اليوم التاني صحيت من النوم بدري شوية على غير عادتي .. وقبل ما أنزل من السرير وأمشي الحمام أتذكرتا الحصل أمبارح والعملو بلال لمن كنت عايزة أحرك المكيف من جنبو .. ومن شدة ما أستغربتا لمن أستوعبتا حقيقة العملو وحقيقة أنو هو باسني في خدي بقيت بتلفت هنا وهناك بس عشان اتأكد إني ما كنت بحلم وأنو الحصل بالجد كان واقع .. لاني ما مستوعبة خالص ولا متخيلة أنو بلال الواحد دا يتعامل معاي بالطريقة ديك ويقرب مني لي الدرحة ولا حتى بالغلط ما متخلية فكيف يعملها حقيقة؟ .. ولو ما شفتو راقد في سريرو والمكيف بالجد جنبو ما كنت صدقت أنو الحصل أمبارح كان فعلا .. عاينت ليهو وهو نايم وأتحيرتا شديدد فيهو وقلت يا ربي كان مالو ولا شرب شنو الولد دا؟ لانو أصلو ما طبيعي! ما بتوقع أنو عمل كدا وهو في وعيهو؟ معقولة دا بلال معقولة! أصلو ما بصدق.....
المهم بعد تفكير طويل صدقتا الحصل ومشيت الحمام .. وتاني ما جيت راجعة الغرفة وطوالي فتا لي ناس خالتو .. قعدنا معاهم لي زمن الفطور .. وبعد فطرتا حتى رجعتا بي هناك عشان كنت عاوزة أضرب لي بلقيس وأشوفها سوت شنو لانو على حد علمي أمبارح مفروض تكون خطوبة عماد من ميسون بت عمي مأمون .. أتصلت ليها وسألتها .. قالت لي الخطوبة تمت أمبارح رسلت ليك الصور واتسب ما شوفتيهم ولا شنو؟ .. قلت ليها ايي ما شفتهم لاني ما منشطة ... قالت لي ايواا .. قلت ليها: اهاا وإنتي هسي كيف؟ ونفسياتك كييف؟ .. قالت لي ما كويسة بس نقول شنو الحمد الله .. قلت ليها حبييبتي معليش معليش ربنا ح يعوضك بالاحسن منو .. قالت لي أن شاء الله .. قبل ما أتكلم معاها تاني سمعتا صوت ماما في الخط وهي بتقول لي بلقيس أديني ميامن النسلم عليها .. قلت ليها بلقيس دي ماما؟ .. قالت لي ايي هاك ليها من قبيل تكورك وقالت عايزة تتكلم معاك .. قلت ليها قلبيي أديني ليها أنا مشتاقة ليها شدديد .. أدتني ليها .. قلت ليها ماما مشتااااقين ياااااخي .. قالت لي ميمي كتتتتير والله كيفك يا بتي وكيف راجلك ونسابتك؟ .. قلت ليها كلنا كويسييين أنتو كيف؟ .. قالت لي نحمد الله ما عندنا أي عوجة .. قلت ليها الحمد لله .. قالت لي مالك ما جيتي إنتي وراجلك خطوبة ولد عمتك؟ أنا قلت بتجي وبنشوفك عشان أشتقنا ليك .. قلت ليها عمي عزمنا والله بس ما قدرنا نجي عشان عمو ابراهيم وبلال شغالين .. قالت لي ما مشكلة، اهاا نسابتك كويسين معاك؟ ما يكونو بيعملو ليك مشاكل ولا بضايقوك؟ .. قلت ليها برري مساكين .. قالت لي وراجلك! أوعى تكوني مقصرة في حقو؟ .. قلت ليها لالا ما تخافي ما مقصرة .. قالت لي ايي خليك تمام كدي وأسمعي كلامهم عشان تلقي المعاملة الطيبة والحسنة .. قلت ليها طيب .. وبقيت بتونس معاها وهي بتحكي لي الحصل في الخطوبة بالتفصيل أتكلمتا معاها لحدي ما رصيدي قطع .. بعد قفلت منهم قضيت باقي اليوم عاادي زي كل يوم وما كان فيهو حاجة مهمة تذكر.....
________________________
" زليخة " :-
