشوفيه؟

ردت عليها شام بعدم مبالاه وهي عترفع القفص:

كنت عدور على أبو قلب حديد.

بدور: قولتي أيه؟

شام: قولت إن فيه ٤ مواجير رابو وعايزين يتقشطوا.