So This Is Love!

6

Scroll Down For Zawgyi

မီးမထွန်းထားတဲ့ အခန်းငယ်ရဲ့ထောင့်တစ်နေရာမှာ ရှောင်းကျန့်က ဒူးတွေပိုက်ပြီးထိုင်နေရင်း သူ့ရဲ့လက်မောင်းတွေဆီ သူ့လက်တွေနဲ့ပဲ ဆုပ်ကိုင်ထားတယ်။ သူ့ရဲ့ ပါးပြင်တွေဆီမှာ မျက်ရည်စတွေရှိနေတယ်။

လူငယ်ပီပီ အချစ်ဇာတ်လမ်းတွေမရှိဖူးခဲ့တဲ့သူက သူ့ရဲ့ လိင်စိတ်တိမ်းညွှတ်မှုကို သတိထားမိသွားတဲ့ အခိုက်အတန့်ဟာ မှောင်မဲနေတဲ့ ဒီအခန်းလိုပဲ။

မထင်ခဲ့ဘူး။သူ ဘယ်တုန်းကမှမထင်ခဲ့ဖူးဘူး။ သူက ယောက်ျားတစ်​ယောက်ကို စိတ်ဝင်စားမိတဲ့ ဂေးတစ်ယောက်ဖြစ်နေမယ်လို့။ မိန်းကလေးတွေအပေါ် စိတ်ဝင်စားမှုမရှိတဲ့ သူ့ရဲ့စိတ်ကို သူက လုံးဝ သံသယကင်းစွာ နေခဲ့တာ။

'' ဘာလို့လဲ ! ဘာလို့လဲ! ဘာလို့ ငါက! ''

တိုးငြင်းတဲ့ရှိုက်သံတွေက စကားကိုအဆုံးမသတ်စေဘူး။ သူ့ကိုယ်သူ လက်ခံနိုင်ဖို့ သူ ကြောက်ရွံ့နေမိတယ်။ ဒူးတွေပေါ် ခေါင်းငုံ့ချပြီး လက်တွေက ဆံပင်တွေဆီ တင်းနေအောင် ဆွဲဆုပ်ကိုင်ထားမိတယ်။

' ငါက ဘယ်တုန်းကမှ မင်းနဲ့သူငယ်ချင်း မဖြစ်ချင်ခဲ့ဘူး '

ပြန်ကြားယောင်မိတဲ့ စကားသံကြောင့် သိမ့်ခနဲဖြစ်သွားတဲ့ နှလုံးသားက လိမ်မညာတတ်တာတော့ အမှန်ပဲ။ မျက်ရည်တွေကြား အရူးလို သူ့မှာပြုံးမိလိုက်သေးတာကြောင့်

'' ဘုရားရေ... ရှောင်းကျန့် မင်း သူ့ဆီမှာ တော်တော်လေး ကျရှုံးနေပြီပဲ ''

အတွေးတွေနဲ့ ဖြတ်သန်းရတော့မယ့် သူ့ရဲ့ညလေးမှာ လေပြေတွေပါ တိတ်ဆိတ်သွားတယ်။ ကွေးထားတဲ့ ဒူးတွေကို ပိုလို့ကွေးကျုံ့ရင်း ပြတင်းပေါက်မှာ အလှဆုံးသာပြနေတဲ့ လဆီ စိတ်တွေလွှတ်ချရင်းပဲ ထိုင်ငေးနေခဲ့မိတော့တယ်။

.
.
.
.

'' ရှောင်းကျန့် ငြိမ်လှချည်လား ''

အတန်းချိန်မရှိတာမို့ ရှောင်းကျန့်က ရှန်းယုံတို့နဲ့အတူ စာကြည့်တိုက်မှာ ရှိနေတယ်။ ဆက်တိုက်အတွေးများနေခဲ့တဲ့ ရှောင်းကျန့်က ပိုင်ရယ်ရဲ့စကားကိုကြားမှ လက်ထဲက စာအုပ်ကိုချလိုက်မိတယ်။