- جاري البحث عن كتكوت بسرعة
- طب عايزاه أصفر ولا ملون كده
- يا سلام لو يبقى إصدار أمريكي كده يا ملك
- طب متمشيش معاكي يا يونس بدل ملك
بصيت في شاشة التليفون بذهول وأنا بتأكد من إن ده رقم ملك صاحبتي مش حد تاني، لا يكون أتصلت على يونس بالغلط تبقى مصيبة،حطيت التليفون تاني على ودني واتكلمت بخفوت وكأنه سر وببص على الناس إللي في الشارع من ازاز الكافية إللي قاعدة فيه
- يونس! ملك هو صوتك أتغير ولا أنا سمعت صح
- .....
- ملك اكدبي عليا وقوليلي سمعت غلط طيب
حسيت بحد بياخد التليفون من أيدي بهدوء وقعد على الكرسي إللي قدامي بثقة وابتسامة مستفزة مرسومة على وشه، ده طلع يونس بجد مش هزار وكده
- سلام أنتِ دلوقتي يا ملك وأنا هشوف الإصدار الأمريكي بتاع الأستاذة واجيبه لحد عندها حاضر
قفل معاها و شال التليفون في جيبه كأنه بتاعه، ابتسمت بلطف وانكمشت في الكرسي بتاعي
- يونس يا حبيبي جيت أمتا، نورت والله، حد يخض حد كده
بص حواليه بعيونه الحلوة ديه
- لأ بس طلع عندك ذوق في إختيار الأماكن يا إيمان
- وهو أنا لو عندي ذوق كنت اختارتك أنت علشان أحبه
شهقت بصدمة من إللي قولته وبصتله باعتذار بس لقيته لسه مبتسم مش عارفه أنا هو لازق الإبتسامة على وشه قبل ما يدخل ولا إيه
- بس أنا طلع عندي ذوق أحسن من بتاعك واختارتك أنتِ علشان أحبك
- أخجلتني بتواضعك ده والله
- المهم أنا عملتلك أوردار توصيل على كتاب
أتكلمت بفرحة وحماس
- بجد، قول والله، طب إسمه إيه
كشر بوشه وهو بيرد بتوعد
- كيف تصطادين عريسًا
اتوترت وأنا قاعدة لما عرفت إنه بيلمح للي حصل من شوية، حاولت اهزر واغير الموضوع، رفعت أيدي اليمين إللي فيها خاتم خطوبتنا في وشه
- يونس يا حبيبي شكلك نسيت، أنا اصطادتك أنت والحمدلله
رجع بضهره لورا على الكرسي
- طب الحمدلله إنك فاكرة إننا مخطوبين كنت فاكرك نسيتي ولا حاجة
- ده أحلى يوم في عمري والله إزاي أنساه بس
- امممم
- اعمل بيها إيه ديه، اه صحيح مقولتليش عرفت مكاني إزاي
- من ملك
أتكلمت بغيظ
- اه صحيح وهستغرب ليه ما انتوا أخوات
خد من قدامي فنجان القهوة وشربه بهدوء و روقان
- هنخرج انهارده علشان ندور ليكي على الكتكوت الأمريكي وأشوف ليا أنا كمان مزة..قصدي كتكوتة أمريكي معاكي
شوحت بإيدي
- ده أنا قبليها أكون مقطعـ.اك وحطاك في أكياس سودا، وبعدين أنا كنت بهزر مع ملك خلي قلبك أبيض بقى
- لأ أنا قلبي ملون
- زي عيونك كده
شاور بأيده وضحك بحنان
- مش هتثبت لأ
- طب ده أنا حتى كنت هخليك تنزل مع صحابك تقعد على القهوة بعد الجواز
بصلي بانتباه و شك
- اه وهتطلبي كام بقى على كده
- عيب عليك أنا مش مادية خالص، أنا كنت هنزل أقعد معاك عادي يعني
- لأ يا حبيبتي بيتنا أولى بينا إحنا الاتنين
- أهو أنت كده يونس حبيبي
- وأنتِ كده أحلى مصيبة وقعت فوق قلبي
لـ:-#نجاة_محمود
