((((((مفيش رحمه ))))))
#لولو_محمد
الحلقه السابعه عشر
محمود / على العموم انا هكلم الراجل يجى و نشوف هى رايها ايه فى الموضوع ده
حياه / و لما ترفض بقى علاقتك بالراجل مش هتتاثر
محمود / و تتاثر ليه الجواز قسمه و نصيب و كل شئ بالخناق الا الجواز بالاتفاق
حياه / رحيم مش هيسكت
محمود / و اش دخل رحيم بالموضوع والله اللى اعرفه ان كل اللى بيربطه بببنتى انه ابن عمها اكتر من كدا ملوش عندى حاجه
حياه / بيحبها مشوفتوش ياعينى و هو واقف طالع عينه بيعملها المشروع
محمود / لو بيحبها يتجوزها شغل الصحبيه ده مش عاجبنى انا نازل المعرض
حياه / ربنا يستر
........
فى الكليه
رحمه / ها عملت ايه
رحيم / اتهريت اساله مش عارف بقى هعمل ايه
رحمه / باذن الله خير ايه رايك نروح نتغدى فى الكافيتريا لحد ميقولوا النتيجه
رحيم / مفتكرش ان النتيجه هتتعلق النهرده اصلا الساعه اتنين و لسه مخلصوش حرف الره اصلا
رحمه / انا هستنى لحد ميقولوا روحوا مش همشى عاوز تمشى انت براحتك
رحيم / لا امشى ايه تعالى الكافيتريا نقعد هناك شويه
.............
فى الكليه بعد اربع ساعات
عماد يدخل
رحيم / انت دخلت ازاى
عماد / مالبوابه عادى يعنى قولتلهم داخل اجيب الباشمهندسه عبير دخلونى ها طمنونى عملتوا ايه
رحمه / لسه منعرفش ادينا مستنين النتيجه
عماد / طب ايه فين عبير اتصلت بيها كنسلت عليا فجيت
رحيم / عماد فوق دى كليتنا بلاش استهبال هنا
عماد / لا شكلها المرادى جد
رحمه / كل مره بتقول كدا
عماد / متموتونى و ترتاحوا والله شكلكوا هترتاحوا
رحمه / انت بتحبها بجد و لا زى كل مره
عماد / بصى هو الموضوع ده مبيبانش بالسرعه دى بس كل اللى انا عارفه انى مبطلتش افكر فيها من امبارح
رحمه / و منه
عماد / منه دى زى اختى زيك بالظبط بحاول والله بس مش قادر فى بينى و بينها حواجز بالهبل
روقيه تدخل
روقيه / هاى ... احنا هنفضل مرزوعين كدا لحد امتى
رحمه / روحى و انا هقولك نتيجتك لما تبان
روقيه / لا طبعا اروح ازاى يعنى
رحيم / عماد اخويا روقيه زميلتنا فى الدفعه
روقيه / هاى تشرفنا
عماد / الشرف ليا
روقيه / سمعت رحيم بيتكلم كتير عنك بس الحقيقه مختلفه خالص عن الصوره اللى تخيلتها
عماد / اكيد الحقيقه احسن مش كدا
رحمه / اهدى يا عماد دانتوا اول مره تشوفوا بعض
روقيه / تعجبنى الثقه
عماد / هو مش ثقه على قد مانا متاكد ان رحيم مبيتكلمش عنى عدل
رحيم / ليه ياعم
روقيه / بالعكس رحيم شاب محترم اوى و مبيطلعش منه العيبه بجد شخصيه يونيك
عماد / يونيك ؟؟؟ امممم طب ايه يا رحيم مش هتودينى بقى المكان اللى قولتلك عليه و لا ايه
رحيم / اكيد تعال
رحيم و عماد يمشوا
رحمه / يونيك ؟؟؟
روقيه / ايه بجامله قدام اخوه يعنى
رحمه / اه اوك انا هطلع القاعه فوق هتيجى
روقيه / هو عماد ؟؟ صح اسمه عماد مش كدا
رحمه / اه ماله يعنى
روقيه / اكبر من رحيم بكام سنه
رحمه / تسعه ليه
روقيه / شكله اصغر من كدا بكتير
ريهام تدخل
ريهام / وحشتينى يا جزمه اخبار المشروع ايه
رحمه / طب انا طالع عينى مطبقه على اللوح انتى يا كلبه مفيش مره تطلعى المبنى و تدخلى تسلمى عليا
ريهام / اعمل ايه يا بنتى طالع عينى شيتات و كويزات و قرف و بخلص الكليه بنط فى اول تاكس و اروح اترمى عالسرير
رحمه / الله يعنى الحال من بعضه بقى و كل الاقسام تعب
ريهام / هانت كلها اسبوعين عالفاينال و اخد اجازه و انااااااااااااام
رحمه / على خير
روقيه / انا هعتبر نفسى شفاف
ريهام / تصدقى فعلا ولا شوفتك اصل رحمه كانت وحشانى اوى
روقيه / ليكى حق هو فى حد يقدر يبعد عن رحمه دى ادماااان
رحمه / ريهام وراكى ايه تعالى نطلع نبص عالقاعه نشوف النتيجه بانت و لا لا
............
