امُتشان قسري

part - 37 -

"لكن الحياة محبطة ومأساوية، تتركنا ندخل عالما رائعًا، نتلاقى، نتعارف، نقطع معًا جزءًا من الطريق، ثم نتوه بعضنا عن بعض، ونختفي بالسرعة ذاتها التي جئنا بها في المرة الأولى."

#امُتشان_قسري
((الكاتبة بنين بهاء))

الحلقة _٣٧

' غيد

سجلت اقسام داخليه ، بنيه وحدة وياي وكلش هادئه وفقيرة

سويت مثل مكالت بارين واشتريت بضاعه مكياج واكسسوارات ، وفتحت بيج وسويت اعلانات بس ما ستفاديت شي بلسبوع مره وحدة يصير طلب

من دخلت اقسام داخليه هواي عانيت ، مسؤليه جديدة لازم انه اسوي كلشي بيدي

اطبخ بيدي ، اغسل ملابسي ، انظف بعد ما جنت معتمده على امي طول عمري

الشي الوحيد لفادني من دخلت اقسام داخليه انُ كدرت اعوف الاغاني وصرت اتخيل بشكل كلش قليل ما تتعده ال١٥دقيقه

ما صرت اتخيل قبل النوم ابدًا ، وخيال ما اتخيل لان مشغوله بين الدراسة والدوام والقسم والبنات

واغاني شلون اسمع واتخيل وياي بنيه

من دخلت قسم عرفت راح اوجه هواي مشاكل وخفت هواي
بس الشئ لصار انُ البنات كلش حبابات

ويوميا من نخلص دراسة نطلع نلعب طوبه برا ومحبيس ونكعد نسولف هواي اضحك واتونس وانسى لبيه

بس شيفيد ، يجي التفكير بنص نومي ويصير عدي ارق وما اكدر انام

الفلوس لنعدي بلشو يخلصو والمشروع ما جاي احصل من عنده فلوس

والصالون بطلت منه ، من دخلت قسم داخلي

اخر يوم بلمتحانات اجت بارين الي وكلش ونستني وما خلتني حتى افكر

وثاني يوم من رحنه لبيتنه اول ما دخلنه لكيت نسوان عمامي وبناتهم بلساحه

بدون ما اباوع الهن اصلًا جريت بارين ومشيت لداخل البيت جان خالي من الاغراض كلش انقهرت وضجت ، اكيد ما راح يخلي الاغراض راح يببعهن لان هذا عمي يموت على طرف الربع

بعدين عمي ليث جاب الغرفة وكم فرشه وثلاجه

ثاني يوم راحت بارين ، وقفلت الباب وخليت ورى اثاث

كعدت بلغرفه جوعانه وما عندي شئ اكله ، انه متأكده بس يجي ابوي وأحمد من الشغل يهدون عليه

انه لازم الكه شغل ،منين ادفع الايجار وبيش اعيش

راسلت ام الصالون ورفضت اشتغل وياها لان بطلت فجاة

نهاريت شمرت التلفون وصرت ابجي بقوة مقهورة
ورى ساعه هديت وبطني ضلت تصوفر من الجوع والثلاجه فارغه