So This Is Love!

1

Scroll Down for Zawgyi

'' ထိုင်ခုံနေရာကို ဒီမှာကပ်ထားတယ်...
နေရာလဲချင်တဲ့အကြောင်း ကွန်ပလိန်းတွေ မတက်ကြရင်ကောင်းမယ်... ဒီစာသင်နှစ်ရဲ့ ပျော်စရာ ပထမဆုံးနေ့လေး ဖြစ်ပါစေ... ထိုင်ခုံမှာနေရာယူပြီးရင် သင်္ချာစာအုပ်ထုတ်ရအောင် ''

သင်္ချာဆိုတဲ့အသံကြားတာနဲ့ ကျောင်းသားတွေက ပြိုင်တူပဲ တညီတညာ ညည်းညူကြတယ်။ အတန်းပိုင်ဆရာက သင်္ချာဆရာဖြစ်နေတာနဲ့တင် ဒီစာသင်နှစ်က ပျော်စရာဆိုတာ မသိကိန်းတွေရှာတွေ့မှ ပေါ်ပေါက်လာနိုင်တာမျိုးပဲ ဖြစ်လိမ့်မယ်။

စာသင်ခန်းရဲ့အဝင်ဝမှာ ရပ်နေတဲ့ အတန်းပိုင်ဆရာကို ဝင်လာကြတဲ့ ကျောင်းသားတွေက ခါးကိုင်းနှုတ်ဆက်သွားကြတယ်။ အချိန်က အတန်းစဖို့အတော်လေး နီးကပ်နေပြီ။

'' ရှောင်းကျန့် ''

ဆရာရဲ့ မျက်နှာက ချက်ချင်း ရွှင်လန်းသွားပါတယ်။ဒါကတော့ ရှောင်းကျန့်ဆိုတဲ့ ကျောင်းသားကို ဆရာ၊ဆရာမတိုင်း နှစ်သက်ကြတယ်ဆိုတဲ့ သဘောပါပဲ။ အဲ့ဒီအပြင် ရှောင်းကျန့်ဟာ သင်္ချာဘာသာရပ်မှာ ​အမြဲတမ်း အမှတ်၁၀၀ ရနေကျ ကျောင်းသားလည်း ဖြစ်တယ်။

အများအမြင်နဲ့ပြောရရင် မသိကိန်းတွေကို ရှာဖွေရတာ သဘောကျတဲ့ကျောင်းသားတစ်ယောက်ပေါ့။

'' သားထိုင်ရမှာက ဟိုမှာ ''

ရှောင်းကျန့်က အတန်းထဲ နောက်ဆုံးမှ ဝင်လာတဲ့ ကျောင်းသားဖြစ်တယ်။ ဒါ့ကြောင့်လည်း ခြေလှမ်းခပ်သွက်သွက်နဲ့ပဲ ထိုင်ရမယ့်နေရာမှာ ဝင်ထိုင်တယ်။ဒီနှစ်အတူ ထိုင်ရတဲ့ ကျောင်းသားက သူ့အတွက် မျက်နှာသစ်ပဲ။

'' ဟိုင်း ''

သူက တိုတိုတုပ်တုပ် နှုတ်ဆက်ရင်းပဲ စာအုပ်တွေထုတ်ဖို့ ပြင်လိုက်တယ်။ သူ လှည့်ကြည့်မနေပေမယ့် ဘေးက မရင်းနှီးတဲ့ကျောင်းသားက သူ့ကို ကြည့်နေသေးတယ်ဆိုတာ သူသိတယ်။

'' ဒါဆို အတန်းစကြတာပေါ့ ''

အချိန်တိကျတဲ့ ဆရာရဲ့စကားအဆုံးမှာပဲ အတန်းတက်ခေါင်းလောင်းသံက တပြိုင်နက်ထွက်ပေါ်လာတယ်။ အဲ့သည်နောက်တော့ တိတ်ဆိတ်သွားတဲ့ စာသင်ခန်းမှာ ဆရာဆီက စာရှင်းနေသံသာ ကျန်ရစ်ခဲ့တော့တယ်။