قدام القاعه
عبير / انت بتعمل ايه هنا
عماد / مش عارف بس انتى مبترديش على مكالماتى فجيت
عبير / انت بتهزر
عماد / ابدا والله بصى انا عارف انك هتفهمينى غلط بس والله ابدا
عبير / دا مكان شغلى و معنديش استعداد ان مخلوق يتكلم عنى نص كلمه و لعلمك يا عماد انا كنت بحترمك بلاش تخلينى اغير رايى فيك
عماد / و تغيرى رايك ليه على الاقل ادينى فرصه و اسمعينى يمكن كلامى....
عبير / و انت مين فهمك انى بتكلم مع حد معرفوش اصلا و لا حتى اتكلم معاك بصفتك ايه اسمع انا ان كنت سمحتلك توصلنى فدا كان عشان الوقت متاخر و ان كنت سمحتلك تيجى تاخدنى فدا لانى معيش رقم رحيم و لا رحمه يدونى العنوان فاوعى تفهم ده غلط و لا هو خير تعمل شرا تلقى
عماد / انا غرضى شريف والله ليه بس المعامله دى
عبير / انا ورايا شغل و ان كان غرضك شريف فانت عارف العنوان بلاش بقى شغل الحرميه ده و ادخل البيت من بابه سلام
عبير تدخل القاعه و رحيم يروح يقف مع اخوه
رحيم / من الواضح من وشك اللى جايب خمسين لون انها سكتك سكه عجب
عماد / انا شكلى هتجوز يا رحيم
رحيم / يلا عالبركه خليك تتلم شويه بقى
............
فى البيت
محمد / يا عينى على اللى حب و طب
عماد / يعنى هتيجى معايا تخطبهالى و لا لا
محمد / مش لما نسال عليها و نعرف اصلها و فصلها الاول
زينب / مانت شوفتها يا محمد لما جيت مالسفر فاكر البنوته العسل الى كانت بتساعد رحمه جوه
محمد / ايه ده طب مش كنتى تغمزينى اخد بالى
عماد / يا حج تاخد بالك من ايه انا اللى هتجوزها مش انت
زينب / اتلم يا وله كلم ابوك عدل
عماد / انا هحدد معاد يوم الخميس الجاى يمشى معاكوا و لا ايه
محمد / وماله عالبركه هو انا فى ديك الساعه اللى هفرح بيك فيها
زينب / بس والله صعبان عليا البت منه
محمد / مالها منه
زينب / بس على العموم ملحوقه انا سمعت طراطيش كلام ان مصطفى منمر على رحمه
رحيم / ايه
زينب/ الله هى مقالتلكش انه متقدملها و لا ايه
عماد / انتى بتقولى ايه يا ماما
زينب / بقول اللى سمعتوه الحج ابراهيم كلم عمك انه يجى يطلب ايد رحمه لمصطفى و محمود قالهم انها بتمتحن فهياجلوا الموضوع شويه لما تخلص المشروع
رحيم يقوم يروح شقه محمود
محمد / يعنى كنتى هتخسرى حاجه لو سكتى شويه
زينب / مهو كدا كدا هيعرف و بعدين كدا احسن حتى بيقولوا جواز القرايب بيجيب عيال معوقين
محمد / على رايك و احنا مش ناقصين معوقين فى البيت عن اذنك
محمد يقوم
زينب / هو يقصد ايه بمش ناقصين معوقين دانا عيالى زى الفل
.......
