لمن سمعتا صوت بلال في الخط أستغربتا شدديد لاني على أساس بتكلم مع مروان فجأة ألقاهو بلال ... زحيت التلفون من أضاني ورجعتا عاينت لي الرقم .. لقيتو ما نفسو الضرب لي بيهو مروان .. شكلي مع الزعلة ما ركزت في أختلاف الارقام....
ومن الخلعة الدخلت فيني ما عرفتا أرد ليهو بي شنو على كلامو ف سكتا .. قال لي طبيعي ح تسكتي أصلا أتوقع شنو من واحدة زيك! واحدة لافة أربعة وعشرين ساعة مع الاولاد ومن عربية دا لي دا؟ الصراحة أنا بحييهو وبقول عليهو راجل ود رجال لانو ورا واحدة زيك أنو الرجال ما بعرسو البتكون لافة معاهم من هنا لي هنا ومدياهم حريتهم وبتلبسك زي لبسك، كويس أنو وراك قيمتك .. قلت ليهو وأنا الغيظ ح يقتلني: طيب لمن الرجال ما بعرسو الزيي أنت معرسني لي؟ ولا عشان أنت ما راجل؟ اهااا كان كدا عاذراك .. أول ما قلت ليهو كدا نبرة صوتو أتغيرت توتلي وقال لي بحدة: لو ما مكانة عمك عندي كبييرة وبحترمو ما كنت عاينت ليك مجرد نظرة سااي خلي أتزوجك، ولي الأمانة برضو أتزوجتك عشان شفتك واحدة قليلة أدب محتاحة تربية وحبيت أنا الأربيك على يدي وأوريك النجوم عز الظهر بتكون عاملة كيف يا الشايفة أنو الدنيا ما فيها غيرك .. أتمغصتا شديد منو ومن طريقة كلامو عني وقلت ليهو بنفس أسلوبو في الكلام: طيب أحب أطمنك أنو يدك ما ح تصلني ولا ح تربيني زي ما عايز وكلها مجرد أحلام عصر منك ما أكتر .. قال لي بتحدي واضح: إنتي في وأنا في والزمن بلف وبدور وبيجي يوم وبذكرك بي كلامك دا .. قلت ليهو نشوف وبعدين دقيقة طالما حضرة سيادتك شاميني لي الدرجة دي وشايفني واحدة ما محترمة ضارب لي من الأساس لي؟؟ .. قال لي ما تخافي أكيد ما حباً فيك، كل الحكايه أنو جو ضيوف عايزين يشوفك وضربتا أوريك عشان تجي .. قلت ليهو يعني هسي كان غالبك تجي بي رجليك وتقول لي الكلام دا، إلا تضرب لي يعني؟؟ .. قال لي والله يا أستاذة دي حاجة بترجع لي أناديك بي الطريقة الأنا عايزاها والبتريحني، أجيك أو أضرب ليك تلفون ما يخصك المهم إني أوريك وإنك تسمعي الكلام وتجي .. وقبل ما أرد عليهو قفل الخط في وشي .. ياااخي أقسم بالله الولد دا غياظ كييف .. أنا بكره اليوم اللماني فيهو .. مشيت غسلتا وشي وجيت وقفتا قدام المرايا لقيت عيوني لونها أحمر من البكى .. ما أشتغلتا بي منظرهم كتتير وسرحتا شعري .. بعدها لبست توبي ومشيت بي هناك .. لمن وصلتا الحوش حقهم شفتا خالتو ست الجيل طالعة من المطبخ وشايلة صينيه عصير في يدها .. قالت لي تعالي تعالي يا ميمي .. مشيت عليها وقلت ليها ايواا يا خالتو .. في الاول كانت عايزة تقول لي حاجة بس لمن شافت شكلي .. قالت لي عيونك ديل مالم مورمات يا بتي؟ .. قلت ليها ماف شي بس تعبانة شوية ومرهقة .. كوركت لي تغريد وقالت لي كر علي سلامتك يا يمة .. قلت ليها الله يسلمك .. تغريد جات طالعة من البرندة .. وخالتو أدتها الصينية الفي يدها وقالت ليها هاك شيلي الشربات دا وأديهو لي عماتك لحدي ما نجي .. تغريد قالت ليها طيب وشالتو منها .. أما أنا ف مسكتني من يدي وساقتني غرفتها .. طلعت ريحة نسوان .. ريحتني منها وقالت لي الحريم الجوا ديل نقاقات خلاص ما عايزاهم يشيلو حالك ويقولو ما فيك ريحة عروسات .. أكتفيت بي إني أهز ليها رأسي بس وما قلت ليها حاجة .. قالت لي إنتي زعلانة مني يا بتي؟ .. أستغربتا فيها وقلت ليها لالا وأزعل ليه يا خالتو؟ .. قالت لي عشان قبيل لمن بلال خلاك تغسلي العدة نحنا ما جينا وشاكلناهو يعني إنتي عروس جديدة ولسه يوم ما تميتيهو زي الناس عشان تغسلي عدة، بس والله يا بتي أنا رسلتا تغريد تشيل منك العدة وتغسلها هي بدلك لكن براك شفتيهو ما خلاها ونهرها، صدقيني لو كان نحنا جينا وأتكلمنا معاهو وقتها عشان يخليكي من غسيل العدة كان ح يركب رأس زيادة لانو هو ما بيحب زول يعارضو في حاجة بقولها نهائيا، ومش بلال دا ولدي وأنا أمو! لكن والله أنا بعمل ليهو حزر وما برااي البعمل ليهو حزر لا البيت كلو يا بتي عشان عارفنو لمن يكون زعلان ولا معصب ما بشوف لا قدامو ولا وراهو وبيعمل الحاجة الفي بالو والبعارضو ما بيشوف خير، أعفي لي لاني خليتك تشتغلي وإنتي عروس جديدة بس والله ما في يدي حيلة ولدي وأنا بعرفو كويس وعارفة هو كيف بيفكر وكيف بيتصرف .. قلت ليها ما تعتذري يا خالتو أنا ما زعلتا منكم .. قالت لي عارفة أننا قبيل بالغنا في حقك أمسحيها لينا في وشي وما تزعلي ... قلت ليها والله أنا ما زعلانة منكم والموضوع زاااتو ما مستاهل كل دا .. قالت لي أنا بس ما عايزاك تشيلي في خاطرك مننا .. قلت ليها أبدا ما تخافي .. أبتسمت لي وبعدها طلعنا برة ومشينا لي الضيوف .. لقيتهم مرتين سلمتا عليهم وقعدتا .. واحدة قالت لي أنا عمة بلال أخت أبوهو لزم وأسمي علوية .. قلت ليها يا أهلين بيك .. قالت لي أمبارح ما حضرنا العرس عشان كنا في حوش بانقا عندنا أختنا ولدت وكنا معاها وهسي وقت رجعنا قلنا نجي نشوف عروسة بلال ونبارك ليها .. قلت ليها شرفتو والله .. قالت لي إنتي بتقري يا بتي ولا خلصتي قراية؟ .. قلت ليها لالا الحمد لله خلصتا .. قعدو يسألوني بقرا شنو وتاني بقو بيتكلمو في موضوع العرس وخالتو بتحكي ليهم عن التعب التعبوهو والناس الجات والما جات منو وونسة زي دي يعني .. لحدي ما أستاذنو ومشو مننا...
