- أنا مش عايزك في حياتي
- تاكل آيس كريم
- انتي ليه مش عايزه تقتنعي
- طعمه تحفه تحب اعملك إيه علي الغداء
- مش عايز حاجه منك أنا عايزك تخرجي من حياتي
- خلاص يبقي مكرونه بشاميل انا بحبها
- انتي إزاي بارده كده بقولك مش بحبك
- بس أنا بحبك
إداني ضهره و صوته بان عليه الكسره - إنتي مش مجبره تعيشي معايا إنتي لسه صغيره و أكيد نفسك تبقي ماما وأنا هبقي أناني لو حرمتك من أبسط حقوقك
كنت بسمعه وانا عيني بتدمع إزاي قدر يفكر بالطريقه ديه انا مستحيل اسيبه علشان كده قلبي بيوجعني عليه لما بشوف نظره عيونه لما يشوف أي طفل في الشارع حضنته من ضهره و سندت رأسي عليه - أنت بجد مصدق إني ممكن اسيبك في يوم طب انت هتقدر تستحمل تشوفني مع حد غيرك
لقيته انفعل و جسمه اتهز و هو بيلف ليا و بيمسكني من أيدي جامد- إنتي ليا و بس استحاله تبقي لغيري إنتي فاهمه
- يبقي منتكلمش في الموضوع ده تاني هو أنت بجد ممكن تعيش من غيري
حط أيده علي خدي بحنيه - ده إنتي محور حياتي إزاي تقولي كده
لاحظت تجمع الدموع في عينه و هو بيكمل- أنا علشان بحبك بقولك كده أنا عايزك تبقي مبسوطه أنا بس نفسي في طفل يسندنا لما نكبر و يهون علينا همومنا و يطبطب علي روحنا
مسحت دموعه بأيدي وأنا كمان بعيط - أنت حبيبتي و إبني الأول و الأخير طول ما أنت معايا مش عايزه حاجه غيرك من الدنيا ده اختبار من ربنا و لازم نصبر و يبقي عندنا أمل في ربنا أكيد شايل لينا الأحسن
حسيت ملامحه هديت و الابتسامه نورت وشه لاحظت في عينه لامعه غريبه خدني في حضنه و هو ماسك فيا جامد - إنتي الشئ الوحيد اللي مصبرني و خلي لحياتي معني عملتي ليا بيت دافئ و غيرتي فيا كتير حاجات للأحسن بحبك يا رفيقتي للجنه
كان عدي علي الموقف ده اكتر من سنه و حصلت حاجه غيرت حياتنا للاجمل كنا راجعين البيت بعد ما خرجنا ماسك أيدي و كل شويه يبصلي و يبتسم
- نوح استني أنت سامع
- لا في إيه
- تعالي قرب كده انا سامعه صوت طفل بيعيط
- اكيد بتتوهمي يا حبيبتي
سيبته و مشيت ناحيه الصوت وانا دقات قلبي بتزيد و عيني بتدمع من اللي شوفته لقيت طفل لسه مولود محطوط في شنطه كبيره مفتوحه و بيعيط جامد كنت حاسه بأطرافي اتجمدت و نوح شال الطفل و هو بيحاول يهدي فيه لحد ما سكت
- نوح إحنا أكيد مش هنسيبه
بصلي و عينه حمراء و هو بيبص للطفل ببتسامه و هزلي رأسه ب لأ وصلنا البيت و نوح مش راضي يسيبه من أيده أنا كنت عارفه أن رضا ربنا قريب طول ما إحنا واثقين فيه و دائما بندعي - نوح شوف أيده صغيره إزاي
- إزاي حد يجيله قلب يرمي طفل كده افرضي مات في غيرهم يتمنوا ضفره بس
طبطبت علي ضهره - المهم دلوقتي أن إحنا لحقناه و هنربيه شوف يونس صحي إزاي
- إنتي لحقتي تسميه
- الاه مش إبني الجميل ده
- ده أنا كده أغير منه بقي
بوسته من خده - ده أنت اللي في قلبي أصلا بس بردوه ده ميمنعش إني بحبه و هدلعه
- وأنا بحبكم انتوا الاتنين
فعلاً دائما الصبر بيؤتي ثماره مهما عدت السنين و دائما عوض ربنا بيكون أجمل مليون مره من تخيلنا حتي المهم إن إحنا نحمد ربنا و نفضل ندعي و نصلي و أكيد ربنا مش هينساك و هتدوق طعم الفرحه
لــ: نجاة محمود