فى بيت رحمه
رحيم / يعنى الكلام ده صحيح
عفاف / دا مجرد كلام
رحيم / و رحمه رايها ايه
عفاف / رايها فى ايه هو كان جه اتقدم دا مجرد تلميح مع عمك
رحيم / مش فاهم
عفاف / يعنى رحمه متعرفش حاجه عن الموضوع ده و مش هتعرف الا لما يجوا و يتقدموا رسمى
رحيم / يجوا فين دانا اولع فيهم و فى البيت و فى نفسى هو لعب عيال و لا ايه
عفاف / هو ايه اللى لعب عيال و مالك اتحمقت كدا ليه هو انت مش سبتها
رحيم / انتى اللى بتقولى كدا يا تيته
عفاف / اسمع يا رحيم لو البت تلزمك اللحق نفسك قبل متطير من ايدك
رحمه تطلع مالاوضه
رحمه / انا هعمل نسكا... مالكوا فى ايه ... فى ايه يا رحيم مالك
رحيم يقوم يمشى
رحمه / هو فى ايه يا تيته ماله رحيم
عفاف / ملوش مخنوق شويه اكمن النتيجه مبانتش النهرده فتلاقيه متوتر حبتين
رحمه / ممكن اروح اشوف ماله
عفاف / روحى
.....
فى الصاله عند رحيم
رحمه / ازيك يا طنط
زينب / ازيك يا عروسه عامله ايه
رحمه / هو رحيم جوه
زينب / اه جوه عاوزه منه حاجه
رحمه / اه كنت عاوزه استلف منه طقم الالوان ممكن ادخله
زينب / ادخلى يا حبيبتى بيتك و مطرحك
....
فى اوضه رحيم
رحيم / افندم
رحمه / انت زعلان منى و لا ايه
رحيم / و ازعل منك ليه يعنى خير عاوزه ايه
رحمه / انا جايه اطمن عليك
رحيم / بمناسبه ايه فارق معاكى يعنى
رحمه / انت بتكلمنى كدا ليه انا الغلطانه اصلا عن اذنك
رحمه توصل للباب و ترجع تانى
رحمه / طب انا عملت ايه طيب
رحيم يضير يبص عليها يلاقى عنيها كلها دموع يتنهد
رحيم / معملتيش انا اللى مش فى المود حقك عليا
رحمه / انا شوفتك مدايق و انت قاعد مع تيته و قومت جرى فقولت اجى اطمن عليك
رحيم / انا كويس
رحمه / مالك بس حد قالك حاجه عماد كلم بشمهندسه عبير و قالتله اننا جبنا درجات وحشه
رحيم / لا يا رحمه
رحمه / امال مالك
رحيم / مخنوق ايه فيها ايه
رحمه / من ايه بس
رحيم / و انتى مالك
رحمه / تصدق انا اللى غلطانه انى جيتلك و لا عبرتك اصلا اولع
رحمه تمشى و ترزع الباب وراها و تروح اوضتها تلاقى تليفونها بيرن
رحمه / الو ... ايوه يا مصطفى ازيك ... اسفه مكنتش فى الاوضه فمسمعتوش .... ياريت والله انا فعلا مخنوقه و مش فى المود خالص ..... اوك هلبس و استناك
رحمه تقفل التليفون و تلبس الباب يخبط
رحمه / ادخل
رحيم يفتح الباب
رحيم / انتى لابسه كدا و رايحه فين
رحمه / خارجه
رحيم / انا كنت جاى اعتزرلك انى كلمتك وحش بس بجد انا مكنتش فى المود
رحمه / حصل خير
رحيم / انا كنت جاى عاوز اتكلم معاكى فى موضوع
رحمه / خير
رحيم / بصى انا عاوز اقولك انى .... اللى عاوز اقوله انك عارفه انى مبحبش حد يغلط فيا .... لا بصى انتى عارفه كويس انك يوميها ....
