- عايزة تتجوزي واحد عنده أربعين سنة؟!
- السن مش فارق معايا، إللي كان هيفرق معايا بجد، لو هو فقير
- فقير إيه، وغني إيه، ده جواز! يعني مشاركة...حب
- وأنتِ خدتي إيه من الحب بقى يا جنى؟
سكت، أيوة سكت، ومعرفتش أرد، كل مرة حد بيفتح الموضوع ده قدامي بحس بتقل على قلبي، وإن مشاعري انجرحت، فـ بحاول أسكت علشان مخسرش شخص عزيز عليا زي صحبتي سلمى دلوقتي، مسكت شنطتي في أيدي وقومت علشان امشي
- أنا بس كنت بحاول أنصحك مش اكتر، بس على فكرة جنى خدت من الحب كتير مش شرط يبقى معاه فلوس علشان أبقى سعيدة، في حاجات تانيه أهم
خلصت كلامي وخرجت من اوضتها بسرعة علشان امشي، لاقيتها بتنادي عليا وهي جاية ورايا بعد لما وصلت عند باب الشقة
- استني يا جنى مالك زعلتي كده ليه
- مزعلتش ولا حاجه، أنا بس لاقيت نفسي اتأخرت على إياد وهو زمانه راجع من الورشة
ردت بسخرية
- اه ورشة، يا بنتي بقى إنتي مش ناوية تسيبي إياد ده وتشوفي حد تاني يستحق جمالك ويعيشك في هنا بدل الفقر إللي إنتي فيه ده
- لو سمحت يا سلمى متدخليش في حاجة متخصكيش، وخليكي أنتِ في الغني بتاعك، وملكيش دعوة بحياتي
سحبتني من أيدي علشان تدخلني جوا الشقة من تاني، وقالت بإصرار غريب وكأنها مش ديه سلمى صحبتي إللي أعرفها
- تعالي بس متبقيش عصبية كده، ده حتى إبن عم سليمان وأصغر منه بـ سنتين بيدور على عروسة وأنا مش هلاقي أحلى منك
محستش بنفسي غير وأنا بزقها علشان تبعد عني، وبجري ناحية باب الشقة وخرجت منه
- فوقي من الوهم إللي إنتي فيه يا سلمى، قبل فوات الأوان
خرجت سلمى ورايا و وقفت على السلم علشان صوتها يوصلني، وأنا نازلة
- أبقي سلميلي على الحب يا جنى، بكره متعرفيش تكلميني حتى، خليكي إنتي في الورشة بتاعت سي إياد، وأنا هعيش في القصور
وقفت في مدخل العمارة وأنا بنهج بتوتر، عدلت من طرحتي بأيد مهزوزة، وخرجت علشان أمشي، دخلت تالت شارع بعد بيت سلمى، بصيت ناحية ورشة إياد إللي جمب بيتنا، لكن لاقيته طالع من تحت عربية كان بيصلحها كالعادة، ابتسمت في وشه وسيبته ومشيت
- بِس بِس، يا أم سليم
مسحت دمعة نزلت من عيني بسرعة، وأنا ببتسم على الإسم إللي كل شوية إياد ينادي عليا بيه، مسك أيدي و وقفنا على جمب بعيد عن الناس إللي في الشارع، وقال بهدوء
- مين مزعل چنچون قلبي؟
- أنا مش زعلانة، ليه بتقول كده
شاور ناحية قلبه، وعيونه مركزة عليا
- قلبي هو إللي قالي كده، يمكن زعلانة علشان مصبحتش عليكي قبل ما أنزل، وقولتلك يا صباح العيدية يا كل ما ليا
ضحكت على هزاره، وأنا عارفة إن هو بيحاول يضحكني، وحسيت أن نسيت الحزن إللي كان فيا من كام ثانية
- أنا بحبك أوي يا إياد
كان هيحط أيده على كتفي، بس نزلها تاني جمبه، ونبرته اتحولت لأسف
- كنت هبهدل ليكي البلوزة الجديدة بتاعتك بأيدي، كويس إني لحقت نفسي
طلعت منديل من شنطتي، ومسحت أيده بهدوء
- فداك كل حياتي يا إياد
- أنا حاسس إن بعد الرومانسية ديه كلها، فيه نكد جاي في الطريق
مسك الشنطة بتاعتي في أيده، وحط أيده على كتفي ومشي بيا
- بقولك إيه تعالي نروح نشرب حمص الشام على النيل
- طب وشغلك يا إياد
- لما أرجع هبقى أكمله، متشغليش بالك أنتِ
أكتر حاجة بحبها في إياد إنه دائما متفائل، وبيحس بيا وأنا زعلانة، ويحاول يخرجني من زعلي بأي طريقة، شخص طيب بيعمل أي حاجة تخطر على باله، والأهم من ده كله إنه بيحبني وبيحسسني بالحنان، وصلنا قصر النيل، سندت على السور وبصيت للنيل قدامي بشرود، حسيت بـ إياد بيقف جمبي ومد أيده بكوبايبة حمص الشام ليا
- خودي اشربي الكوباية ديه بقى، وادعيلي
- متبقاش طماع يا أبو سليم
- ده يا بخت سليم لما يجي وتبقي أنتِ أمه
قلع أيده الجاكيت بتاعه وحطه على كتفي، لما حس إني بترعش لأن الجو كان ساقعة
- اتخانقت أنا وسلمى، وشكل كده مش هيبقى عندي صحاب تاني، وهبقى لوحدي
- اومال أنا روحت فين، أنا هبقى كل صحابك عادي
وهنا مقدرتش أمسك نفسي، وعيطت بصوت عالي مخنوق
- بس أنا بحب سلمى صحبتي يا إياد، أنا بس كنت بنصحها قبل فوات الأوان، وهي مسمعتش مني
طبطب عليا، وطلع من جيبه مصاصة، وحطها في أيدي
- إيه ده يا إياد هو أنا صغيرة
فتحها ليا وهو بيضحك، وبيمسح دموعي
- أنا كنت جايبها للبت فريدة بنت أختي، بس متغلاش على حبيبة القلب والله
كل مرة بيحسسني إني بنته مش مراته، وبيخلي قلبي يوقع في حبه أكتر ما أنا بحبه
- بصي يا جنى أنتِ نصحتيها، وعملتي إللي عليكي، مش هقولك متزعليش والكلام ده، لا خودي وقتك في الزعل عادي، وعيطي، بس افتكري إن مفيش حاجة بتحصلنا إلا وكان ربنا ليه مغزى من الحاجة ديه، وإن ربنا مش بيعمل غير الخير لينا، وسيبي صحبتك تجرب وتشوف نتيجة قرارها لوحدها، لأن الحياة تجارب
- إياد، هو ينفع أحضنك
- فن إختيار الوقت يا چنچون مش كده، راعي قلبي إللي فيكي مغروم
ومن عربية حمص الشام إللي واقفة على الرصيف، اشتغلت أغنية لميادة الحناوي كملت الجو حوالينا
- أنا بعشقك أنا ... أنا كلي لك أنا
أنا أنا ... أنا أنا أنا أنا
يامن ملك روحي بهواه
الأمر لك طول الحياة
الماضي لك ... وبكرة لك ... وبعده لك
أنا في سهادي ... وفي منامي
بندهك وبسألك ...
بتحبني ولا الهوى عمره مازارك
بتحبني ولا انكتب على القلب نارك.
#نجاة_محمود
