قصص عراقيه قصيرة

سجينتي .11.

كل شئ يمر وليس كل شئ يُنسى..!
.........

قراءة ممتعه للجميع

......

عاد السؤال  باوعتله باشمئزاز
دفرني بطني نزلي عينج لاافكسها  منين.جبتيهن أحجي ويلوح بيهن كدامي بأيده ..

رجع للكنتور طشر  الملابس ويدور مثل المخبل
مااعرف شعبت براسه  وشكلتله  هلحيه الصفرة

طلع علاكة فلوس ثانيه ..
باوعلي وحتدت ملامحه أكثر  وصاح بصوت قشعر جسمي منه  احسبلج من واحد للتلاثه .. لو تحجين منين جبتيهن لو ماراح اكلج شسوي بيج

واحد هو يحسب واني ابجي .. احسه يعد  ثواني موتي .. رغم كل الخوف الي تملكني بس محجيت

ثنين .. ..

تلاثه .....

...شمر الفلوس بلگاع ونزع حزامة
لزمه من جوة وخله الحديده يضرب بيها

صوتي راح من الصريخ ..ختلت بين الجربايه والحايط تمنيت اموت بهلحضه من الوجع
حديده الحزام طبعت بكل مكان
ضرباته تلسع بجسمي

ندفر الباب ودخل الحجي وكرار  وامه كرار لزمة  والحجي عاط شبيكم دخيل الله متفهموني .. اذا انت القاضي جبير البيت من بعدي حلال المشاكل  هيج تصرف بحيونه

كرم يابه لاحد يدخل بينه .. اليوم ادفنها اذا معرفت منين جابت هاي الفلوس ..

عاط كرار ذني فلوسي وفلوس كنان ضاميهن عدها

انت لا تدخل اعرفك تجذب علمود تحميها

كرار لامااجذب خابر كنان  هسه وسئله ..

ام كرم .. كعدت يمي حضنتني وتبجي واني ساكته بس الدموع تجري .. 

ابو كرم .. لبسيها خلي ارجعها لاهلها
انت مومال مرة .. همجي رجعي

كرم ماتطلع منا اكسر رجليها ....

رد الحجي بصياح .. هو بكيفك   اني صوجي
هسه ارجعها .. المن جبتها وخليتها بذمتي ..

خلت ام كرم الحجاب علئ راسي .. وسندتني
انزل وياها ..  وصوته عالي يحجون  الضاهر خابر كنان

دخلتني لغرفتهم .. فرشتلي فراش بلكاع
نمت عليه .. غطيت راسي وابجي
علئ حضي الطيحني يم رحاب خلصت من امجد وامه .. اجيت لرحاب وكرم
دعيت علئ روحي .. الله ياخذني ويخلصني ..
سمعت صوته بعدة يعيط فوك  

بعدها بدقايق
دخل الحجي  ...اسمعه يحجي ويه ام كرم
لمي ملابسها باجر اخلي يطلكها وارجعها
يصير بيها شي بذمتي بعد المن حجيت بيت الله