تليفون رحمه يرن
رحمه / دا مصطفى تحت
رحيم / و دا جاى يعمل ايه
رحمه / معرفش مصطفى اتصل و قالى لو تحبى تخرجى و انا كنت مخنوقه قولتله ماشى سيبك انت كمل انت عاوز تقول ايه انا مش فاهمه
رحيم / مفيش متشغليش بالك انبسطى عن اذنك
رحيم يمشى
............
فى مطعم فخم
مصطفى / ايه رايك فى المكان ده
رحمه / شكله حلو اوى اول مره اجيه على فكره
مصطفى / اخبارك ايه
رحمه / متوتره شويه يعنى بكره نتيجه المشروع
مصطفى / عموا محمود حكالى على اللى حصل معاكى بجد حركه واطيه اوى
رحمه / ايوه بس الحمد لله رحيم وقف جنبى اوى و ساعدنى كتير
مصطفى / محترم رحيم
رحمه / فعلا
مصطفى / انتى عارفه ليه جبتك هنا
رحمه / عشان بابا حكالك على المشروع فقولت تغيرلى المود
مصطفى / يعنى حاجه زى كدا
رحمه / تعرف ان رحيم ده اغبى مخلوق عالارض
مصطفى / ايه
رحمه / اه والله بنى ادم متخلف
مصطفى / ليه بتتكلمى عنه كدا
رحمه / ايه اللى يخلى واحد يسيب مشروعه و يشتغل فى مشروع واحده تانيه المفروض انه بيكرهها
مصطفى / انتى كويسه
رحمه / لا انا مخنوقه و مش طايقه نفسى
مصطفى / لو المكان مش عاجبك
رحمه / لا المكان حلو و بجد ميرسى ليك يا مصطفى انك جبتنى هنا كان زمانى باكل المخدات فى البيت
مصطفى / هههههههههه طب اللحق اجرى انا و لا ايه
رحمه / بطل رخامه انا قصدى بهرى و انكت فى نفسى
مصطفى / طب افتكرى الجمايل بقى
رحمه / مصطفى احنا متربين سوا صح
مصطفى / ايوه
رحمه / يعنى انت تعرفنى هو انا وحشه
مصطفى / لا طبعا انتى قمر
رحمه / لا مش قصدى انا قصدى طباعى صفاتى شخصيتى فاهم
مصطفى / اه
رحمه / اه وحشه
مصطفى / لا لا لا انا قصدى اه فاهم بصى محدش فينا كامل كل واحد فيه حجات حلوه و حاجات وحشه
رحمه / طب ايه الوحش اللى فيا يعنى انت لو بتحب واحده و لقيت فيها حاجه وحشه صفه مثلا او معرفش يعنى فيها حاجه بتدايقك هتعمل ايه
مصطفى / بصى انا مقتنع ان مفيش حد بيتغير و مشكله الحب انه مبيخليكيش تشوفى الصفات دى بوضوح
رحمه / يعنى مدام الانسان شاف عيوبك يبقى بطل يحبك
مصطفى / لا انا مقولتش كدا انا قصدى يعنى انه صعب الواحد يشوف عيوب حبيبه فى الاول ففى الغالب بتبان بالعشره و التعامل يعنى انتى فاهمه
رحمه / انا كنت عارفه بس قلبى مكنش راضى يصدق مهو ازاى يعنى ازاى
مصطفى / هو ايه اللى ازاى
رحمه / تعرف انا يمكن اكون عنديه شويه عصبيه شويه دلوعه شويه بس اكيد فيا حاجه حلوه على الاقل تخلى ...اكيد فيا ولو ميزه واحده صح
مصطفى / واحده بس دانا ممكن اعدلك عشره على الاقل
رحمه / بجد
مصطفى / انتى حلوه و عسوله و شاطره و مؤدبه و كلك طاقه عندك روح حلوه جدا تخلى اى حد فى الدنيا يتشدلك بسهوله اوى
رحمه / امال ليه بقى
مصطفى / ليه ايه
