وأنا بفكر كدا وبسأل في نفسي هل بالجد أستعجلتا لمن وافقت أعرس بلال زي ما قالت بلقيس ولا لا، أمي نادت لي وقالت لي يا بت يا ميامن .. قلت ليها ايواا يا ماما .. قالت لي تعالي الغدا .. قلت ليها طيب جاية .. ومشيت برة للأكل....
أثناء ما نحنا بنأكل بلقيس قالت لي أمي بهظار: رأيك شنو يا ماما من بكرة نبدأ نعلم ميامن طبيخ أم رقيقة والبامية والخضرة والملاحات دي عشان لمن تسافر ما تفضحنا مع نسابتها والناس الهناك، وأهم شي نعلمها طريقة العصيدة إنتي عارفة ناس البلد بحبوها كيييف .. قلت ليها بغيظ: بلقيس أحسن ليك تختيني، ماما أتكلمي معاها يااااااخ .. ماما قالت لي ما تشتغلي بيها كتتتير برااك عارفاها عايزة تغيظك، وبعدين إنتي يا بلقيس من قبيل شغالة تقولي البلد البلد على فكرة شندي دي مدينة وفيها أي شي ممكن تكوني دايراهو إنتي بس عشان ما مشيتي ليها عشان كدا فاكراها زي البلد واحد لكن هي مدينة كبيييرة وأكان لي العصيدة ف نفسي الاكل العندنا هنا هم عندهم هناك وبي الهبل كمان لكن بياكلو العصيدة وبيفضلوها عشان بحبوها وبلقو الغذء الكويس كلو فيها .. بلقيس قالت ليها بالجد؟؟ .. قالت ليها ايي والله وبعد ميامن تعرس بنمشي ليهم مرة زيارة هناك ووقتها بتشوفيها بي عينك سمحة كيف .. بلقيس قالت ليها أتحمستا والله .. وبابا كمان قعد يتكلم ليها عن شندي وخيراتها وأنا بس فضلتا ساكتة وبوزع في الابتسامات عليهم.....
_____________________________________
"زليخة ":-
أمنة جابت اللابتوب بتاعها وعلمتني كل الحاجات فيهو وكيف أنا بعمل الملفات وبحفظها والخ... .. تقريبا أخد معاي أسبوع وشوية عشان أقدر أعرف أتعامل معاهو وأتعلم أي شي فيهو .. وبعدها مشينا أنا وهي سوا لي بتاع المكتبة وطلبنا منو أنو يشغلني معاهو .. في الأول رفض لكن تاني بالعافية رضى يشغلني لانو الشغل كان كتتير عليهو .. وهو برضو الاسبوع الأول عداهو كلو بيعلم فيني وخلاني كم مرة أجرب أطبع شيتات مرة بي 4 أسلايدات ومرة 6 لحدي ما بقيت بعرف وأشتغلتا معاهو رسمي .. وقدرتا أقبض قروش صاح ما كتيرة بس برضو ماشي حالها....
في يوم بعد خلصنا المحاضرة قعدنا نفطر كالعادة .. بديت الكلام أنا أول وسألتها وقلت ليها: إنتي يا آمنة .. قالت لي ها .. قلت ليها أول يوم لينا في جامعة لمن جيتي بتبكي كنتي مالك؟ .. من قلتا ليها كدا وقفت الاكل الكانت بتاكل فيهو وحسيتها زي الأتضايقت .. قلت ليها معليش لو ضايقتك بس كنت عايزة أعرف مالك لانو طريقة بكاك يومتها حريتني وبعد صاحبتك أستغربتا كيف زولة فرفوشة زيك تبكي بي الطريقة ديك.....
قالت لي بضحكة غريبة ونبرة باين فيها الكسرة: كنت ببكي لانو ببساطة خلاني عشان أنا سمنية...
" طبعا هي ما شاء الله زولة صحتها سمحة وكلبوظة كدا " ..
