- أنتِ شايفة نفسك بقيتي عاملة إزاي
حطيت إيدي على وشي باستغراب
- مالي يعني
- احلويتي زيادة وده خطر على قلبي
سكت ومردتش عليه فهو كمل
- طب أنتِ عارفة إن الحلويات الزيادة بتجزع النفس
- هو أنا دخلت فقرة هل تعلم بالغلط ولا إيه
حط أيده في جيبه وابتسم بثقة
- لأ يا خفيفة دخلتي قلبي
حسيت بقلبي هيخرج من مكانه بس حاولت أتكلم عادي
- فكرني كده أنت إيه إللي رماك عليا
- حظي الأسود يا ختي
- طب وسع
بصلي بعدم فهم وهو بيبص حواليه
- أوسع فين، ما عندك المكان واسع أهو
زقيته في كتفه علشان يبعد شوية، مديت أيدي من وراه وطلعتها وأنا ماسكة التيشرت بتاعه وبحركه قدام عينه
- كنت بدور على التيشرت علشان اغسله ولقيته
- يعني أنتِ مكنتيش جاية علشان تقعدي معايا
هزيت رأسي بـ لأ
- ولا علشان تستقبليني بحضن وابتسامة بما أننا لسه متجوزين وكده
- برده لأ
قام وقف بسرعه وهو بيصقف بأيده وفرحان زي الأطفال
- يبقى أنتِ مهنش عليكي تسبيني كل ده قاعد لوحدي في الصالة من غيرك، فـ جيتي تطلبي مني اجي أساعدك في الغسيل زي الأفلام
طبطبت على كتفه وأنا بضحك جامد
- لأ يا حبيبي إحنا عندنا غسالة، هحتاجك في إيه
قعد تاني بإحباط ومسك ريموت التلفزيون بملل
- أنتِ زوجة مش وش نعمة والله، ياريتني سمعت كلام ست الكل
سيبت إللي في أيدي بسرعة وقعدت جمبه باهتمام وابتسامة كبيرة
- أيوة بقى جينا لأهم حته، قالتلك إيه حماتي
- قالتلي يا بني ديه شكلها نكدية و.....
بص قدامه بصدمة وهو بيستوعب إللي قاله وأنا مستنياه يكمل بضحكة غيظ
- سكت ليه يا ياسين يا حبيبي، كمل كمل
- أنا شامم ريحة حاجة بتتحرق
لفيت وشه ليا وهو بيبعد بعينه في كل حته وكأنه مش فاهم
- أنا عايزاك دلوقتي تتصل بحماتي العزيزة تسلم عليها السلام الأخير علشان أنت إللي هتتحرق دلوقتي
- بقولك شامم ريحة شياط بجد يا وعد
استوعبت كلامه وقومت جريت على المطبخ بسرعة وأنا بقول بصوت عالي
- المكرونة بشاميل اتحرقت في الفرن
وقف على باب المطبخ وقال بفزع
- أقفلي بسرعة يا مجنونه هنولع
قفلت وأنا ببصله بغيظ وفي أيدي ماسكة المعلقة الخشب معرفش مسكتها ليه، وهجمت عليه وهو بيجري ويضحك
- ده بدل ما تيجي تساعدني وتقولي عنك أنتِ يا حبيبتي، بتقولي يا مجنونة
- أنا مش مستغني عن عمري يا وعد اه، هو هيبقى نكد وموت كمان
كمل كلامه وهو واقف بعيد
- طب أنتِ عارفة إن ضرب الحبيب زي أكل الزبيب
- الكلام ده تقوله لأمك
قرب مني بهدوء وهو بيضيق عينه بشر
- قولتي إيه
- قصدي تقوله لحماتي حبيبتي الغالية
حط أيده في جيبه بثقة
- ستات مش بتيجي غير بالعين الحمراء
- والخضرا وحياتك
- مش فاهم
- مش أنت عيونك خضرا
- اه
- وأنا جيت وحبيتك، يبقى أنا باجي بالعين الخضرا
خدني في حضنه
- تعرفي يا وعد أنا بحبك علشان هزارك وشقاوتك القمر ديه، إللي يعرفك ميعرفش طريق الملل أبداً
- ده مدح ولا ذم
- ده حب ياسين لـِ وعد
"يا راميني بسحر عينيك الاتنين ما تقولي واخدني و رايح فين "
لـ:-#نجاة_محمود