رحمه / انا عاوزه شوكليت ممكن
مصطفى / طبعا ثوانى حاضر
مصطفى ينادى الويتر يجى
رحمه / عاوزه اكتر حاجه فيها شيكولاته عندكوا لو نوتيلا كمان يبقى كتر خيرك
مصطفى/ خليهم اتنين
الويتر يمشى
مصطفى / قريت مره ان الشيكولاته ادمان للبنات
رحمه / انا بعشقها باكلها فى اى وضع و اى صوره و اى مكان مقدرش اعيش منغيرها اصلا
مصطفى / مع انك ميبانش عليكى خالص
رحمه / انا ممكن احرم نفسى مالاكل طول اليوم عشان اكلها بجد بتريحنى خصوصا الفتره الاخيره بجد انا اسفه اوى انت المفروض خارج تنبسط و انا نكدت عليك انا متاكده انك
مصطفى / بالعكس دا جزء مهم جدا من شخصيتك اول مره اشوفه
رحمه / و ياريتك مشوفته
مصطفى / بالعكس انا سعيد جدا انى قضيت الوقت ده معاكى حتى لو يعنى كنتى متوتره و مخنوقه و مفهمتش نص الكلام اللى قولتيه بس على الاقل قضيته معاكى
رحمه / انت مش متخيل انا كنت محتاجه الخروجه دى قد ايه بجد
مصطفى / بس كدا تؤمرى انتى بس فى اى وقت تحسى انك مخنوقه اتصلى بيا و انا افضيلك نفسى و اخرجك و اجيبلك معايا برطمان نوتيلا حجم عائلى كمان
رحمه / ههههههههههه شكرا يا مصطفى بجد شكرا
........
فى البيت فى اوضه رحيم
عماد / مالك يابنى انا بقالى ساعه قاعد جنبك منطقتش بكلمه
رحيم / هو الحريم بوجه عام يعنى بياعين اوى
عماد/ بص هو اصلا معروف عنهم انهم بينكروا العشير فغالبا اه
رحيم / ايوه صح بس مش بالسرعه دى يعنى ايه بالبساطه دى
عماد / هو فى ايه مالك
رحيم / تفتكر رحمه بتحب مصطفى
عماد / ههههههههههههه اه قول بقى كدا
رحيم/ اطلع بره انا مش ناقصك
عماد / مدام انت هتموت عليها اوى كدا سايب طريقها فاضى ليه الله يرحم لما كنت بتتخانق مع اى حد ينفخ بس جنبها
رحيم / اطلع بره
صوت البوابه بيتقفل رحيم يقوم يجرى يلاقى رحمه طالعه عالسلم
رحيم / مبدرى يا هانم
رحمه / الساعه 10 و مصطفى مستاذن من بابا فى ايه
رحيم / انبسطتى يعنى اهم حاجه تكونى مبسوطه
رحمه / اه انبسطت مصطفى شخصيه زوق جدا و محترم
رحيم / بجد والله و ايه كمان
رحمه / فى ايه يا رحيم انت بتكلمنى كدا ليه
رحيم / بكلمك ازاى
رحمه / انا تعبانه و عندى كليه الصبح و داخله انام تصبح على خير
رحيم / متنسيش تتصلى بمصطفى تطمنى انه روح
رحمه / هتصل
رحمه تدخل الشقه و ترزع الباب رحيم يرفع ايده عالباب و يمسك نفسه فى اخر ثانيه و يجز على سنانه و يدخل شقته و يرزع الباب
.........
تانى يوم فى الكليه
رامى / انتوا اتخانقتوا تانى و لا ايه مالك قاعد بعيد عنها كدا ليه
رحيم / انا روحى فمنخيرى مش طايق حد
رامى/ اعطس
رحيم / تصدق انا هقوم من جنبك مش ناقص فقعه
رامى / هههههههههه استنى بس
رحيم يروح لرحمه
رحيم / تروحى الكافيتريا
..........................
