لمن ضربني كف الدم غلى في عروقي وعاينت ليهو وأنا على وشي نظرة أستحقار وغل ما طبيعية .. وقلت ليهو بكل ما أملك من عصبية وقوة: كل مرة ، في كل مرة بتصغر في عيني أكتر ورجولتك بتقل عندي زيادة ، ودايما بتأكد لي إنك أقسى من الحجر وعمرو ما حيكون عندك مشاعر وتحس بي غيرك نهائياً ، يعني أنت هسي فاكر إنك لمن تخلي مرتك وعرضك براها في نص الشارع ولي وقت متاخر من الليل ح تكون بتوريني إنك ما بتهدد وبتعمل الفي رأسك؟؟ على فكرة دا ما إلا عدم رجولة منك بس يا أستاذ والليلة أنت بالجد أثبت لي إنك ما راجل ... من قلت ليهو كدا عيونو لونها أتقلب أحمر وملامح وشو أتغيرت توتلي من الغضب وقال لي بعصبية: ما إنتي البتحددي إذا أنا راجل ولا لا وما أنا البشتغل بي رأي زول زيك تمام! لانك بالنسبة لي مجرد واحدة بتساوي صفر على الشمال تمام ، وأوريك لي خليتك في نص الشارع براك ولا فكرت أرجع ليك؟ لانك متعودة دايما تفضلي حايمة لوقت متأخر في نص الشوارع .. طبعا اللحظة ديك قعدتا أعاين ليهو وأنا مصدومة فيهو لانو هو لسه بيفكر فيني كدا ولسه فاكر إني ميامن ديك ومن الصدمة ما عرفتا أقول ليهو شنو .. قال لي مالك سكتي؟ نسيتي قديمك كلو ولا شنو! أرجع أذكرك بيهو تاني؟ وبالله هسي عايزة تقنعني إنك إنتي الكنتي بتطلعي مع أولاد وفي أي وقت وحايمة من عربية دا لي دا وبتمشي معاهم أي مكان وفي أي لحظة وبدون ما تترددي غالبك ترجعي الساعة عشرة البيت براااك؟ قولي لي غالبك؟ هئه أكيد ما بغلبك دي حاجة إنتي متعودة عليها ومتعودة على حكاية إنك ترجعي البيت الساكنة فيهو أنصاص الليالي ف لي مستغربة إني خليتك براااك عادي؟؟ لي؟ بعدين أنا وريتك وقلت ليك أسلوب التهدديد ما بينفع معاي وممكن أندمك لو حاولتي تهدديني....
الكلام القالو زاد صدمتي أكتر وقلت ليهو بي أنفعال: ح تفضل دايما ظاني السوء فيني عارف ليه؟ عشان أنت كدا واحد معقد ومريض نفسياً وغير أسلوب الهمج والضرب ما بتعرف ولا بتفهم حاجة .. قال لي بتحذير: أحترمي نفسك أحسن .. قلت ليهو: قلتها لي مرة لكن المرة دي أنا الحا أرجع أقولها ليك بس بطريقة تانية واللي هي الاحترام دا نحنا بنعرفو كويس وفي نفسي الوقت بنعرف نديهو لي منو وما نديهو لي منو وأمثالك ما شبهو ، تتذكر لمن أتقابلنا أول مرة وقلت لي الجملة دي؟ يلا أنا هسي برجع أقولها ليك وأقول ليك أنو الاحترام نحنا بنديهو لي الرجال البجد مش أشباهمهم العاملين فيها رجال بالضرب ورفع الصوت على الحريم .. مجرد ما خلصتا من كلامي لقيتو بيرفع يدو علي وبضربني كف تاني .. ختيت يدي على خدي ولا أراديا ضحكتا بصوت عالي وقلت ليهو هههه يلا أضرب تاني كمان لو عايز أصلا أنت بتعرف شنو غير إنك تضربني؟ فاكرك نفسك راجل علي وأنت ولا جاي جنب الرجولة بي حاجة ودي الحقيقة حتى ولو وجعتك وخلتك تضربني لي بكرة الصباح أصلي ما بغيرها ، أنت ما راجل.... قبل ما أخلص كلامي زي الناس لقيتو بيمسكني من رقبتي وبخنقني وبقول لي بغضب: أنا شنو؟؟ أنا ما راجل؟ ... لزيتو مني بقوة وقدرتا أتفك منو بعد تعب وقلت ليهو أي ما راجل ، لانك فاكر الرجولة في إنك تفرض رأيك علي وتضربني ، لكن أمانة ما أخليك تندم على كل ضربة ضربتني ليها ، ولو ما ندمتك وأخدت حقي منك يبقى ما أسمي ميامن .. قال لي بأستهزاز: الاحلام دي أحلمي بيها لمن تكوني نايمة لكن ما تحلمي بيها وإنتي صاحية عشان ما ح تتحقق كان ح تأثر على عقلك بس .. قلت ليهو نشوف إذا بتتحقق ولا لا.....
