نظرت له هدى بصدمة ولم تستطيع أن تتكلم وتوقف عقلها عن التفكير وأفاقت على صوت سامى وهو يقول: أنا بقالى فترة عايز أصارحك بس كنت متردد , هاسيبك تفكرى الليلة وبعدين نتفق بكرة ها نعمل إيه ,هابات الليلة عند ماما.
إبتعد سامى وتركها مكانها في ذهول وانتبهت بعد دقيقة وجدته خارجا من حجرة النوم وهو يحمل حقيبة صغيرة فأمسكت ذراعه بقوة وقالت: تعالى هنا وإقف كلمنى يعنى إيه اللى قلته ده؟
كلامى كان واضح ياهدى أنا مش قادر أعيش معاكى خلاص ولازم ننفصل علشان مش عايز أظلمك معايا.
والله!! والطلاق وخراب البيت ده مش ظلم لى و لولادك؟
الظلم إنى أعيش معاكى وأنا تعيس.
تعيس!! تعيس ليه؟
أرجوكى الموقف صعب على جدا متخلنيش أتكلم.
لأ أنا عايزاك تتكلم.
إقترب حاتم وزينة وقال حاتم: فيه إيه ياماما؟
عاجبك كده ؟
أمسكت هدى حاتم وقالت: حاتم ياحبيبى خد أختك وخليكو جوه وإقفل الباب عليكم ياللا أنا وبابا بنتكلم في موضوع مهم ...يالا يا حبيبى.
أمسك حاتم يد أخته ودخل لحجرتهم وأغلق الباب فقالت: إتكلم ياسامى قول كل اللى جواك إتفضل.
تنهد سامى ووضع الحقيبة على الكرسى وقال : أنا مش سعيد معاكى ياهدى , مقدرتش أحبك , قلبى مال لواحدة تانية آدى كل الحكاية .
إيه البساطة اللى بتتكلم بيها دى ؟ وألا أقول البجاحة أحسن.
بلاش تجريح ياهدى.
هو إنت لسه شفت تجريح ؟ بعد عشرة 9 سنين دلوقتى عرفت إنك مش بتحبنى ومش عايز تعيش معايا علشان تعيس؟
أيوه دى الحقيقة.
إنت ناسى لما إتجوزنا كنت بتقول لى إيه؟ إنت إنسانة رائعة ياهدى أنا مبسوط قوى و..
قاطعها سامى بسرعة وقال: كلام كنت بأقوله لما كنت عريس جديد لكن بعد مرور الوقت لقيت إننا مش مناسبين لبعض.
أنا مش قادرة أصدق اللى بأسمعه منك دلوقتى , عايز تطلقنى بعد السنين دى كلها ؟ أنا قصرت معاك في إيه شايلة بيتك وعيالك وكل الحمل على ومريحاك على الآخر لا عمرى ضايقتك ولا حملتك فوق طاقتك وبأصرف في البيت زيى زيك.
ولا أنا قصرت معاكى ياهدى.
لأ قصرت ياسامى,قصرت لما سبتنى أشيل حمل العيال لوحدى وأنت يادوب تيجى تلعب وتدلع والبيت كان فندق تيجى تآكل وتنام وتمتع نفسك, قصرت لما كنت بتنزل كل ليلة تسهر مع أصحابك وسايبنى زى الكلبة في البيت وكنت بأقول يابت سيبيه براحته, قصرت لما سبتنى أروح وآجى في كل حتة لوحدى زى الأرملة وإنت موجود, قصرت لما خلتنى خدامة لأمك وإخواتك , هدى أنا عازم إخواتى على الغداء.. حاضر.. هدى أنا هاجيب ماما تقعد معانا .. حاضر ... هدى أنا هاسافر كام يوم أغير جو .. حاضر ,قصرت ياسامى و قصرت كتير قوى وأنا اللى كنت بأفوت بمزاجى علشان المركب تمشى تقوم في الآخر تقول لى تعيس.
