من لقيتو دا مروان ، عاينت ليهو ببرود ولا كأني بعرفو وطوالي حولتا نظري من ناحيتو وبقيت بعاين في الاتجاه التاني وأنا خالية من أي أحساسيس أو مشاعر وما أديتو أهمية .. قال لي شنو يعني بتتجاهليني فيني وعاملة نفسك ما بتعرفيني ونسيتيني خلاص؟ .. ضحكتا ضحكة أستهزاء وقلت ليهو: هئه في زول بنسى زول كان السبب في أنو يتصلح لي الاحسن؟ .... لمن قلت ليهو كدا قعد عاين لي بي أستغراب وقال لي بتعجب: ما فهمتك! قاصدة شنو يعني؟ .. قلت ليهو ما ضروري تفهم .... قال لي بغض النظر عن طريقة كلامك جيتي هنا مع راجلك ولا شنو؟ وينو ما شايفو! الصراحه متشوق عشان أشوفو .. بكل البرود الفي الدنيا رديت وقلت ليهو: أتطلقنا .. طبعا لحظتها أستغرابو زاد لاني كنت بتكلم معاهو بي برود ما طبييعي، وبرد ليهو بكل ثقة ولا كأني خايفة أنو يشمت فيني أو يعاتبني .... قال لي وهو بضحك: هههه كنت عارف أنكم ما ح تستمرو مع بعض لأنك من الأساس أتزوجتي عشان أنا أستفزيتك وعشان إنتي كنتي عاوزة تغيظيني وتثبتي لي إنك بتقدري تعملي البتقوليهو وكنتي عايزة توريني إنك عادي بتقدري تتجاوزيني لكن للأسف شوفي الحصل فيك شنو .... قلت ليهو بالعكس شكراً ليك لانك أستفزيتني وخليتيني أخد الخطوة دي .. عاين لي بحيرة أكتر وقال لي وهو بهز في رأسو: ميامن إنتي مالك؟ شاربة سجائرة قبل ما أجيك؟ .. قلت ليهو: يا حليلك أنت من زمن السجائر؟ السجائر دي أنا خليتها زمان يا حبيبي من اليوم الاتناقشنا فيهو داك، لاني بقيت كل ما أجي وأكون عايزة أشربها بتذكرك وبتذكر كسرك لي وتلقائيا بلقى نفسي قرفتا منها وبرميها لانها بتذكرني بيك وبي كلامك الزي السم القولتو لي ، وأما بالنسبة لي الأستفزاز ف بالجد شكراً ليك لانو لو ما أنت أستفزيتني يومتها أنا ما كان وافقت أعرس بلال وما كان أتعملتا من تجربتي العشتها معاهو وكنت ح أكون لسه ميامن القديمة ، أنا سبب أستفزازك لي أتعلمتا حاجات كتتتيرة ، أتعلمتا كيف أفكر قبل ما أخد أي قرار مهم في حياتي ، وأتعلمتا ما أستعجل في حاجة مصيرية خالص ، وأتعلمتا الزواج الصح مفروض يكون كيف ومفروض يحصل شنو من البداية عشان هو ينجح ويستمر لي قدام ، وأتعلمتا أنو ما دايما البنشوفو من وجهة نظرنا بكون صح ، وأتعلمتا إني ما أزعل على حاجة كتتير خصوصي إذا كانت ما بتتستاهل ، وأهم شي أتعلمتا من أنسان إني ما أدي زول أكتر من قيمتو وما أزعل على زول خلقو ربنا زي ما خلقني نهائي ، وحاليا أنا ممتنة ليك لأنك أستفزيتني وخليتني أعيش التجربة دي وأتعلم منها حاجات كتتتيرة كنت محتاجة ليها في حياتي ، شكراً شددديد .... بعد كلامي القولتو ليهو دا هو فضل ساكت وما عرف يقول شنو وما قدر ينطق ولا كلمة .... قلت ليهو: المش البتتلفت جوا المحل ديك مرتك ولا أنا غلطانة؟ .. عاين ليها وسكت .. أنا عرفتها لاني كان شفتها في الصور حقت العرس ورتني ليهم أريج ، تقريبا عرسو من شهر كدا .... قلت ليهو: عيب عليك تخليها تفتش ليك بالطريقة دي وعيب عليك تكون قاعد مع الاكس بتاعتك ومخلي مرتك جوا براها ، الكلام دا ما صاح منك على فكرة ولا صاح في حقها، قوم يلااا أمشي ليها وما تضيع وقتك معااي سااي ... عاين لي مسافة طويلة بعدها قام وأتحرك من جنبي بدون ما يفتح خشمو معاي لانو ما كان عارف يقول شنو .. عاينت ليهو لحدي ما وصلها .. وشفتا لهفتها عليهو وهي بتسالو كنت وين .. في قلبي قلت يا ريت ما يخذلها زي ما خذلني ، لانو الخذلان وكسر القلب ماف أحر منو ، والزول بيأخد وقت عشان يتعافى منهم .. ف أن شاء الله يكون راجل بالجد معاها وما يعمل العملو معاي ويدق بيها الارض بعد ما يرفعها السماء .. شكلها طيبة وما شبه مروان وخباثتو .. ربنا يكون معاها بس.....
