ဇီးချိုသီး ချိုမြမြအချစ် (ဘာသာပြန်)

Chapter - 2

[Unicode Version ]
" ကလောက် ကလောက် "

ပိုက်တံနှင့်ရောယှက်နေသော ဖန်ခွက်ထဲရှိ ရေခဲတုံးများ တစ်ခုနှင့်တစ်ခုတိုက်မိရာမှ ထွက်လာသောအသံများဖြစ်သည်။

ခွက်တစ်ဝက်တောင်မကျိုးသေးသည့်
Green Tea Latteအား သူကြည့်လိုက်ပြီးနောက် အရှေ့ကလူဆီသို့ တစ်ဖန် အကြည့်ပို့လိုက်လေသည်။ အင်ဒယ်ဟန်က ဖန်ခွက်ထဲ၌ရှိသော လိမ္မော်ရည်လက်ကျန် နည်းနည်းလေးကို ပိုက်တံသုံးကာ ရေခဲတုံးများနှင့်အတူ မွှေလို့နေ၏။

အင်ဒယ်ဟန် နှင့် သူသည် ယောကျာ်းလေးနှစ်ယောက် အတူတူလာရန် ကြောင်တောင်တောင်ဖြစ်နေသည့် ဘေးပတ်လည်တွင် ပန်းများဖြင့်အလှဆင်ထားသော Room Cafeဆိုင်တစ်ခု၌ ရောက်နေခြင်းဖြစ်သည်။ လေအေးပေးစက်မှလာသည့် ပြင်းထန်သောလေများကြောင့် သူ့ကျောင်းယူနီဖောင်း​အတွင်း၌ ကြက်သီးများပင်ထလို့လာလေ၏။ ခေါင်းစောင်းကာ ဆိုင်ကိုလှည့်ပတ်ကြည့်ပြီး သူ့အကြည့်များကို ဒယ်ဟန့်ဆီသို့ ပြန်ပို့လိုက်လေသည်။

အင်ဒယ်ဟန်က လိမ္မော်ရည်များကို ဆက်မွှေလို့မရတော့တဲ့အခါ ပိုက်ကို စားပွဲပေါ်သို့ သူလွှင့်ပစ်လိုက်တော့သည်။ ပြီးတော့ ဖန်ခွက်ကိုမြှောက်ကာ ပါးစပ်ထဲသို့ ရေခဲတုံးများကို ကောက်ထည့်လိုက်၏။

" ဂျွတ်! ဂျွတ်! ဂျွတ်! "

ရေခဲတုံးများသည် သန်မာသောသွားများကြား၌ အစိတ်စိတ်အမွှာမွှာကွဲကြေကာ အစပင်ရှာမရအောင် ပျောက်ဆုံးသွားကြ၏။ နောက်တစ်ကြိမ်၌ ထိုကဲ့သို့ ဝါးစားခံရမည့်အရာက သူဖြစ်လာနိုင်လောက်သည်ဟု အာရုံရနေမိသည်။

အားနည်းကာ အထိမခံပုံပေါက်သည့် သူ၏ ပင်ကိုယ်ပုံစံကြောင့် ဒယ်ဟန်ရဲ့ အအေးသောက်ဖို့ခေါ်ခြင်းအား သူမငြင်းနိုင်ခဲ့ပေ။ ပြီးတော့ အခု အင်ဒယ်ဟန်ရဲ့ပုံစံကို ကြည့်ရင်လည်း မည်သူကမှ သူ့အားငြင်းရဲမည် မဟုတ်လောက်ပေ။

အင်ဒယ်ဟန်ဆိုတာ မာကျောကြမ်းတမ်းပြီး ခန္ဓာကိုယ်တောင့်တောင့်ဖြောင့်ဖြောင့်၊အရပ်ရှည်ရှည်နှင့် ဂျယ်ချွန်းဒုံက သားတစ်ယောက်ဖြစ်သည်။ သူ့လို အရပ် ၁၇၅စင်တီမီတာ သာသာလေးသာရှိသည့်လူနှင့် ဆန့်ကျင်ဘက်ပင်။
(T/N: ယောင်ဟွန်းလေးအရပ်က ၅ပေ၇လက်မလောက်ရှိပါတယ်)