جات وقفت قدامي وهي ماسكة صندوق السجاير في يدها وبتهز فيهو بغضب وقالت لي والزعل ظاهر على وشها:
تاني يا ميامن؟ تاني رجعتي ليها؟ مش قلتي لي إنك خلاص خليتيها وبقيتي ما بتشربيها وتاني نهائي ما ح ترجعي لي دربها دا؟ طيب ممكن تفهميني دي شنو؟ وبتعمل شنو في دولابك؟ " وهزتها لي بيدها " ..
خطفتا منها علبة السجاير بحركة سريعة كدا وقلت ليها وأنا بدس فيها في الدولاب بحذر: بلقيس يااااخ وطي صوتك دا شوية لانو ماما لو سمعتك هسي ح تجينا وإنتي عارفاها ما ح ترتاح إلا تعرف في شنو....
قالت لي أنا بتكلم معاك وريني رجعتي تاني للسجاير ليي بعد ما حلفتي أنك ح توقفيها؟...
قلت ليها أنا حاليا ما فاضية ليك وعندي مشوار ضروري لمن أرجع منو بعدين نتناقش في الموضوع دا....
قالت لي بعدم أستيعاب: مشوار؟؟ عارفة الساعة كم يا أستاذة؟ .. عاينت لي الساعة الكانت موجودة في يدي وقلت ليها 8:30 مساء .. قالت لي ميامن الوقت أتاخر والناس في الوقت دا بترجع البيت مش بتمرق منو!...
قلت ليها وأنا بصلح في شعري في المرايا: نووو الوقت لسه بدري يا ماما ، المهم خلينا من الوقت شعري دا أتكوى كويس؟ شكلو ظابط؟....
أتجاهلتني وقالت لي ماشة تقابيليهو تاني صاح؟؟ أنا مش قلت ليك الولد دا ما بينفع معاك والولد دا قاعد يغش عليك؟ إنتي لي ما عايزة تفهمي إنو البتعملي فيهو دا غلط كبيير؟....
قلت ليها ماشة معاهو عرس أصحابنا ما ماشة أقابلو هو براهو، بعدين دا عرس أريج يا بلقيس وإنتي عارفاها هي صحبتي وقريبة مني كيف وأنا الاسابيع الفاتت كلها كنت جارية معاها في التجهيزات معقولة ما أحضر عرسها في النهاية؟...
قالت لي برضو يا ميامن برضو ما صاح تطلعي في وقت زي دا....
قلت ليها وأنا بخت يديني على أكتافها: بلقيس يا حبيبي أنا أتاخرتا شدديد وولد الناس دا بكون منتظرني برة ف لو سمحتي ممكن نتاقش لمن أرجع؟ ممكن!...
قالت لي صدقيني البتعملي فيهو دا غلط كبيير وبابا ح يزعل منك لو عرف البتعملي فيهو، ميامن إنتي فاهمة الحرية إلادانا ليها بابا غلط، الحرية ما إنك تشربي سجاير وتطلعي وتنزلي مع أولاد وكمان تمرقي في وقت متأخر وتلبسي لبس فاضح زي دا .. أبوي بخاف أنو يزعلك عشان كدا مخليك على راحتك ومديك حريتك الكاملة لكن إنتي ما مفروض تستغليها بي الطريقة دي، بعدين هو ما عارف الإنتي بتعلمي فيهو ولو عرف ح يزعل منك شديد....
هزيت ليها رأسي وأنا بمشي فيها وقلت ليها: أوكي أوكي أنا فاهمة الحرية غلط إنتي بس أدعي ربنا يهديني وهسي خليني أمشي .. قالت لي دايما قاعدة أدعي ليك...
حضنتها وقلت ليها أصلا إنتي حبيبتي....
قالت لي طيب ممكن تلبسي طرحة؟ .. وعاينت لي بنظرة كدا وتابعت باقي كلامها وقالت لي عليك الله ألبسيها عشاني يا ميامن..
