مجرد ما أستوعبتا فكرة أنو دا هو بلال فعلا .. على طول نظراتي أتحولتا لي نظرات كره وعاينت ليهو بضيق كدا .. ولحظتها أتملكني برود عجيب خلاني أكسر نظري منو وأنا خالية من أي أحساسيس أو مشاعر وأمسح الرسالة الرسلها بدون ما أتردد مرتين .. مسحتها ورجعتا كملتا رقيصي مع ضحى زي الما حصل شي وتاني نهائي ما عاينت ليهو ولا أديتو أهتمام ولا كانو رسل لي رسالة ولا كأني رجعتا شفتو بعد زمن طويل أصلا ، لانو وجودو وعدمو بقى بالنسبة لي حاجة واحدة وما بتفرق معاي كتتير وما مفروض أركز مع حاجة بقت من الماضي بتاعي .. رقصتا لمن فترتا .. وما كنت ح أقيف من الرقيص إلا ضحى قالت لي: هيي نسيتي بلقيس منتظرانا للأكل! .. قلت ليها: وووب نسيت أرح ، أرح .. مشينا شلنا ليها أكل في عمود ووديناهو ليها في بيت ناس زينب .. قلت ليها: يا حليلك قاعدة هنا محبوسة بين الحيط دي وفايتاك هناك فعاليات رهيبة شي غنى وشي رقيص أسكتي سااي بس .. قالت لي بتمغرزيني يعني؟ .. قلت ليها ببرود: أجل صحيح .. قالت لي سخيفة دي خليني أكل ما تخربي لي مزاجي .. قلت ليها طبعا ما وريتك .. قالت لي: أها في شنو فايتني كمان؟ .... قلت ليها خالتو ست الجيل جاات .. عاينت لي كدا وقالت لي ميامن أقول ليك الصراحة؟ .. قلت ليها قولي .. قالت لي والله ما كان في داعي تعزميها من الأساس وتصري عليها عشان تجي .. قلت ليها: كيف يعني ماف داعي؟ يا بلقيس زولة أنا بتونس معاها طوالي وبحبها وهي بتريدني زي ما بريدها وطبيعي بنسأل من أخبار وأحوال بعض رغم الحصل ، وزولة أنا عشتا معاها شهرين وحاجة يعني قريب السبعين يوم وطول المدة دي كنت عايشة معاها في بيت واحد وبلاقيها كل يوم وبتكلم وبتونس معاها كل يوم ولو أحتجت أي حاجة بطلبها منها ويوم واحد ما زعلتني ولا قالت لي كلمة كعبة ولا قصرت في حقي ، وبعد الحصل كانت لسه متواصلة معاي وبتحبني ، والطبيعي إني لمن ما الاقيها لي فترة طويلة أشتاق ليها صاح؟ ف بس أنا أشتقت ليها وأستغليت فرصة أنو عندي عرس أختي وعزمتها عشان نتلاقى لانو ما معروفة تاني نتلاقى متين ، ما شينة في حقي إني أكون بتكلم معاها وما أعزمها لي العرس؟ .. قالت لي يا ميامن.... .. قاطعتها وقلت ليها: بلقيس أنا عارفة أنو مشكلتكم الاساسية هي بلال وطريقة تعامل بلال لي لمن كنت متزوجاهو ، لكن يا جماعة أفهمو ، أفهموو أنو أمو ما ليها علاقة بي الكان بعملو معااي ، علاقتي بيها ما ليها دخل بي علاقتي مع بلال ، زولة طيبة وعلى نياتها وخشت قلبي وأنا حبيتها وين الغلط لمن أعزمها؟ ويعني كان كانت نسيبتي زمان! علاقتي بيها ك نسيبة أنتهت أول ما ولدها طلقني ، وحاليا العلاقة البينا هي علاقة ود وأحترام لي العشرة الكانت بيناتنا طول المدة العشتها معاها في بيتهم ، إنتي هسي يا بلقيس كان لقيتي زول قلبو أبيض ونضيف وبعاملك كويس ولطيف معاك مش تلقائيا ح تحبيهو؟ يلا أنا بحب خالتو ست الجيل لانها كدا ، بعدين أكرهها لي وأنا ما شفتا منها حاجة كعبة يعني بس لمجرد ما أنو ولدها لاحظي ولدها ما هي بشاكلني وبضربني أنا أقوم أكرهها هي؟ لي! ولي زاااتو أكره زول رغم كل الحصل راعا لي العشرة الكانت بيناتنا وما قطع تواصلو معاي وما قال لي كلمة كعبة في حقي مع أنو لو داير كان أتكلم! ... قالت لي خلاص خلاص فهمتك .. قلت ليها عارفاك بتمشي فيني لكن برضو ما ح أقطع علاقتي بيها .. سكتت وما ردت علي .. طبعا ونحنا بنتناقش وبنقول في الكلام دا ضحى كانت في المطبخ .. ف لمن جات لقتنا ساكتين .. قالت لي: قومي نمشي بعد دا راجينا شغل كتتير هناك .. قلت ليها ايي أرح يلا بلقيس بنجيك تاني .. قالت لي طيب وعايني يا ميمي عندي كيس لونو أبيض في دولابي في الرف الاول أديهو بعدين لي زينب وخليها تجيبو لي معاها .. قلت ليها طيب .. قالت لي هاك دا المفتاح وما تنسي ضروري شدديد تجيبي لي معاها الحاجات .. قلت ليهو أوكيي .. شلتو منها ورجعنا على البيت....