عاينت ليها وأنا ملامح وشي ما مفهومة ومستغربة في القالتو .. تابعت باقي كلامها وقالت لي هو أصلا ولد جيرانا وأنا بحبو من صغيرة ولمن كبرتا أكتشتفتا أنو هو زااتو بحبني أو بي الاصح كنت فاكرة أنو بحبني، المهم ما علينا أرتبطنا وفي الاول ما كان بعلق على حكاية وزني نهائي وكنا زي السمنة على عسل وأنا شخصياً كنت طايرة بيهو السماء وما مصدقة أنو الشخص البحبو من صغري مرتبطة بيهو حاليا، بس بعد مدة قصيرة من أرتبطنا فجأة بقى كل ما يتكلم معاي يرمي لي كم كلمة جارحة في نص الكلام عن شكلي ووزني ولمن أتضايق منو يقعد يعتذر ويقول لي بهظر معاك وبتاع، والحاجة دي أتكررت كم مرة لكن كنت بمشيها ليهو وبقول هو ما قاصد وهو بيحبني وأكيد ما حيكون قصدو أنو يضايقني وبخت ليهو الاعذار .. لحدي ما جا أول يوم في الجامعة كنت بتكلم معاهو الصباح وبقول ليهو ألبس شنو؟ وأنا محتارة وكدا .. أتخيلي قال لي شنو وهو بيضحك؟ .. قال لي البسي أي حاجة بس المهم قماشتها تكون قووية عشان ما تشترط عليك في نص الشارع بي سبب وزنك الكبير .. وقتها قدر ما حاولتا أمشي الموضوع وأخت ليهو عذر ما قدرت وأتشاكلنا شكلة كبييرة .. وهو ما صدق إني شاكلتو ف قال لي كويس الجات منك أساسا أنا ما عارف كيف مرتبط لي مع واحدة قدر البرميل وشكلها أكبر من شكل أمي، وما خلا حاجة ما نبذني بيها، وختم بي كلامو بي أنو: تاني ما عايز أي علاقة تربطني بيك وعليك الله حاولي تخففي الاكل الكتير البتاكليهو لانك شوية وتنفجري فينا، ودا ما جسم ليك مع البنات وكلام كتتير أحسن ما تسمعيهو .. وقفل الخط في وشي، ما تصدقي يا زليخة أنا اليوم داك أتصدمتا فيهو قدر شنو، الكسرة الجاتني منو عمري ما ح أنساها ... وقالت لي وهي بتشيل لقمة من الاكل حقها وبتحاول تمسك في دموعها الكانو على وشك أنهم ينزلو: وبس ياهو بعدها ما حصل شي، بعمل نفسي كويسة وعادية قدام الناس ولمن زول يتكلم معاي في حكاية وزني بشكل بهظار بضحك معاهو وبكون بتقطع من جوا الحمد لله بس، هيي إنتي بتبكي لي يا زليخة؟ بقى عادي بالنسبه لي وأتعودت على التنمر والتعليقات السلبية من الناس .. مسحتا دموعي النزلت غصب عني وقلت ليها على فكرة إنتي حلوة شدددديد ف ما تشتغلي بي زول وبالجد وزي ما بقول ليك يا أمنة إنتي حلوة وروحك وشخصيتك وكلامك وكل حاجة فيك حلوة أياااكي تحاولي تغيريها عشان زول، لانو كلام الناس لا بيودي ولا بيجيب، وأهم شي إنك تكوني راضية عن نفسك ووزنك وعن شكلك تمام الرضى عشان تعيشي في راحة وكلام الناس ما يأثر فيك، وزنك دا يا أمونة الناس بتفتش ليهو بي القروش وببلعو عشانو الحبوب الممكن تجيب أجل الواحد، ربنا قال وخلقنا الانسان في أحسن تقويم، يعني إنتي ربنا خلقك في أحسن صورة ممكنة وما من حق أي زول أنو يعلق فيك أو يقول ليك إنتي سمينة أو ضعيفة، مالك ماكلة من جيبهم ولا بيتهم؟ خلي ثقتك في نفسك دايما كبييرة يا أمنة وأي زول يضايقك وقفي فيهو حدو وصدقيني تاني كان لاقاك في الشارع بغير شارعو خوفا منك ومن ردك لو أتكلم فيك أو قال كلمة ما حلوة في حقك، وبكرة يجي اليحبك وإنتي بنفس شكلك دا وبدون أي تغيير وتقولي زليخة قالت .. أبتسمت لي وقالت لي زليخة أنا بحبك شددديد والله .. جضمتها بحركة عفوية وقلت ليها وحلاتي عان الضحكة وأنا كمان بحبك يا قلبي .. قالت لي نييني بي سببك أكلي بقى بارد زاااتو خليني أكل .. قلت لي أكلي أكلي أصلا ورانا شنو نحنا غير محاضرة أب جلحات بتاع المايكرو؟ .. قعدت تضحك وقالت لي فعلا ورانا شنو غيرو!....
