- هي الحياة إيه غير راحة بال
- و دبلة مقوية قلبي
- ضربة في قلبك يا عديمة الإحساس
رفعت صباعها بتشاور عليا
- ناس حقودة، ملهاش أمان
مسكت طبق القطايف بالشكولاته المفضل عندي وأنا بلف في الاوضة بروقان
- وأمان يا دنيا أمان
سمعت صوت شهقة فرح بعد ما خطفت مني الطبق
- في رمضان، في رمضان يا أختاه
- أنا نور واحدة في كل الأوقات
ضحكت بسخرية
- طب يلا يا واحدة ورانا تنضيف
حضنت نور الطبق وهي بتقعد على السرير
- أنتِ متعرفيش
ضربت كف على كف من برودها
- لأ والله محصليش القرف، يوه قصدي الشرف
أتكلمت نور بمسكنة
- ما علينا، أصل زين قرة عيني قالي يا بت يا نور أنتِ تعبتي خالص من أول يوم رمضان وعلشان كده مش عايزك تعملي حاجة خالص ولا حتى أكل ليا
خلصت نور كلامها وسمعنا صوت زين أخويا من برا بعد ما خلص صلاة التراويح
- أنتِ فين يا نور، تعالي حطيلي أي أكل علشان جوعت أوي في الكام ساعة دول
بصتلها بضحكة عريضة وأنا شمتانة فيها، لقيتها لفيت وشها الناحية التانية وبتبرطم بالكلام، بعدين بصتلي بابتسامة سمجة
- اخوكي ده بيحبني جدا يا فرح
عوجت بوقي بسخرية
- اومال طبعًا طبعًا
- باين حبنا ولا نبين اكتر
سمعنا صوت زين تاني
- يا نور اوعي تكوني نمتي، طب لو نمتي أصحي حطيلي أكل ونامي طيب
- ياه على الحب
شاورت نور تجاه الباب وهي بتقوم
- إما أروح أشوف حبيبي عايز إيه بدل ما هو فاضحني كده، واخدين بعض عن حب بقى علشان كده تلقيه واخد عليا
خرجت من الاوضة بسرعة وقفلت الباب وراها، نور صحبتي ومرات أخويا الاهبل إللي برا ده، مسكت التليفون لقيت مسدج على الواتس من يونس خطيبي ومكتوب كتابنا
- ولا تكتمل الحياة إلا برفيق صالح، وسلام على الدنيا
كتبتله
- يونس، في حاجة انهاردة حصلت ضايقتني جدا
- احكي، أنا سامعك
- وأنا في الشارع الصبح بجيب حاجات لقيت ست وراجل بيتخانقوا والراجل بعد كده ضربها بالقلم وفضل يهزق فيها بعدين عرفت أنه جوزها وهما منفصلين عن بعض بس هو مش بيصرف على عياله وراح اتجوز تاني و رمى عياله في الشارع من غير فلوس وأن الست كانت بتطلب منه فلوس لعيالها وهي حزينة، يونس أنا حسيت بكسرتها
لقيت نفسي بعيط بحزن بعد ما خلصت كتابة، المشهد مش عايز يروح من دماغي، إزاي فيه أبهات كده
- أكيد ربنا مش هيسيب حقها يا فرح، متزعليش ربنا معاها
- هو ليه كل الرجالة كده، ده الرسول صلى الله عليه وسلم وصاكوا علينا
- مش كل الرجالة شبه بعضها يا فرح ودول غالباً بيبقوا أشباه رجال وميعرفوش حاجة عن دين الإسلام، وعند الله تجتمع الخصوم، ده النبي محمد صلي الله عليه وسلم قال " استوصوا بالنساء، فإن المرأة خلقت من ضلع، وإن أعوج شيء في الضلع أعلاه، فإن ذهبت تقيمه كسرته، وإن تركته لم يزل أعوج، فاستوصوا بالنساء». نيجي إحنا في الأخر ونعمل كده، ثم الراجل بأفعاله و لين قلبه
- تعرف إني ارتحت جدا لما اتكلمت معاك
بعتلي ايموشن ضحك
- أنا دائما في الخدمة لأجل ننول الرضا
- كفاية إن قلبي معاك متبقاش طماع
- أنا طماع في كل حاجة تخصك أنتِ يا فرح
خبيت وشي بأيدي بفرحة، اختياري مكنش غلط وربنا جبر بقلبي، بعدين مسكت التليفون تاني وكتبت
- عيناك بحر يفيض ولا ينضب، أما قلبك فهو مأوى، دمت لي كل شئ جميل
#نجاة_محمود
